“Ta anggapoy imbaga na Dios ya agto nayarian a sumpalen.”​—Lucas 1:37; paimanod leksab, Balon Mundo a Patalos.

 “Anggapoy agnagawaan na Dios.”​—Lucas 1:37, Maung a Balita.

 Sarasarag na Makapanyarin-amin a Dios ya gawaen so bengatlan imposible odino agnagawaan na too. Anggapoy makapigil ed sikato ya sumpalen iray imbaga odino insipan to.

 Say Griegon salitan impatalos ya “imbaga” et nayarin ontutukoy met ed “salita” ya nanlapu ed Dios. Nayarin ontutukoy met itan ed saray resulta na imbaga nen Jehova. a Lapud lanang ya nasusumpal iray salita na Dios, nayari met ya ipatalos so Lucas 1:37 ya “Saray sipan na Dios et agbalot ompalpak” odino “Anggapoy imposible ed Dios.” Onia sirin so malinew ya kabaliksan na sayan Griegon teksto: Amin ya imbaga odino insipan na Dios et nagawan-nagawa, lapud anggapoy imposible ed sikato.​—Isaias 55:10, 11.

 Wala ray sipan na Dios ed Biblia ya nausar met iratan ya termino odino balikas. Singa bilang, imbaga nen Jehova ed si Abraham panamegley na sakey ya anghel ya manlukon so akulaw la tan agmakaanak ya asawa ton si Sara. Onia ni impaibaga na Dios ed si Abraham: “Wala tay antokaman ya imposible ed si Jehova?” (Genesis 18:13, 14) Nen dinalepdep na patriarkan si Job iray palsa na Dios, oniay atalosan to: “Anggapo so nononoten mon gawaen ya agmo nagawaan.” (Job 42:2) Nen agmakapanisia iray papatumbok nen Jesus ya kaya dan aboten iray kualipikasyon na Dios pian niligtas ira, impanonot nen Jesus ed sikara ya “diad Dios et posible so amin a bengatla.”​—Mateo 19:25, 26. b

 Amay nabasa ed Lucas 1:37 et mensahe nen anghel Gabriel ed Judion birhen ya si Maria. Kakkayari ton imbaga ed si Maria ya ilukon toy “Anak na Sankatagyan” tan sikatoy “ngaranan [to] na Jesus.” Sikatoy magmaliw ya Ari ed Panarian na Dios, tan manuley ya andi-anggaan.​—Lucas 1:26-33; Apocalipsis 11:15.

 Agmakapanisia si Maria ta agni nankasal tan ‘agnin balot akiakdol ed laki.’ (Lucas 1:34, 35) Imbaga nen anghel Gabriel ya usaren na Dios so masanton espiritu, odino aktibon puersa To. Diad saman et wala nid tawen si Jesus tan sakey ya espiritu. Kanian inusar nen Jehova so masanton espiritu to pian iyalis so bilay na Anak tod tawen diad panag-anakan nen Maria. (Juan 1:14; Filipos 2:5-7) Lapud satan, sikatoy mamilagron nanlukon. Akatulong met ed sikato imay imbaga na anghel ya nanlukon so kanayon ton si Elizabet anggano “akulaw la” pian mas panisiaan to so pakapanyari na Dios. Abayag ya anggapoy anak nen Zacarias tan Elizabet lapud lepes odino agmakaanak si Elizabet. (Lucas 1:36) Say anak da et si Juan Bautista, ya impropesiya met nen Jehova so ministeryo to.​—Lucas 1:10-16; 3:1-6.

 Nayarin say sankanonot nen anghel Gabriel nen imbaga to may walad Lucas 1:37 et si Maria tan si Elizabet. Ipapaseguro met na saratan ya imbaga to ya tuloytuloy ya totooren nen Jehova iray insipan to. Kaiba ed saratan ya insipan to so panderal to ed saray gobierno na totoo, tan salatan to itan na Panarian to ed tawen ya uleyan na Anak to, si Jesu-Kristo.​—Daniel 2:44; 7:13, 14.

 Bantayan iyan antikey ya video pian nawalaan kay ideya ed libro na Lucas.