“Punasen to so amin a lua ed kamataan da, tan anggapo lay patey, anggapo met lay panermen tan panakis tan panotot. Saray datin bengatla et linmabas la.”​—Apocalipsis 21:4, Balon Mundo a Patalos.

 “Punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.”​—Apocalipsis 21:4, Say Biblia.

 Im-promise na Dios ya aliwan say panotot tan paniirap labat so ekalen to noagta pati say amin ya panlalapuan na saratan.

 “Punasen to so amin a lua ed kamataan da.” Pareho iya ed samay im-promise nen Jehova a ya insulat nen propeta Isaias ya ‘punasen to iray lua ed amin a kalupaan.’ (Isaias 25:8; Apocalipsis 7:17) Ipapanengneng na saya ya imamalasakit na Dios iramay agda napigilay akis da lapud inateyan ira na kapamilya, kakaaro, odino walay dadalanen dan arum nin problema.

 “Anggapo lay patey.” Nayari met itan ya ipatalos ya “anggapo lan balot so ompatey.” Im-promise na Dios ya ekalen toy patey tan amin ya aliwliwan resulta na satan. Pero aliwan satan labat, paolien to met iray inaatey. (1 Corinto 15:21, 22) Kanian sirin, “say patey, et paandien.”​—1 Corinto 15:26.

 “Anggapo met lay panermen tan panakis tan panotot.” Aglabay ya ibaga na satan ya magmaliw lan manhid iray totoo ya agla ran balot makaliknay sakit, anggano ipeligro day laman da odino ag-ira manalwar. Imbes, ipapanengneng na sayan promise ya ekalen na Dios so amin ya sakit ed emosyon, isip, tan laman tayo ya resulta na kasalanan b tan magmaliw tayo lan perpekto.​—Roma 8:21, 22.

 “Saray datin bengatla et linmabas la.” Ipapaimano na sarayan salita so balbaleg ya pananguman ya naeksperiensya na saray totoo. Oniay imbaga na sakey ya reperensya: “Parte na bilay na too natan so patey, panermen, pannangis, tan paniirap. Balet diad arapen, aliwa lan ontan so situasyon tayo.” Na-enjoy la na totoo so manbilay na andi-anggaan diad dalin. Di ba ontan ya talaga so labay na Dios ya pambilay na too?​—Genesis 1:27, 28.

 Diad gapo na kapitulo 21, in-describe nen apostol Juan so anengneng to ed sakey ya pasingawey: “Anengneng koy sakey a balon tawen tan sakey a balon dalin.” (Apocalipsis 21:1) Diad satan, angusar si Juan na simbolo pian ipaliwawa so nagawan abalbaleg ya pananguman ya abitla met ed arum nin bersikulo ed Biblia. (Isaias 65:17; 66:22; 2 Pedro 3:13) Salatan na “balon tawen” odino gobierno na Dios so amin ya gobierno na totoo, tan uleyan na satan so “balon dalin” odino amin ya totoon malabay ya manpasakop ed uley na Dios.​—Isaias 65:21-23.

 Panon tayon amta ya say tutukoyen na sayan pasingawey et say pambilay tayo diad dalin? Unona, diad gapo na promise na Dios et oniay nabasa: “Say tolda na Dios et walad katooan.” (Apocalipsis 21:3) Mapatnag sirin ya sayan promise et aliwan parad saray anghel ed tawen noagta parad saray totoo diad dalin. Komadua, abitla ed sayan pasingawey ya “anggapo lay patey.” (Apocalipsis 21:4) Di ba anggapoy patey ed tawen? Pero diad dalin, ompapatey iray totoo. (Roma 5:14) Kanian duga labat sirin ya isipen tayon sayan bersikulo et ontutukoy ed magmaliw ya bilay diad dalin.

 Bantayan iyan antikey ya video pian nawalaan kay ideya ed libro na Apocalipsis.