“Ta say espiritun iiter ed sikatayo na Dios et agmamawala na takot, noagta mamawala na pakayari, aro, tan limpion kanonotan.”—2 Timoteo 1:7, Balon Mundo a Patalos.

 “Ta ag-itayo initdan na Dios na espiritu na katakotan; noag say pakayari tan say aro tan say maong a linawa.”—2 Timoteo 1:7, Say Biblia.

 Sarag na Dios ya tulongan so sakey ya too pian makpel ton gawaen no antoy duga. Aglabay na Dios ya nalikna na anggan siopa so “takot”—amay klase na takot ya pigilan toy sakey ya too ya gawaen iray bengatlan makapaliket ed Dios.

 Imanoen so taloran kualidad ya iiter na Dios ya abitla ed sayan bersikulo ya makatulong pian naekal so takot.

 “Pakayari.” Asarag na saray Kristiano so makpel ya manlingkor ed Dios anggano wala ray mapeligron kalaban tan situasyon ya inarap da. Ag-ira sinmener lapud takot. (2 Corinto 11:23-27) Panon dan agawaan itan? Oniay imbaga nen apostol Pablo: “Walay biskeg kon arapen so amin a bengatla lapud samay mangiiter ed siak na pakayari.” (Filipos 4:13) Sarag ya ikdan na Dios iray mandadayew ed sikato na pakayari ya “mas mabiskeg nen say pakayari na too” pian nasarag day anggan anton subok.—2 Corinto 4:7.

 “Aro.” No inar-aro na sakey ya Kristiano so Dios, makpel ton idepensa no antoy duga. Ontan met, no inaro na sakey ya Kristiano so kapara ton too, napakiwas ya iyuna toy pankaukolan da nen say pankaukolan to anggano napairap odino nipeligro lapud satan.—Juan 13:34; 15:13.

 “Limpion kanonotan.” Diad Biblia, nibagan walay limpion kanonotan na sakey ya Kristiano no walay abilidad ton manggaway dugan desisyon base ed Biblia. No limpio so kanonotan na sakey ya too malinew tan makatunongan nin siansia so panag-isip to anggano walad mairap iran situasyon. Napatnagan ed saray desisyon to so kanonotan na Dios, ta amta ton mas importante so relasyon to ed Dios nen say ibaga na arum.

 Say libro na Biblia ya Komaduan Timoteo et sakey ya sulat nen apostol Pablo ed pinablin kaaro tan kakimeyan to ya si Timoteo. Diad sayan sulat, maaron pinaseseg nen Pablo so mas ugaw ya lakin si Timoteo pian itultuloy toy mankuli ed ministeryo. (2 Timoteo 1:1, 2) Ompan medyo nababaingan si Timoteo kanian agto niiter so sankaabigan to diad Kristianon kongregasyon. (1 Timoteo 4:12) Balet impanonot nen Pablo ed si Timoteo imay regalon naawat to, say espisyal ya asainmin to ya manlingkor ed kongregasyon. Pinaseseg toy Timoteo ya agmanaalangan ya usaren so autoridad to sano ipupulong toy maong a balita tan no walay itetepel ton irap lapud pananisia to.—2 Timoteo 1:6-8.

 Anggaman sarayan salita et parad si Timoteo, papaseguroan met na saratan so amin ya malabay ya manlingkor ed Dios natan ya iter na Dios so tulong ya kaukolan da pian makapanlingkor ira ed sikato antokaman so subok ya arapen da.