“Imatalek mod si Jehova so antokaman a gawaen mo, tan seguradon nasumpal iray planom.”—Proverbio 16:3, Balon Mundo a Patalos.

 “Kerew mod KATAWAN a bendisyonan to ray planom, et nagawam ira.”—Probirbio 16:3, Maung a Balita.

 Ipapaseguro na sayan proverbio ya seguradon nagawa so plano na saray mandadayew ed tuan Dios no mantiwala ira ed sikato tan tumboken day panangigiya to.

 “Imatalek mod si Jehova so antokaman a gawaen mo.” Antis ya mandedesisyon iray mandadayew ed si Jehova a, mapaabeba da nin aanapen so panangigiya to. (Santiago 1:5) Akin ey? Say sakey a rason et kaslakan ya limitado odino anggapoy kontrol na totoo ed saray nagagawa ya nayarin mangapekta ed bilay da. (Eclesiastes 9:11; Santiago 4:13-15) Sakey ni, nayarin kulang ira na karunongan pian nagawaan day implano ra. Lapud saratan ya rason, imamatalek da la ed Dios odino ipasa-dios da la iray plano ra. Gagawaen da itan diad pampipikasi ra ed sikato pian onkerew na panangigiya tan gagawaen day linawa to ya walad Salita to, say Biblia.—Proverbio 3:5, 6; 2 Timoteo 3:16, 17.

 Say literal ya labay ya ibaga na balikas ya “kerew mod KATAWAN b a bendisyonan to ray planom” et “ipatulin mo ray kimey mo ed KATAWAN.” Base ed sakey ya reperensya, idedeskribe na sayan balikas so “sakey a toon iyaalis toy ambelat ya awit to manlapud takeb to paonlad takeb na sakey a mas mabiskeg tan mas makasarag ya mansakbat ed satan.” Makaseguro iramay mapaabeban mandedepende ed Dios ya tulongan tan suportaan to ira.—Salmo 37:5; 55:22.

 Aglabay ya ibaga na balikas ya “antokaman a gawaen mo” ya aprobaan odino bendisyonan na Dios so amin lan plano na totoo. Pian naawat day bendisyon nen Jehova, nepeg ya unong ed saray estandarte tan linawa to iray plano ra. (Salmo 127:1; 1 Juan 5:14) Agbendisyonan na Dios so plano na saray agmaunor. Diad tua, “aamperen to ray plano na mauges.” (Salmo 146:9) Balet, susuportaan to iramay manpapasakop ed sikato diad panguunor da ed saray estandarte to ya walad Biblia.—Salmo 37:23.

 “Tan seguradon nasumpal iray planom.” Wala ray angipatalos ed sayan balikas bilang “saray kanonotan mo niletneg ira.” Diad Hebreon Kasulatan, ya kaslakan ya tatawagen ya Daan a Sipan, ipapasabi na salitan impatalos ed English bilang “niletneg” so ideya ya pangiyan na pundasyon, tan kaslakan et ontutukoy itan ed inkaelet na saray pinalsa na Dios. (Proverbio 3:19; Jeremias 10:12) Malet met ya iletneg na Dios iray plano na saramay manggagawa na duga ed pakanengneng to, tulongan to iran nawalaan na mas maligen, malet, tan maliket ya bilay.—Salmo 20:4; Proverbio 12:3.

 Sayan proverbio et insulat nen Arin Solomon, say angisulat ed maslak ya walad libro na Proverbio. Nilibon proverbio so sarag ton ibaga lapud karunongan ya inter ed sikato na Dios.—1 Arari 4:29, 32; 10:23, 24.

 Inggapo nen Solomon so kapitulo 16 diad impangirayew tod karunongan na Dios tan impanengneng to ya kabusol na Dios so inkamapaatagey. (Proverbio 16:1-5) Insan la tulongan na sayan kapitulo so manbabasa pian natalosan to so sakey ya importantin tema ya paulit-ulit ya natutukoy ed libro na Proverbio: Magmaliw labat ya talagan marunong tan maaligwas iray totoo no mapaabeba ira tan manpaigiya irad Dios ed amin ya gawaen da. (Proverbio 16:3, 6-8, 18-23) Aminpigan abitla ed Biblia itan ya importantin katuaan.—Salmo 1:1-3; Isaias 26:3; Jeremias 17:7, 8; 1 Juan 3:22.

 Bantayan iyan antikey ya video pian nawalaan kay ideya ed libro na Proverbio.