“Balet ombiskeg iramay maniilalo ed si Jehova. Ontikyab iran singa walaay payak na agila. Ombatik ira tan ag-ira onkapuy; manakar ira tan ag-ira nakesawan.”—Isaias 40:31, Balon Mundo a Patalos.

 “Balet saray manalagar ed Jehova pasimbaloen to so biskeg da; mamaatagey ira naani ya akapayak a singa say agila; ombatik ira naani, tan ag-ira nakesawan; manakar ira naani, tan ag-ira onkapuy.”—Isaias 40:31, Say Biblia.

 Papaseguroan nen Jehova a a Dios iray mandadayew ed sikato ya ikdan to ray biskeg ya kaukolan da pian nasarag odino naanosan da so antokaman ya problema ya onsabi ed sikara.

 “Ombiskeg iramay maniilalo ed si Jehova.” Saramay maniilalo o matalek ya sarag tan labay na Dios ya tulongan iray lingkor to et makaseguro ira ya talagan suportaan to ra. (Proverbio 3:5, 6) Say sakey ya paraan ya papabiskegen to iray mandadayew ed sikato et panamegley na masanton espiritu to, odino aktibon puersa to.—Lucas 11:13.

 “Ontikyab iran singa walaay payak na agila.” Iyiilustra na satan so epekto na pakayari na Dios ed sakey ya too. No ontitikyab so sakey ya agila, mandedepende itan ed ampetang ya dagem ya ontatagey, say tawag ed satan et thermal. Ibuskag toy payak to tan ditan manliberliber kanian milan ontagey lan ontagey. Onalis-alis so agila ed nanduruman thermal kanian nasarag toy ontikyab ya anggan pigay oras, tan daiset labat ya biskeg so nausar to anggad makasabi ed laen to.

 “Ombatik ira tan ag-ira onkapuy.” Nayarin onkapuy itayo ed pisikal tan emosyonal lapud saray problema, pero nasarag tayo iratan lapud biskeg ya iiter na Dios. Atan so mamapabiskeg ed sikatayo ya gawaen so duga anggano mairap so situasyon tayo. Dinmalan met ed nanduruman subok si apostol Pablo tan oniay insulat to: “Walay biskeg kon arapen so amin a bengatla lapud samay mangiiter ed siak na pakayari.”—Filipos 4:13.

 Impaisulat na Dios irayan salita ed si propetan Isaias nen komawalon siglo B.C.E. Sayan bersikulo et parad amin ya matoor ya lingkor na Dios, pero nayarin imbaga iratan nen Jehova pian pasesegen iray Judio ya nakaiba ed saray awiten ed Babilonia na 70 taon. Nen nibulos iray Judio tan akapawil la ra ed dalin da, anengneng da ya talagan asumpal itan ya imbaga na Dios. (Isaias 40:1-3) Inikdan ira na Dios na biskeg pian nasarag da imay andukdukey tan mair-irap ya biahe b manlapud Babilonia anggad Jerusalem nen 537 B.C.E.—Isaias 40:29.