Wala labat ed abung yo so anak mo tan anggapoy nagawaan to. Insan to imbagan: “Nabo-boring ak la!” Antis mon i-switch so TV odino panggalawen mo na paborito ton video game, nia ray pigaran sarag mon ikonsidera.

•   Nayarin mas na-boring so anak mo lapud karakel tan klase na panagligliwaan. Oniay imbaga na sakey ya ama ya si Robert: “Parad arum ya ugugaw, mas makapa-boring iray inagew-agew ya aktibidad nen say pambantay na TV odino panggalaw na video games.”

   Ontan met so apansin na asawa ton si Barbara, imbaga to: “No gagawaen iray inagew-agew ya aktibidad, kaukolan so mannonot tan mansagpot, tan kaslakan et agtampol nanengneng iray resulta. Makapa-boring itan ed ugugaw ya mahilig ya manbantay na TV tan manggalaw na video games.”

•   Nayarin ikompara toy sarili to ed arum no lanang ya onnengneng ed social media. No nanenengneng na anak mo iray gagawaen na kakaaro to, nayarin isipen to ya boring so bilay to. “No maminsan, naiisip kon ‘Maong ni arum ta mani-enjoy ira, siak balet wala ak labat ed abung,’” so imbaga nen Beth, sakey ya kabataan ya bii.

   Ontan met, anggano pigay oras ka lan manguusar na social media, nayarin na-boring ka nin siansia. “Tua ya busy kad satan, pero kayari to et anggapo lanlamang so agawaan mo,” so imbaga nen Chris, sakey ya kabataan ya laki.

•   Pankanawnawa itan pian magmaliw iran creative. Imbaga na sakey ya ina ya si Katherine ya no nabo-boring iray ugugaw, pankanawnawa itan pian magmaliw iran creative. Singa bilang, imbaga to: “Say simplin kahon et magmaliw ya time capsule, luluganan, baloto, odino spaceship. Sarag da met so manggawa na tent diad pangisabit day ules ed saray yurongan.”

   Imbaga na sakey ya psychologist ya si Sherry Turkle ya no nabo-boring ka, “tatawagen ka na imahinasyon mo.” a Kanian aliwan lanang ya makapuy no nabo-boring so sakey. Diad tua, imbaga na libron Disconnected ya no panon ya ombibiskeg iray muscle mo no mangaawit ka na saray ambelat, magmaliw ka met ya creative no usaren moy imahinasyon mo sano nabo-boring ka.

 Tandaan: Imbes ya ipasen mon problema no nabo-boring so anak mo, isip mon pankanawnawa itan pian natulongan mon magmaliw ya creative.

•   No posible, panggalaw mo ray ananak mo ed paway. Oniay imbaga nen Barbara ya abitla nen niman: “Makapaliket ta nayarin naekal na sinag na agew tan makaparepreskon dagem so pakaka-boring na sakey. No manggagalaw lad paway iray ananak mi, mas onggagana so imahinasyon da!”

   Prinsipyo na Biblia: “Walay panaon na amin a bengatla, . . . panaon na panelek [tan] panaon na panlukso-lukso.”—Eclesiastes 3:1, 4. paimanod leksab.

   Isipen pa: Anto ran pankanawnawa so iiter kod ananak ko pian mas mabetbet iran makapanggalaw ed paway? Balet, no agnayari manggalaw ed paway, anto ray nayarin galawen da ed loob na abung?

•   Tulongan mo ray ananak mon nonoten so arum. Oniay suhestion na sakey ya inan si Lillian: “Sarag yoy manbagot na dika odino manpanis ed sular na sakey ya maedad lan kaaro yo, odino ilutoan iray naakan tan ombisita ed sikara pian kumustaen ira. Talagan makapaliket so ontulong ed arum.”

   Prinsipyo na Biblia: “Say mabunlok a too et onaligwas, tan siopaman a paiinawaen toy arum et nainawaan met.”—Proverbio 11:25.

   Isipen pa: Panon mon natulongan iray ananak mo pian nalikna day liket ed itulong ed arum?

•   Magmaliw ya maong ya alimbawa. Walay epekto ed ananak mo na saray ibabagam nipaakar ed saray inagew-agew ya gagawaen mo. Oniay imbaga na sakey ya inan si Sara: “No ipalilikna tayod ananak tayo ya singa aliwan eksayting so bilay tayo, singa tayo ra babangatan ya na-boring. Balet no ipalikna tayon nai-enjoy tayo ray gagawaen tayo kada agew, naalig da tayo.”

   Prinsipyo na Biblia: “Samay maligligsa so puso to et naynay a manpipiesta.”—Proverbio 15:15.

   Isipen pa: Antoy narerengel ed siak na ananak ko nipaakar ed saray inagew-agew ya gagawaen ko? Antoy nanenengneng dan reaksion ko no singa nabo-boring ak la?

 Tip: Tulongan yo ray ananak yon manlista na saray eksayting ya nagawaan da. “Walay kahon mi ya ditan mi ikakarga iray suhestion na interon pamilya no anto ray balibalin gawaen mi,” so kuan na ina ya si Allison.