“Anggapo lay walaan na mas baleg a panangaro nen saya, a say sakey et iter toy bilay to parad kakaaro to.”—Juan 15:13, Balon Mundo a Patalos.

 “Andian so too na babaleg ya aro nen saya, a sakey a too italaga to so bilay to nipaakar ed saray kakaaro to.”—Juan 15:13, Say Biblia.

 Tutulongan nen Jesus iray papatumbok to ya natalosan ya nepeg ya say panangaro ra et mabisbiskeg ya anggad punton akaparaan iran ompatey parad sakey tan sakey.

 Antis na satan, imbaga nen Jesus ed saray apostol to: “Iganggan ta kayo a manaaroan kayo a singa ed impangarok ed sikayo.” (Juan 15:12) Anton klase na panangaro so impanengneng nen Jesus ed sikara? Aliwan makasarili, noagta masakripisyon panangaro. Legan na ministeryo to diad dalin, inyuna to ray pankaukolan tan panlabayan na saray papatumbok to tan na arum ya totoo nen say sarili to. Pinaabig to ray mansasakit tan imbangat tod sikara so nipaakar ed Panarian na Dios. a Ginawa to ni ingen iray ipapasen ya abeban kimey pian natulongan so arum. (Mateo 9:35; Lucas 22:27; Juan 13:3-5) Balet diad Juan 15:13, say tutukoyen nen Jesus et mas baleg ya panangipanengneng na panangaro. Diad tua, pigay oras labat kayari ton imbaga iratan ya salita et impanengneng to itan ya klase na panangaro nen mabulbulos ton inter so “bilay to a panondon ed amayamay.” (Mateo 20:28; 22:39) Makapadinayew iman ya ginawa to pian nipanengneng to ya mas inaro toy arum nen say sarili to.

 Inar-aro nen Jesus iray totoo. Balet mas lalo la iramay onuunor ed saray bangat to. Ituturing ton maapit ya kakaaro iray disipulo to lapud uunoren da iray instruksion to tan nansiansia rad sikato diad saray subok ya dinalan to. (Lucas 22:28; Juan 15:14, 15) Sakey ni itan ya rason pian isakripisyo toy bilay to parad sikara.

 Impapuso na saray Kristiano nen unonan siglo iray imbaga nen Jesus, tan akaparaan iran ompatey parad sakey tan sakey. (1 Juan 3:16) Talagan nagmaliw ya manunan pakapatnagan na saray tuan Kristiano so agmakasarilin aro, atan may aro ya impanengneng nen Jesus.—Juan 13:34, 35.

 Nabasa ed Kapitulo 13 anggad 17 na Ebanghelyo nen Juan iray bilin nen Jesus parad 11 ya matoor ya apostol to antis ya ompatey tan say sampot ya pikakasi to ya kaiba ira. Pigaran oras kayari to ’tan et inatey la. Diad kapitulo 15, inkompara to ray disipulo to ed saray sanga na ubas pian iyilustra ya kaukolan day mansiansia ed impikasakey da ed sikato pian napruebaan dan papatumbok to ra. Pinaseseg to ra ya ‘mantultuloy ya manbunga na dakel.’ (Juan 15:1-5, 8) Say sakey a paraan ya nagawaan da itan et no ipanengneng day masakripisyon aro ed arum, kaibad satan so pangipulong ed mensahe ya impulong nen Jesus, say “maong a balita na Panarian na Dios.”—Lucas 4:43; Juan 15:10, 17.

 Bantayan iyan antikey ya video pian nawalaan kay ideya ed libro na Juan.