Dakel ya saninaro so manli-live in ni antis iran mankasal. Gagawaen itan na arum lapud labay dan salien no kasin compatible ira ed sakey tan sakey, tan iisipen da ya makatulong itan pian magmaliw ya mas maliket so relasyon da no sanasawa la ra. Pero ayos labat kasi ya manamong so saninaro ya agni nankasal?

Diad sayan artikulo

•  Antoy ibabaga na Biblia?

•  Kasin makatulong so pan-live in pian makapanparaan kad panangasawa?

•  Kasin makatulong ed pinansyal so pan-live in yo?

•  Kasin makatulong so pan-live in pian naiwasan moy makapiasawa ed toon agmo manaya labay?

•  Wala ni kasi mas maong ya gawaen?

•   Ag-iyaabuloy na Biblia so pan-sex na totoon agkasal ed sakey tan sakey. Singa bilang, oniay nabasa tayo: “Paliisan yoy seksual ya imoralidad.” (1 Tesalonica 4:3; 1 Corinto 6:18) Kaiba ed satan so pan-sex na laki tan bii ya manli-live in, anggano wala ni bilang so plano dan mankasal diad arapen. a Proprotektaan na saray estandarte na Biblia so saninaro ed panlukon antis iran mankasal, tan arum ni ran aliwliwan epekto na pan-live in antis na pankasal.

•   Nanlapud Dios so uksoyan na panangasawa. Nen inggapo to itan, say kuan to: “Taynan na laki so ama tan ina to tan iyamong toy asawa to, tan magmaliw iran sakey a laman.” (Genesis 2:24) No determinadon agmansian so sanasawa, atan so ontulong ed sikara pian walay aroan ed pamilya da tan ag-itan nabuyak.

 On, so ebat na arum. Parad sikara et mas nawalaay eksperiensya so saninaro no saniba dan gawaen iray kimey ed abung, tan no naobserbaan day kiwas na sakey tan sakey ed inagew-agew. Balet, importante ya pareho iran determinadon onloob ed panangasawa pian talagan magmaliw ya maliket so relasyon da.

 Panon ya naaralan na saninaro so pagmaliw ya matoor ed sakey tan sakey balang lan no marakep odino andi so situasyon? Agda la kaukolan so “trial period,” ya isipen dan sarag da ni onatras tan pultoten so relasyon da. Imbes, mas onelet so relasyon na saninaro no pareho iran determinadon agmansian tan no saniba dan solusyonan iray problema.

 Tandaan: Imbes ya makapanparaan so saninaro parad panangasawa, say pan-live in et iparaan to ra ed pansian.

 Prinsipyo na Biblia: “Antokaman so itatanem na sakey a too, saya met so anien to.”—Galacia 6:7.

 On, so ebat na arum. Naamtaan ed sakey ya survey na Pew Research Center ya diad United States et manga apatira ed samploran adulto so mili-live in lapud pinansyal iran rason. Balet imbaga na dakel ya kaibad survey ya anggano abayag la ran manli-live in agni ran siansia akaparaan ya mankasal lapud kulang ni kuarta ra.

 Wala ni ray arum ya aliwliwan epekto na pan-live in, lalo la parad saray bibii. Singa bilang no apultot lay relasyon da, kaslakan ya say bii so mangako na responsabilidad ya mamabaleg ed ananak da.

 Tandaan: Mas dakel ni so aliwliwan epekto na pan-live in nen say iisipen mon benepisyo to.

 Prinsipyo na Biblia: “Siak si Jehova a Dios mo, say mangibabangat ed sika pian nagunggonaan ka.”—Isaias 48:17.

 On, so ebat na arum. Balet “kaslakan et agnaiisip na saray totoon miaamong la antis ni ya mankasal ya no mi-live in ira et mas mairap dan pultoten so relasyon da,” so ibabaga na libron Fighting for Your Marriage. Akin ey? Nayarin nadiskobre na saninaron manaamong la ya wala manaya iray seryoson rason no akin ya ag-ira bagay ed sakey tan sakey. Balet lapud saray obligasyon da, singa bilang walay alaga dan ayep, walay rerentaan dan abung ya sikaran duay pinmirma ed kontrata, odino agda inilaloan ya malukon manaya may bii, ompan nagawa ed sikara may ibabaga na saray researcher “ya agda la labay so mansian lapu labat ta apasalan da lay manamong tan agda la sarag so manggaway pananguman ya makatulong komon ed sikara.” b Labay ton ibaga, “wala ra may manli-live in ya mas maong komon no pultoten da lay relasyon da, pero manpapakasal ira laingen lapu labat ta atan so mas mainomay ya gawaen,” so intuloy na Fighting for Your Marriage.

 Tandaan: Imbes ya makatulong so pan-live in pian makagawa kay dugan desisyon, gawaen to laingen ya mas mairap ya pultoten so aliwliwan relasyon.

 Prinsipyo na Biblia: “Say marunong et ompapaliis no nanenengneng toy peligro, balet say andiay kakabatan et ondidiretso tan aanien to ray pansumpalan.”—Proverbio 22:3.

 Naiwasan mo iray aliwliwan resulta na pan-live in antis ya mankasal tan magmaliw kayon mas maliket no sanasawa ki la. Panon? No unoren yo iray estandarte na Biblia ed panangasawa. Agka manaapura, kabat mo nin maong so toon labay mon magmaliw ya asawa antis kayon manamong bilang sanasawa. Mas maong no say pilien mon magmaliw ya asawam et amay pareho kayoy prinsipyo tan papanisiaan, imbes ya amay naaakit ka labat ed sikato.

 Wala ray advice ed Biblia ya makatulong ed sika pian magmaliw ya maliket tan malet so relasyon yon sanasawa. c Singa bilang, wala ray prinsipyo ed Biblia ya makatulong ed sikan . . .

•   iwasan so pagmaliw ya agmatoor

•   magmaliw ya maong ya asawa

•   nibiig iray negatibon kualidad na inarom legan ya saninaro ki ni labat

 Parad kaaruman ya impormasyon nipaakar ed sarayan topic nengnengen so seksion ya “Panangasawa tan Pamilya” diad jw.org.

Prinsipyo na Biblia: “Say interon Kasulatan et impuyan na Dios tan makagunggona parad panagbangat.”—2 Timoteo 3:16.