PALIWAWA NA SARAY TEKSTO NA BIBLIA

Roma 10:13—“Ontawag ed Ngaray Katawan”

I-PLAY

“Balang sakey ya ontatawag ed ngaran nen Jehova et niliktar.”—Roma 10:13, Balon Mundo a Patalos.

“Siopamay ontawag ed ngaray Katawan, nilaban.”—Roma 10:13, Maung a Balita.

Say labay ya ibaga na Roma 10:13

Agmanlalabi so Dios, tan iikdan to na pankanawnawa so amin ya totoo ya nilaban tan nawalaan na bilay ya anggapoy anggaan antokaman so bansan nanlapuan da, lahi, odino kipapasen da ed bilay. Balet pian nagunggonaan tayod satan kaukolan tayoy ontawag ed ngaran nen Jehova, say ngaran na Makapanyarin-amin ya Dios. a—Salmo 83:18.

Diad Biblia, say labay ya ibaga na “ontawag ed ngaran nen Jehova” et aglabat basta antam so ngaran na Dios tan uusaren mo itan ed panagdayew. (Salmo 116:12-14) Kaibad satan so pantiwala ed Dios tan sikato labat so kerewan moy tulong.—Salmo 20:7; 99:6.

Importante so ngaran na Dios ed si Jesu-Kristo. Oniay imbaga to ed gapo na samay imbangat ton pangaligan ya pikakasi: “Ama mi a walad tawen, napasanto komon so ngaran mo.” (Mateo 6:9) Impanengneng met nen Jesus ya kaukolan tayon kabaten, unoren, tan aroen si Jehova pian nawalaan tayoy bilay ya anggapoy anggaan.—Juan 17:3, 6, 26.

Akin et nibaga tayon si Jehova so “Katawan” ya abitla ed Roma 10:13 diad Maung a Balita? Lapud inaon itan ya bersikulo ed Joel 2:32, tan say ngaran na Dios, aliwan say titulo ya “Katawan,” so nabasa ed orihinal ya Hebreo. b

Say konteksto na Roma 10:13

Diad Roma kapitulo 10, ipapanengneng na Biblia ya abobonan na Dios so sakey ya too depende ed no walay pananisia to ed si Jesu-Kristo. (Roma 10:9) Susuportaan iya na saray teksto ya inalad Daan a Sipan. Nipanengneng na sakey ya too so pananisia to no ‘iyabawag to itan ed publiko,’ kaibad satan so pangiyabawag to na maong a balita nipaakar ed kilalaban diad saray agmananisia. Bilang resulta, naikdan so arum na pankanawnawa ya nawalaan na pananisia ya mangitonton ed bilay.—Roma 10:10, 14, 15, 17.

Basaen so Roma kapitulo 10 kaiba la ray paimanod leksab tan saray cross-reference.

a Manga 7,000 beses ya nanengneng so ngaran na Dios ed saray daan ya manuskrito na Biblia. Diad Hebreo, say ngaran na Dios et irerepresenta na apatiran letra a kabkabat bilang Tetragrammaton. Diad Pangasinan, mabetbet ya ipapatalos itan bilang “Jehova.” Balet wala ray scholar ya mas labay dan ipatalos itan bilang “Yahweh.”

b Seguradon inusar na saray Kristianon angisulat na Biblia so ngaran na Dios no bibitlaen da ray teksto ed “Daan a Sipan” ya pakabasaan na satan ya ngaran. Oniay imbaga na The Anchor Bible Dictionary: “Wala ray ebidensya ya say Tetragrammaton, say ngaran na Dios ya Yahweh, et nabasa ed saray teksto ed Balon Sipan ya inaon ed Daan a Sipan nen unonan insulat iray dokumento na Balon Sipan.” (Volume 6, pahina 392) Parad kaaruman ya impormasyon, nengnengen so “Say Ngaran na Dios ed Kristianon Griegon Kasulatan” diad Apendise A5 na Balon Mundo a Patalos na Masanton Kasulatan. Diad Apendise C2 na Bagong Sanlibutang Salin ng Banal na Kasulatan (Edisyon sa Pag-aaral), walay listaan na saray patalos na Biblia ya angusar ed ngaran na Dios diad Roma 10:13.