Tinmangay ed tawen si Maria Magdalena legan ton pupunasan iray lua to. Akapasak ed poste so inar-aro ton Katawan. Manga alas-12 na kaagwan ed saman “balet ta binmilunget ed interon dalin”! (Lucas 23:44, 45) Inapiger toy kolibemben to ed takeb to insan inmabay ed saray arum ya bibii. Taloy oras ya ambilunget kanian aliwa yan solar eclipse ta kaslakan et pigaran minuto labat itan. Nayarin arengel nen Maria tan saray arum nin akaalagey ed abay nen Jesus so ungol na saray ayayep ya kaslakan et diad labi labat narerengel. Wala ray ombabantay tan “ataktakot iran maong tan inkuan da: ‘Tua a saya so Anak na Dios.’” (Mateo 27:54) Nayarin inisip na saray papatumbok nen Jesus tan saray arum ya wadman ya ipapalikna nen Jehova so ermen tan pasnok to lapud maruksan impantrato ed Anak to.

Ngalngali agnasarag nen Maria Magdalena ya bantayan so paniirap nen Jesus, balet agto met labay ya taynanan. (Juan 19:25, 26) Seguradon agnipaliwawa so sakit ya nalilikna nen Jesus. Kaukolan met na ina nen Jesus so ligliwa tan suporta.

Dakdakel so ginawa nen Jesus parad si Maria, kanian akaparaan si Maria ya gawaen so antokaman parad sikato. Dati, miserable so bilay nen Maria tan abebbebay pakanengneng na totoo ed sikato, balet inuman nen Jesus itan. Pinagalangan toy Maria tan inikdan toy direksion so bilay to. Binmiskeg ya maong so pananisia to. Panon itan ya agawa? Tan antoy naaralan tayo natan ed pananisia to?

Diad Biblia, ginmapoy istorya nen Maria Magdalena ed sakey a marakdakep a regalo. Sikatoy imbulos nen Jesus ed singa bangungot ya situasyon to. Diad saman ya panaon, maksil so impluensya na demonyo, tan dakel ya totoo so aatakien na saratan a mauges ya espiritu, seselepan da ni ra ingen tan kokontrolen da ra. Agtayo amta no antoy eksakton agawa sanen sinelepan na saray demonyo so pakaskasin si Maria Magdalena; say amta tayo labat et sikatoy sinelepan na pitoran maruksa tan imoral iran demonyo. Maong labat ta pinapaway iran amin nen Jesu-Kristo!​—Lucas 8:2.

Bulos la tan nainawaan ya siansia si Maria, sarag lan igapo nen Maria so balon bilay to. Panon ton ipanengneng so pisasalamat to? Sikatoy nagmaliw ya matoor ya patumbok nen Jesus. Tinmulong met pian niiter iray nanenengneng ton pankaukolan na arum. Kaukolan nen Jesus tan saray apostol to so naakan, kawes, tan pasen ya panayaman no labi. Aliwa ran mayaman tan anggapoy sekular ya trabaho da ed saman. Pian makapampokus ira ed panagpulong tan panagbangat, kaukolan day materyal a tulong.

Tinmulong si Maria tan arum nin bibii pian nitarya iratan ya pankaukolan. Saratan ya bibii et “manlilingkor ed sikara diad panguusar day kayamanan da.” (Lucas 8:1, 3) Nayarin mayaman so arum ed saratan ya bibii. Anggapoy ibabaga na Biblia no kasin inlutoan, impesakan, odino inyuksoy da ray panayaman di Jesus ed saray nantutumbokan ya baryon nila da. Balet amta tayon labalabay dan suportaan iyan ombiabiahen grupo ya nayarin manbilang na manga 20. Seguradon akatulong so sagpot na sarayan bibii pian makapampokus si Jesus tan saray apostol to ed panagpulong a kimey. Siempre, amta nen Maria ya agton balot nabayaran so ginawa nen Jesus ed sikato​—balet talagan panliliketan ton gawaen so antokaman ya nayarian to!

Dakel natan so abebbebay pakanengneng da ed saramay akaparaan ya manggawa na mapaabeban kimey parad arum. Balet aliwan ontan so nalilikna na Dios. Isip mo pay liket To legan ya ontutulong si Maria tan gagawaen toy anggaay nayarian to pian suportaan si Jesus tan saray apostol to! Ontan met natan, dakel iray matoor a Kristiano ya maliket a manggagaway mapaabeba iran kimey parad arum. No maminsan, balbaleg so nagawaan na melag ya praktikal a tulong odino anggan say maabig iran salita. Talagan papablien nen Jehova iray ontan ya tulong.​—Proverbio 19:17; Hebreo 13:16.

Sakey si Maria Magdalena ed amayamay ya bibiin akila ed si Jesus diad Jerusalem parad Paskua nen 33 C.E. (Mateo 27:55, 56) Nen naamtaan ton inaresto tan nilitis si Jesus ed labi, seguradon abigla tan ataktakot. Insan mas linmoor ni balitan akasabid sikato. Senentensiaan nen Gobernador Poncio Pilato si Jesus na maruksan ipatey ed poste, lapud apilit na saray lider na Judion relihyon tan saray totoon walad kontrol da. Nayarin anengneng nen Maria so Katawan to ya mandatdala so laman to tan naknaksawan la legan ton manaakar ya sankasakbat so ambelat tan andukey ya poste ya pangipasakan ed sikato.​—Juan 19:6, 12, 15-17.

Diad pasen ya angipasakan ed si Jesus, nen binmilunget legan na kaagwan, akaalagey “diad asingger ed panamairapan a poste” si Maria Magdalena tan saray arum nin bibii. (Juan 19:25) Ag-inmalis diman si Maria kanian anengneng tan nadngel to ya inmatalek nen Jesus ed inar-aro ton apostol ya si Juan so pangasikaso ed ina to. Arengel to so inyeyag nen Jesus ed Ama to legan ya manpapairap. Tan arengel toy sampot ya imbaga nen Jesus antis ya inatey, “Asumpal la!” Ansakisakit lay pagew ton ombabantay. Balet mapatnag ya ag-inmalis diman anggan nen inatey lay Jesus. Insan nansiansia ni Maria diman ed abay na balon lubok ya anginan na mayaman a lakin taga Arimatea a manngaray Jose ed bangkay nen Jesus.​—Juan 19:30; Mateo 27:45, 46, 57-61.

Ipapanonot ed sikatayo na alimbawa nen Maria no antoy nayarin gawaen tayo no wala ray mairap ya subok ya dadalanen na saray kaagian tayo. Nayarin anggapoy pakayari tayon amperen so trahedya odino ekalen so paniirap na saray biktima. Balet sarag tayon ipanengneng so panangabagey tan pakpel. No walad mairap ya situasyon so sakey, anggan wala labat ed abay to so kaaro to et baleg ya tulong la. Pakapatnagan na malet a pananisia so matoor ya isuporta ed kaaron mankaukolan, tan talagan makapaligliwa itan.​—Proverbio 17:17.

Nen wala lad lubok so bangkay nen Jesus, kaibay Maria ed saramay bibii ya angaliw na kaaruman iran pampabalingit ya ipuyok da ed bangkay to. (Marcos 16:1, 2; Lucas 23:54-56) Insan nen asumpal lay Sabaton, asakbay ya binmangon ed kabuasan. Imadyin mo pay Maria ya manaakar a kaiba na arum nin bibii ed ambilunget nin karsada paonlad lubok nen Jesus. Legan iran walad dalan, iisipen da no panon da kasin itulin imay baton akasara ed puerta na lubok. (Mateo 28:1; Marcos 16:1-3) Balet tinmuloy ni ran siansia. Lapud pananisia ra et gawaen da no antoy nasarag da tan ipalima da la ed si Jehova so arum a bengatla.

Nayarin walad unaan si Maria kasabi rad lubok. Abigla kanian tinmunda. Nakal la imay bato, tan anggapoy karga na lubok! Batik lan tampol si Maria pian ibagad si Pedro tan Juan so anengneng to. Imadyin mo pay paningas to legan ton ibabaga: “Inala ray Katawan diad lubok, tan agmi amta no iner so anginan dad sikato”! Batik ed lubok si Pedro tan Juan tan nen aseguro dan anggapo diman so bangkay, anempet la ra. *​—Juan 20:1-10.

Kapawil nen Maria ed lubok, nansiansia diman ed paway ya bukbukor to. Asaksakbay ni ed kabuasan tan marendeen so lubok ya anggapoy karga, kanian agto la apokpokan so akis to. Agnin siansia makapanisia ya anggapo so Katawan kanian tinmakiling pian onnengneng ed loob na lubok, tan abiglan maong! Walay duaran anghel ya akaamputi ya akayurong diman! Tinepetan da: “Akin et onaakis ka?” Magulo ni isip to kanian inulit to labat may imbaga to ed saray apostol: “Inala ray Katawan ko, tan agko amta no iner so anginan dad sikato.”—Juan 20:11-13.

Linmingaw tan anengneng ton walay lakin akaalagey ed benegan to. Agto abidbir kanian say amta to aman may hardinero ya mangaasikaso ed saman ya lugar. Mauyamon tinepetan na satan a laki si Maria: “Akin et onaakis ka? Siopay aanapen mo?” Inmebat si Maria: “Katawan, no sikatoy inalam, ibagam ed siak no iner so anginan mod sikato, tan alaen ko.” (Juan 20:14, 15) Isipen pa may imbaga to. Sarag kasi na satan a bii ya alsaen tan alaen so bangkay nen Jesu-Kristo ya datin mabisbiskeg ya laki? Agla naisip iratan nen Maria. Basta say sankanonot to et kaukolan ton gawaen no antoy nayarian to.

No wala ray probleman singa agtayo la nasarag, nayari kasin aligen tayoy Maria Magdalena? No manpokus tayo labat ed saray kakapuyan tan limitasyon tayo, ompan nataktakot tan onkapuy ti lan maong kanian anggapo lay nagawaan tayo. Balet no determinado tayon gawaen so anggaan na nayarian tayo insan ipalima ti lay arum ed Dios, seguradon mas dakel so nagawaan tayo nen say iilaloan tayo. (2 Corinto 12:10; Filipos 4:13) Tan say sankaimportantian ed amin et napaliket tayoy Jehova. Seguradon agawaan itan nen Maria, tan sikatoy abendisyonan ed nikadkaduman paraan.

Samay lakin akaalagey ed benegan nen Maria et aliwan hardinero. Sikatoy datin karpentero, insan nagmaliw ya managbangat, tan inar-aron Katawan nen Maria. Balet agto abidbir kanian binmeneg lay Maria. Seguro agton balot naimadyin so agawa: Apaoli si Jesus bilang sakey a makapanyarin espiritu. Lapud satan, nampanengneng si Jesus ed si Maria bilang too balet aliwan samay laman ya insakripisyo to la. Diad saray sinmublay ya agew kayari inkioli nen Jesus, ag-abidbir na anggan saramay makankabat ya maong ed sikato.​—Lucas 24:13-16; Juan 21:4.

Panon ya impaamta nen Jesus ed si Maria ya sikato iman? Diad paraan na impangibaga toy salitan: “Maria!” Nilingaw nen Maria tan inyeyag toy sakey a pamilyar ya Hebreon salita ya mabetbet ton itatawag ed si Jesus​—“Rabboni!” Abidbir toy inar-aro ton Managbangat! Agaylay liket to! Pinmeket ed si Jesus tan agto labay so onikban.​—Juan 20:16.

Amta nen Jesus so iisipen nen Maria. “Agka ompepeket ed siak,” kuan to. Naimadyin tayoy mauyamon impangibaga to, ompan akaimis ni ingen, legan ton onlulukpos ed si Maria tan pinaseguroan to: “Agak ni sinmegep ed Ama.” Aliwa nin panaon pian onlad tawen si Jesus. Wala ni kaukolan ton gawaen ed dalin tan labay ton makatulong si Maria. Siempre madengedengel si Maria ed amin ya imbaga nen Jesus. “La kad saray agagik,” kuan nen Jesus, “tan ibagam ed sikaran, ‘Onsegep ak ed kawalaan nen Amak tan Ama yo tan Dios ko tan Dios yo.’”​—Juan 20:17.

Balibalin asainmin so inter ed sikato na Katawan! Sakey si Maria ed saray disipulo ya apribilehyoan ya unonan akanengneng ed si Jesus nen apaoli la, tan natan et naikdan na pribilehyo ya ibagad arum iyan maong a balita. Isipen pay liket tan seseg ton nananap ed saray arum ya disipulo. Seguro abet-abeten toy linawa to legan ton ibabaga iray salitan agnalinglingwanan: “Anengneng koy Katawan!” Insan to imbagad sikara so amin ya imbaga nen Jesus, diad liket to et mapmaples so panagsalita to. (Juan 20:18) Sinuportaan na imbaga to iray imbalita na arum a bibiin linmad lubok nen Jesus ya anggapo lad man so bangkay.​—Lucas 24:1-3, 10.

Antoy reaksion na saray lalaki? Aliwan marakep diad unaan. Oniay nabasa tayo: “Sarayan imbaga na bibii et impasen dan anggapoy kakanaan tan agda ra panisiaan.” (Lucas 24:11) Anggapoy mauges ya intension na saraman ya lalaki balet binmaleg ira ed kultura ya kaslakan et agpapanisiaan na totoo iray bibii; base ed rabinikon tradisyon, agnayarin mantestigo ed korte so sakey a bii. Nayarin agnaiimano na saray apostol ya maksil manaya so impluensya ed sikara na satan ya kultura. Balet anggapoy ontan ya panangidumaduma nen Jesus tan say Ama to. Marakdakep ya pribilehyo so inter da ed sarayan bibii!

Agsinmyodot si Maria ed reaksion na saray lalaki. Amta to ya baleg so talek na Katawan to ed sikato, tan kontento lad saman. Amin ya papatumbok nen Jesus et naikdan met na mensahe ya kaukolan dan ipasabid totoo. Say tawag na Biblia ed satan et “maong a balita na Panarian na Dios.” (Lucas 8:1) Anggapoy impromisa nen Jesus ed saray papatumbok to ya panisiaan ira na amin ya nakatongtong da odino apresyaen na arum so gagawaen da. Kabaliktaran ni ingen. (Juan 15:20, 21) Kanian maabig no tandaan na saray Kristiano so alimbawa nen Maria Magdalena. Anggano agtampol ya anisiaan na arum ya disipulo, agto inabuloyan ya nabawasan so liket to ya ibaga ed arum so maong a balita ya apaoli la si Jesus!

Asabi panaon, nampanengneng si Jesus ed saray apostol to insan diad arum nin papatumbok to. Aminsan et nampanengneng ed grupo na masulok ya 500 a disipulo! (1 Corinto 15:3-8) Seguradon lalon ombibiskeg so pananisia nen Maria kada no manpapanengneng si Jesus, balanglan anengneng ton mismo itan odino arengelan to labat. Ompan sakey si Maria Magdalena ed saramay bibiin kaiba ed samay pantitipon ed Jerusalem diad agew na Pentecostes sanen inkalbo so masanton espiritu ed saray atipon ya papatumbok nen Jesus.​—Gawa 1:14, 15; 2:1-4.

Balet say importante, magenap so rason pian makaseguro tayo ed saya: Nansiansian malet so pananisia nen Maria Magdalena anggad impatey to. Komon ta amin tayo et ontan met so determinado tayon gawaen! Naalig tayoy pananisia nen Maria Magdalena no apresyaen tayo so amin ya ginawa nen Jesus parad sikatayo tan mapaabeban lingkoran so arum legan tayon manmamatalek ed tulong na Dios.