“Amin a bengatla et ginawa ton balibali ed panaon da. Inyan to ni ingen so andi-anggaan ed puso ra; balet agbalot natalosan na totoo so kimey na tuan Dios manlapud gapo ya anggad sampot.”—Eclesiastes 3:11, Balon Mundo a Patalos.

 “Ginawa to so balang bengatla a marakep ed panaon to: ontan met, inpasen to so kaandoan ed puso ra, anggan ontan say too agto natontonan so gawa a ginawa na Dios a manlapu ed gapo angga ed sampot.”—Eclesiastes 3:11, Say Biblia.

 “Amin a bengatla et ginawa ton balibali ed panaon da.” Say Hebreon salita ya impatalos dia ya “balibali” et aglabat ontutukoy ed bengatlan marakdakep ya nengnengen. Nayari met iyan ipatalos bilang “mauk-uksoy,” “manepeg,” odino “matukoy.” (Eclesiastes 3:11, paimanod leksab) Saray balibalin kimey na Dios et aglabat ontutukoy ed amin ya bengatlan pinalsa to noagta kaiba met so amin ya gagawaen to pian nasumpal so gagala to.​—Daniel 2:21; 2 Pedro 3:8; Apocalipsis 4:11.

 “Inyan to ni ingen so andi-anggaan ed puso ra.” Pinalsa na Dios iray totoo pian manbilay ya anggapoy anggaan. (Salmo 37:29) Kanian duga labat ya inyan to met ed puso na totoo ya labalabay day manbilay ya anggapoy anggaan. Balet ag-inunor na unonan sanasawa, ya si Adan tan Eva, so Dios kanian inatey ira tan ompapatey met iray ananak da. (Genesis 3:17-19; Roma 5:12) Anggaman ontan, impromisa na Dios ya ‘peneken toy pirawat na balang mabilay a bengatla,’ kaiba lay pampirawat o panlabay na too ya manbilay ya anggapoy anggaan. (Salmo 145:16) Ipapaliwawa na Biblia no antoy ginawa na Dios pian posible lamet ya manbilay ya anggapoy anggaan iray totoo.—Roma 6:23.

 “Agbalot natalosan na totoo so kimey na tuan Dios manlapud gapo ya anggad sampot.” Agaylay kaaralem tan kalaknab na karunongan na Dios kanian ‘ag-itan natonton’ so kuan na Biblia. (Roma 11:33) Balet labay na Dios ya ipaamta iray gagala to ed saray malabay ya mandayew ed sikato.—Amos 3:7.

 Say libron Eclesiastes et insulat nensaman nen Arin Solomon na Israel, sakey a toon kabkabat lapud karunongan ya inter na Dios ed sikato. Nabasa ditan iray praktikal ya bilin nipaakar ed no anton talagay importante ed bilay tan no anto ray bengatlan andi-kakanaan. (Eclesiastes 1:2, 3; 2:1, 17; 7:1; 12:1, 13) Diad kapitulo 3, deniskribe nen Solomon iray pigara ed saray tuloytuloy ya siklo ya maslak ya nagagawad bilay na too. Abitla ditan iray nanduruman aktibidad odino kimey na too. (Eclesiastes 3:1-8, 10) Inikdan na Dios iray totoo na kalayaan ya manpili no anto ran aktibidad odino kimey so gawaen da tan no kapigan da gawaen iratan. (Deuteronomio 30:19, 20; Josue 24:15) Impaliwawa nen Solomon ya na-enjoy labat na totoo iray resulta na pansasagpot da no mikoopera ira ed gagala na Dios tan ikonsidera day “panaon” ya inggeter to. Tinawag itan nen Solomon ya “regalo na Dios.”—Eclesiastes 3:1, 12, 13.

 Bantayan iyan antikey ya video pian nawalaan kay ideya ed libro na Eclesiastes.