“Balet makaawat kayo na pakayari sano onsabi ed sikayo so masanton espiritu, tan mantasi kayo nipaakar ed siak diad Jerusalem, diad interon Judea tan Samaria, tan diad sankaarawian a pasen na dalin.”—Gawa 1:8, Balon Mundo a Patalos.

 “Balet mangawat kayo na pakayari, no onsabi ed sikayo so espiritu santo: et sikayo so tasik ed Jerusalem, tan ed amin a Judea tan Samaria, tan angga ed kasampotan na dalin.”—Gawa 1:8, Say Biblia.

 Insipan nen Jesus ed saray papatumbok to ya tulongan ira na masanton espiritu na Dios pian nagawaan day ministeryo da anggan diad sankaarawian a pasen na mundo.

 “Makaawat kayo na pakayari sano onsabi ed sikayo so masanton espiritu.” Impaseguro lamet nen Jesus ed saray disipulo to ya makaawat iray masanton espiritu a na Dios kapawil tod tawen. (Juan 14:16, 26) Kayari samploran agew manlapud impawil tod tawen nen 33 C.E., agawa imay insipan to—akaawat iray papatumbok to na masanton espiritu. (Gawa 2:1-4) Lapud tulong na masanton espiritu na Dios, akapansalita ira na nanduruman lenguahe, akapanggawa ray milagro, tan makpel dan nipulong so tungkol ed si Jesus.—Gawa 3:1-8; 4:33; 6:8-10; 14:3, 8-10.

 “Mantasi kayo nipaakar ed siak.” Say labay ya ibaga na salitan impatalos ya “mantasi” et “mantestigo” odino “pruebaan so sakey ya bengatla” base ed anengneng o naeksperiensya. Lapud akaiba na saray apostol si Jesus, sarag dan tasian odino pruebaan iray agawgawa legan na ministeryo to, nen sikatoy inatey, tan nen apaoli. (Gawa 2:32; 3:15; 5:32; 10:39) Talagan agnakuestion so imbaga da tungkol ed si Jesus, kanian dakel so anisia ya sikato so Kristo, say insipan ya Mesias. (Gawa 2:32-36, 41) Saramay anisia et tinasian da so tungkol ed si Jesus, tan apakiwas iran ipulong ed arum no akin ya importante so impanbilay, impatey, tan inkioli to.—Gawa 17:2, 3; 18:5.

 “Diad sankaarawian a pasen na dalin.” Sayan balikas et sarag met ya ipatalos ya “diad saray sampot na dalin” odino “diad arum iran bansa.” Nanengneng ed satan ya imbaga nen Jesus no panon kalawak so kimeyan na saray papatumbok to. Aliwan diad Judea tan Samaria labat so kaukolan dan pulongan. Diad tua, mas maawang so teritorya da tan mas dakel ya totoo so napulongan da kompara ed si Jesus. (Mateo 28:19; Juan 14:12) Kayari labat na ngalngali 30 ya taon manlapu nen imbaga iratan nen Jesus, insulat nen apostol Pablo ya say maong a balita tungkol ed sikato et “nipulong [la] ed amin a pinalsa diad silong na tawen,” anggan diad saray ararawin lugar, singa say Roma, Partia (southeast na Caspian Sea), tan North Africa.—Colosas 1:23; Gawa 2:5, 9-11.

 Nabasad gapo na Gawa iray salaysay ya akarekord ed sampot ya kapitulo na Ebanghelyo nen Lucas. (Lucas 24:44-49; Gawa 1:4, 5) Inggapo nen Lucas so libro na Gawa diad impangisalaysay to ed eksena nen nampanengneng si Jesus ed saray papatumbok to kayari na inkioli to. (Gawa 1:1-3) Insan to insulat no panon ya ginmapo so Kristianon kongregasyon tan no panon itan ya inmaligwas legan na 33 C.E. anggad manga 61 C.E.—Gawa 11:26.

 Nabasa ed konteksto na Gawa 1:8 ya interesado iray papatumbok nen Jesus ya naamtaan no kasin diad panaon da so igapon panuley nen Jesus bilang Ari diad Panarian na Dios. (Gawa 1:6) Balet imbaga nen Jesus ed sikara ya agda nepeg ya sobran pampagaan so eksakton panaon na isabi na Panarian. (Gawa 1:7) Imbes, say pampokusan da et no panon dan tasian odino ipulong so tungkol ed si Jesus “diad sankaarawian a pasen na dalin.” (Gawa 1:8) Ontan met so gagawaen na saray Kristiano natan, makulikuli dan ipupulong so maong a balita tungkol ed Panarian na Dios.—Mateo 24:14.

 Bantayan iyan antikey ya video pian nawalaan kay ideya ed libro na Gawa.