PALIWAWA NA SARAY TEKSTO NA BIBLIA
Proverbio 17:17—“Say Tuan Kaaro et Mangaaro ed Amin a Panaon”
“Say tuan kaaro et mangaaro ed amin a panaon tan sakey ya agi a nailaloan diad panaon na gonigon.”—Proverbio 17:17, Balon Mundo a Patalos.
“Saray kakaaro ipanengneng da lawas so panangaro ra. Antoy kana na sanaagi no ag ira mantatambayan ed gunigon?”—Probirbio 17:17, Maung a Balita.
Say labay ya ibaga na Proverbio 17:17
Saray tuan kaaro et nailaloan tan napantiwalaan. Singa ra agagi ya maapit ed sika, matoor ira, tan inaro da ka lalo la no mairap so situasyon.
“Say tuan kaaro et mangaaro ed amin a panaon.” Nayari met ya say labay ton ibaga iya et “lanang ya ipapanengneng na kakaaro so panangaro da.” Say inusar dia ya Hebreon salita parad “mangaaro” et aglabat basta liknaan parad sakey a too. Atan imay agmakasarilin aro ya ipapanengneng panamegley na saray gawa. (1 Corinto 13:4-7) No ontan so aroan na sankaaro, mansiansia ran matoor ed sakey tan sakey anggano nasusubok so pankakaaro da. Singa bilang, nayarin lapud ag-ira akapantalosan odino wala ray dadalanen dan problema ed bilay. Peperdonaen da met so sakey tan sakey. (Proverbio 10:12) Tan agmangimon so sakey ya kaaro no walay maong ya nagawa ed kaaro to, imbes, miliket ed sikato.—Roma 12:15.
“Say tuan kaaro et . . . sakey ya agi a nailaloan diad panaon na gonigon.” Amta na samay angisulat ed sayan proverbio ya talagan maapit so relasyon na sanagi. Kanian no gagawaen tayoy anggaay nayarian tayo ya tulongan so kaaro tayon ondadalan ed mairap ya situasyon, gagawaen tayo no antoy gawaen na sakey ya agi. Tan agbastabasta onkapuy so pankakaaro tayo lapud saray subok, noagta mas onelet itan lapud mas naaro tan narespeto tayoy sakey tan sakey.
Say konteksto na Proverbio 17:17
Say libro na Proverbio et napno na mararakep ya antirikey iran ideya ya pannonoten to iray manbabasa. Maslak ed saratan et insulat nen Arin Solomon. Say paraan na panagsulat to et parehas ed kaslakan ya panagsulat na tula ed Hebreo. Imbes ya mangusar na saray salitan parehas so tanol da ed sampot, manguusar iray ideyan parehas tan idanet toy sakey tan sakey, odino saray ideyan mandumaan tan mankontraan ed sakey tan sakey. Say Proverbio 17:17 et sakey ya alimbawa na tula ya parehoy ideya to, angiyarum na impormasyon so komaduan parte na bersikulo pian nidanet imay unonan parte. Say Proverbio 18:24 balet et sakey ya alimbawa na tula ya mankontraan so ideya to, “Wala ray sankakaiba ya akaparaan a maneral ed sakey tan sakey, balet walay kaaro a mas mansiansia ed abay mo nen say sakey ya agi.”
Nen isusulat nen Solomon so Proverbio 17:17 nayarin sankanonot to may impankaaro nen ama to ya si David, tan si Jonatan ya anak nen Arin Saul. (1 Samuel 13:16; 18:1; 19:1-3; 20:30-34, 41, 42; 23:16-18) Anggano agsankanayon si David tan si Jonatan, mas maapit ni ra nen say sanagi. Inrisga ni ingen nen Jonatan so bilay to parad kaaro to ya mas ugaw nen sikato. a
Say Proverbio 17:17 ed arum ya patalos
“Say kaaro et mangaaro ed amin ya panaon, tan magmamaliw ya agi no walay problema.”—The Bible in Basic English.
“Say kaaro et lanang ya kaaro, niyanak ya agi parad kairapan.”—The Moffatt Translation of the Bible.
“Say kaaro et ipapanengneng toy pikakaaro to ed amin ya panaon—niyanak so ontan ya agi parad kairapan.”—The Complete Jewish Study Bible.
Bantayan iyan antikey ya video pian nawalaan kay ideya ed libro na Proverbio.
a Nengnengen so artikulo ya ‘Nagmaliw Iran Maapit a Sankaaro.’
Ompan Nagustoan Mo Met
EBAT ED SARAY TEPET ED BIBLIA
Antoy Ibabaga na Biblia Nipaakar ed Pikakaaro?
Say maong ya sankaaro et maong so impluensya da ed sakey tan sakey, tan tutulongan day balang sakey ya magmaliw ya mas maong ya too. Pilim ya maong so pikaaroan mo!
WHITEBOARD ANIMATION
Anto so Tuan Kaaro?
Mainomay ya naalmo iray peke ya kaaro, balet panon kan makalmo na tuan kaaro?
ALIGEN SO PANANISIA RA
David tan Jonatan—‘Nagmaliw Iran Maapit a Sankaaro’
Panon ya nagmaliw ya maapit a sankaaro so duaran too ya mandumaan a maong so edad tan kipapasen dad bilay? Panon ya makatulong ed sika so istorya da pian makapikaaro kad arum?
BANGAT NA BIBLIA
Tulong ed Panaral na Biblia
Manpili ka ray nausar mo ed panaral moy Biblia pian na-enjoy moy manaral tan mas ganado kan manaral.
BANGAT NA BIBLIA
Salien so Panag-aral na Biblia
Salien so libre ya interactive ya panag-aral na Biblia ya walay personal ya manbangat ed sika.
