“Imbagak iraya ed sikayo pian nawalaan kayoy kareenan ed panamegley ko. Diad mundo et manirap kayo, balet manpakpel kayo! Tinalok so mundo.”—Juan 16:33, Balon Mundo a Patalos.

 “Imbagak yad sikayo, pian nawalaan kayoy kareenan diad pikasakey yod siak. Manirap kayo diad mundo, balet pabiskeg yoy linawa yo! Tinalok lay sankamundoan!”—Juan 16:33, Maung a Balita.

 Diad sarayan imbaga nen Jesus, papaseguroan to iray papatumbok to ya sarag da met ya napaliket so Dios anggano wala ray arapen dan subok tan walay onkontra ed sikara.

 “Imbagak iraya ed sikayo pian nawalaan kayoy kareenan ed panamegley ko a.” Ipapanengneng na arum ya kabiangan na sayan bersikulo ya no wala yan kareenan, agto labay ya ibagan anggapo lay gulo o panamasegsegang. Imbes, no wala itan, mareen so puso tan isip. Posible ya nalikna iyan kareenan ed “panamegley” nen Jesus ta imbaga to ya naikdan na masanton espiritu iray papatumbok to. Sayan makapanyarin “mananulong” so ontulong ed saray papatumbok nen Jesus ya nasarag so anggan anton mairap ya situasyon ya arapen da.—Juan 14:16, 26, 27.

 “Diad mundo et manirap kayo, balet manpakpel kayo!” Prangkan imbaga nen Jesus ed saray disipulo to ya wala ray subok ya arapen da. Singa bilang, aliwan patas so pantrato na totoo ed sikara tan pasegsegangen da ra. (Mateo 24:9; 2 Timoteo 3:12) Balet walay rason dan “manpakpel” odino ‘pabiskegen so linawa da.’—Juan 16:33, Maung a Balita.

 “Tinalok so mundo.” Say tutukoyen dia na salitan “mundo” et saray agmatunong ya totoo ya anggapoy maong ya relasyon da ed Dios. b Ibabaga na 1 Juan 5:19: “Say interon mundo et walad pakayari na samay mauges,” odino si Satanas. Kanian agnaliliketan so Dios ed panagnonot tan kagagawa na saray totoo ed sayan “mundo.”—1 Juan 2:15-17.

 Sinali nen Satanas tan say mundo to ya amperen si Jesus ed panggawa toy linawa na Dios. Singa say impanbangat nen Jesus ed arum nipaakar ed Dios tan say impangiter toy perpekton bilay to bilang dondon. (Mateo 20:28; Lucas 4:13; Juan 18:37) Balet agpinaulyanan nen Jesus ya naimpluensyaan na mundo so panagnonot to tan satan so mangiyarawi ed sikato ed Dios. Nansiansian matoor si Jesus ya anggad patey. Kanian nibaga nen Jesus ya “tinalo toy mundo” tan ag-ayarian ya kontrolen nen Satanas, “say manuley na mundo.”—Juan 14:30.

 Inusar nen Jesus so mismon alimbawa to pian ipanengneng ed saray papatumbok to ya sarag da met so manmatoor ed Dios anggano nasubok so katooran da. Singa ibabaga nen Jesus ya: “Tinalok so mundo kanian sarag yo met ya taloen.”

 Imbaga nen Jesus irayan salita diad samay labi antis na impatey to. Inusar to iyan pankanawnawa pian bilinen iray matoor ya apostol to ta amta ton asingger lan ompatey. Wala met iray imbaga ton kaukolan dan seryoson pannonotan: Agda la nanengneng si Jesus tan napasegsegang ira odino wala ni ingey mamatey ed sikara. (Juan 15:20; 16:2, 10) Nayarin nataktakot iray apostol ed satan, kanian imbaga nen Jesus imay nabasa ed Juan 16:33 pian pabiskegen tan pasesegen ira.

 Napaseseg met iray papatumbok nen Jesus natan ed saray imbaga tan ginawa to. Sarag na amin ya Kristiano so mansiansian matoor ed Dios anggano wala ray subok.