“Insan inkuan na Dios: ‘Mamalsa ta na too unong ed indengan ta, a miulibay ed sikata, tan uleyan da iray sira ed dayat tan saray ontitikyab a pinalsa ed tawen tan saray maamon ayayep tan say interon dalin tan arum nin onkukurong ya ayayep ed dalin.’”—Genesis 1:26, Balon Mundo a Patalos.

 “Insan inkuan na Dios, Manggawa itayo na too a kaulibay na inalageyan tayo, a singa say impanuulibay tayo. Tan iter ed sikara so pakauley ed saray dayat, tan pakauley ed saray manok ya atap na dagem, tan pakauley ed ayayep ya amo, tan pakauley ed amin a dalin, tan pakauley ed amin a bengatla a korongkorong ed dalin.”—Genesis 1:26, Say Biblia.

 Pinalsa so too unong ed indengan na Dios, labay ya ibaga et sarag ton aligen tan ipanengneng iray kualidad na Dios, singa say aro, empatya, tan hustisya. Atan so rason no akin ya sarag na too ya aligen so personalidad na Dios.

 “Inkuan na Dios: ‘Mamalsa ta na too unong ed indengan ta.’” Antis ya ginawa nen Jehova a Dios a so too tan arum nin bengatla, pinalsa to ni so makapanyarin anghel ya tinawag ya Jesus. Panamegley nen Jesus, “apalsa so amin ni ran bengatlan walad tawen tan walad dalin.” (Colosas 1:16) Inalig nen Jesus so personalidad nen Jehova—“sikato so kaulibay na agnanengneng a Dios.” (Colosas 1:15) Dugaruga labat sirin ya ibaga na Dios ed si Jesus: “Mamalsa ta na too unong ed indengan ta.”

 “Uleyan da iray . . . maamon ayayep tan say interon dalin.” Agpinalsa iray ayayep unong ed indengan na Dios. Ag-ira ginawa ya walaan na saray kualidad na totoo, singa bilang agda sarag ya ipanengneng so panangaro, tan anggapoy konsiensia ra. Balet siansian aasikasoen na Dios iray pinalsa ton ayep. Atan so rason no akin ya imbaga ton “uleyan” na totoo iray ayayep. Kanian sirin, inikdan nen Jehova na responsabilidad iray totoo ya asikasoen iray ayayep. (Salmo 8:6-8; Proverbio 12:10) Iilaloan nen Jehova ya asikasoen ya maong na totoo so dalin tan amin ya mabilay a pinalsa ya wadtan.

 Nabasa tayo diad unonan duaran kapitulo na Genesis so impamalsa ed uniberso, say planeta tayo, tan amin ya mabilay a pinalsa diad dalin. Balibalin amin so pinalsa nen Jehova, balet say makapadinayew ed amin ya pinalsa tod dalin et saray totoo. Kayari na impamalsa to, “anengneng na Dios so amin a pinalsa to, tan agaylay abig iya.”—Genesis 1:31.

 Bantayan iyan antikey ya video pian naaruman ni antam nipaakar ed impamalsa ya nabasa ed libro na Genesis.

 Lingon pakatalos: Prupruebaan na Genesis 1:26 ya si Jesus so Dios.

 No antoy tua: Maap-apit so relasyon na Dios tan si Jesus ta sanama ira, balet aliwa ran saksakey ya persona. Imbangat nen Jesus ed saray totoo ya mas baleg so Dios nen say sikato. (Juan 14:28) Pian naaruman ni antam, bantayan so video ya Kasin si Jesu-Kristo so Dios? odino basaen so artikulon “Akin et Tinawag ya Anak na Dios si Jesus?”

 Bantayan iyan antikey ya video pian nawalaan kay ideya ed libro na Genesis.