“Imbaga to lad sika, O too, no antoy maabig. Tan anto so kakaukolanen nen Jehova ed sika? Say pangipatnag mo labat na inkahustisya, pangarom ed katooran, tan say mapaabeban panakar mo a kaibay Dios mo!”—Miqueas 6:8, Balon Mundo a Patalos.

 “Inpatnag to ed sika, O too, so maong: et anto ta so kaukolan nen Jehova ed sika, noag say manggawa lambengat na inkatunong, tan mangaro na kaabigay linawa, tan manakar a mauy-uyamo ed Dios mo?”—Miqueas 6:8, Say Biblia.

 Impaliwawa nen propetan Miqueas ya sarag na totoo ya paliketen si Jehova a a Dios. (1 Juan 5:3) Nabasa ed sayan bersikulo no panon tayon nagawaan itan diad taloran paraan. Say unonan duara et nipaakar ed panagtrato tayo ed arum ya totoo, tan say komatlo et nipaakar ed relasyon tayod Dios.

 ‘Ipatnag moy inkahustisya.’ Labay na Dios ya patas so pantrato na saray manlilingkor ed sikato ed kapara dan too. Labay ton ibaga et kaukolan ya say panagnonot tan kakikiwas da et base ed estandarte na Dios ed no antoy duga tan aliwa. (Deuteronomio 32:4) Singa bilang, saramay manguunor ed estandarte na Dios et gagawaen day anggaay nayarian dan tratoen so amin ya totoo diad paraan ya matua tan patas, antokaman so apalabas, lahi, odino panagbilay da.—Levitico 19:15; Isaias 1:17; Hebreo 13:18.

 ‘Arom so katooran.’ Nayari met iyan ipatalos bilang ‘arom so matoor a panangaro.’ (Miqueas 6:8, paimanod leksab) Diad orihinal ya Hebreo, ipapanengneng na salitan “katooran” ya kaukolan ya agti labat manmatoor ed sakey a too noagta ipanengneng tayo met so kaabigan tan panangasi ed sikato tan gawaen tayoy mas ni nen say kaukolan tayon gawaen. Pian napaliket tayoy Dios, agti labat ipanengneng so kaabigan tan panangasi noagta kaukolan tayo met ya pablien iratan ya kualidad. Labay ton ibaga, dapat maliket tayon ontulong ed arum, lalo lad saramay mankaukolan. Ta no mangiiter tayo maliket tayo.​—Gawa 20:35.

 ‘Mapaabeban manakar a kaibay Dios mo.’ Diad Biblia, say labay ya ibaga na “manakar” et “unoren so sakey ya paraan na kabibilay.” Say sakey ya toon manaakar ya kaibay Dios et gagawaen to no antoy makapaliket ed Dios. Say sakey ya alimbawa et si Noe ta “nanakar a kaiba na tuan Dios.” Tan “sikatoy andiay pakabalawan no ikomparad saray kapanaonan to.” (Genesis 6:9) Natan, nibagan ‘manaakar tayo ya kaibay Dios’ no uunoren tayo ray bangat to ya walad Salita to, say Biblia. Pian nagawaan tayo itan, kaukolan tayon awaten iray limitasyon tayo tan bidbiren tayo ya kaukolan tayoy tulong na Dios ed amin ya bengatla.​—Juan 17:3; Gawa 17:28; Apocalipsis 4:11.

 Si Miqueas et sakey ya propeta ed Israel nen 777-717 B.C.E. Diad saman, dakdakel so mandadayew ed saray idolo tan dakel met so mansasaol tan manpapairap ed saray kapara dan too. (Miqueas 1:7; 3:1-3, 9-11; 6:10-12) Ibabaliwala na maslak ya Israelita iray ibabaga na Dios ya abitla ed Ganggan ya inter tod si Moises, say tatawagen ya Mosaikon Ganggan. Ontan met, iisipen na dakel ya napaliket day Dios basta gawaen da ray relihyoson ritual tan mangiyapay ira na saray bagat.—Proverbio 21:3; Oseas 6:6; Miqueas 6:6, 7.

 Nilasus taon kayari na panaon nen Miqueas, binitla met nen Jesus ya naliliketan so Ama to ed saramay mangipapanengneng na panangaro, inkahustisya, tan panangasi. Balet aglabay na Dios iramay mankunkunwarin mandadayew ed sikato pian labat ompaway ya makadios ira. (Mateo 9:13; 22:37-39; 23:23) Makatulong iray imbaga nen Jesus pian naamtaan tayo no antoy labay na Dios ya gawaen na saray mandadayew ed sikato natan.

 Bantayan iyan antikey ya video pian nawalaan kay ideya ed libro na Miqueas.