PALIWAWA NA SARAY TEKSTO ED BIBLIA
Numeros 6:24-26—“Papalaren Ka nen Jehova, tan Talimaen to Ka”
“Bendisyonan ka komon nen Jehova tan salimbengan to ka. Paliwawaen komon nen Jehova so lupa tod sika, tan kasian to ka komon. Itangwa komon nen Jehova so lupa to ed sika tan ikdan to kay kareenan.”—Numeros 6:24-26, Balon Mundo a Patalos.
“Papalaren ka nen Jehova, tan talimaen to ka. Pasinagen nen Jehova so lupa to ed sika, tan mapalangkap ed sika. Itangwa nen Jehova so lupa to ed sika, tan ikdan to ka na kareenan.”—Numeros 6:24-26, Say Biblia.
Say labay ya ibaga na Numeros 6:24-26
Saratan a salita et kabkabat ed tawag ya panamendisyon na saserdote o nen Aaron, say sankaunaan ya atagey a saserdote ed Israel. (Exodo 28:1) Say Dios so nanlapuan na satan. (Numeros 6:22, 23) Oniay ingganggan na Dios ed si Moises: “Ibagam ed si Aaron tan ed saray ananak to, ‘Oniay paraan na pamendisyon yod saray totoo na Israel.’” Kayari to, insan imbaga na Dios imay walad Numeros 6:24-26. Inunor itan na saray matoor ya saserdote. Pinagalangan da met so ngaran na Dios ya Jehova. a Oniay nabasa ed bersikulo 27: “Tan bitlaen [na saray saserdote so] ngaran ko diad saray totoo na Israel, pian bendisyonan ko ra.”
“Bendisyonan ka komon nen Jehova tan salimbengan to ka.” No bebendisyonan nen Jehova iray lingkor to, proprotektaan, igigiya, tan tutulongan to ra pian magmaliw iran maliket. (Proverbio 10:22) Diad Numeros 6:24-26, ginamit so salitan “ka”. Ipapanengneng na satan ya labalabay na Dios ya bendisyonan, aliwa labat ya say interon Israel, noagta pati kada Israelita.
“Paliwawaen komon nen Jehova so lupa tod sika, tan kasian to ka komon.” No say sakey et kerewen tod Dios ya ‘paliwawaen Toy lupa To’ parad sakey ya too, kekerewen ton abobonan na Dios iman ya too. b Onia met so nayarin pangipatalos ed satan: “Komon ta say KATAWAN et onimis ed sika.” (Numeros 6:25, New International Reader’s Version) Ipapanengneng nen Jehova ya sikatoy naliliketan ed saray totoo to diad pagmaliw ton maomaong, makasi, tan concern ed sikara.—Isaias 30:18.
“Itangwa komon nen Jehova c so lupa to ed sika tan ikdan to kay kareenan.” Nibagan ‘itatangwa’ nen Jehova so lupa to ed saray lingkor to diad pangiimano tan pangipapalikna ton inar-aro to ra. Iikdan to met ira na kareenan. Base ed sakey ya reperensya, “say Hebreon salita parad kareenan (shalom) et aglabat mankabaliksan ya say sakey et anggapoy kakolkol to, imbes, sikatoy walaan met na maabig ya kondisyon na laman tan maabig so relasyon to ed Dios.”
Pian naawat na saray Israelita iray bendisyon ya abitlad saray teksto, kaukolan dan unoren si Jehova. (Levitico 26:3-6, 9) No gawaen day panlabayan To, tooren met nen Jehova so sipan tod sikara. Ontan so agawa legan na uley na arum ya ari nensaman, singa si Solomon tan Hezekias.—1 Arari 4:20, 25; 2 Awaran 31:9, 10.
Diad panaon tayo, agla kailangan ya ibaga na saray Kristiano iramay eksakton salita na panamendisyon pian naawat day pabor na Dios. Pero sarag dan ibaga so pinagka-ideya na saratan no manpipikasi irad Dios tan no papasesegen da so arum. (1 Tesalonica 5:11, 25) Agmanguuman si Jehova. Labalabay ton bendisyonan tan protektaan iray matoor ya lingkor to. Nalilikna na saray tuan Kristiano so kareenan lapud amta ra ya ‘papaliwawaen nen Jehova so lupa’ to ed sikara.
Konteksto na Numeros 6:24-26
Diad Numeros kapitulo 1 anggad 10, nabasa ditan so ganggan na Dios ed saray Israelita nen mankakampo ira asingger ed Palandey Sinai, nen paarap ira ed Insipan ya Dalin. Legan na halos sakey ya taon na impankampo ra, inorganisa nen Jehova so bansan Israel tan inikdan to ra na ganggan, say Ganggan a sipanan.
Imbaga met nen Jehova ed si Moises no panon ya bendisyonan nen Aaron tan saray ananak to—saramay apilin magmaliw ya saserdote—iray Israelita. (Numeros 6:22, 23) Kanian inusar nen Aaron tan saray ananak to iramay salitan walad Numeros 6:24-26 pian bendisyonan so bansan Israel. Diad inlabas na panaon, akasanayan la ya bitlaen na sakey ya saserdote iratan ya panamendisyon diad kada agew, kayarin iyapay so sampot ya apay diad templo.
Bantayan iyan antikey ya video pian nawalaan kay ideya ed libro na Numeros.
a Say Jehova et mabetbet ya patalos ed English na ngaran na Dios ed Hebreon lenguahe. Pian naamtaan no akin ya uusaren na dakel ya translation na Biblia so titulon Katawan imbes ya personal a ngaran na Dios, nengnengen so artikulon “Siopa si Jehova?”
b Ibabaga balet na Biblia ya iyaamot nen Jehova so lupa to ed saray Israelita no walay ginawa ra ya makapaermen ed sikato.—Isaias 59:2; Miqueas 3:4.
c Base ed NIV Study Bible, say gagala na aminpigan impangulit ed ngaran na Dios diad sarayan teksto et “pian idanet iray salita ed [bersikulo 27].” Ibabaga balet na arum ya say amitlon beses ya impangusar ed ngaran na Dios et susuportaan to kuno so bangat ya trinidad. Balet duma itan ed imbaga na sakey a komentarista na Biblia ya onsusuporta ed bangat ya trinidad. Inamin to ya “agbalot naisip na saray saserdote ya mangiiter na panamendisyon odino na saray totoo ya mangaawat ed satan ya say amitlon beses ya impangulit ed ngaran na Dios et susuportaan toy bangat ya trinidad. Parad sikara, angarum labat itan na dakep tan danet ed panamendisyon.” (The Pulpit Commentary, Volume 2, pahina 52) Parad kaaruman ya impormasyon, nengnengen so artikulon “Kasin say Dios et Trinidad?”
Ompan Nagustoan Mo Met
ESSENTIAL BIBLE TEACHINGS
Wala ’tay Ngaran na Dios?
Dakel so titulo na Dios, kaiba lay Makapanyarin-amin, Amalsa, tan Katawan. Balet manga 7,000 a danay ya inusar so ngaran na Dios ed Biblia.
PALIWAWA NA SARAY TEKSTO NA BIBLIA
Impaliwawa so Juan 14:27—“Itilak Kod Sikayoy Kareenan”
Anton klase na kareenan so intilak nen Jesus, odino inter to ed saray apostol to? Panon tayo met ya naawat itan?
BANGAT NA BIBLIA
Tulong ed Panaral na Biblia
Manpili ka ray nausar mo ed panaral moy Biblia pian na-enjoy moy manaral tan mas ganado kan manaral.
BANGAT NA BIBLIA
Salien so Panag-aral na Biblia
Salien so libre ya interactive ya panag-aral na Biblia ya walay personal ya manbangat ed sika.
