“Manliket kan maong ed si Jehova, tan iter tod sika iray pirawat na pusom.”—Salmo 37:4, Balon Mundo a Patalos.

 “Say KATAWAN so pananapan moy liket mo, et iter tod sika ray pampipilalekan na pusom.”—Salmo 37:4, Maung a Balita.

 Papasesegen na salmista iray mandadayew ed Dios ya panliketan day mikaaro ed Sikato. No ontan so gawaen da, makasegurado iran iter nen Jehova a iray kerew tan labay da.

 “Manliket kan maong ed si Jehova.” Sarayan salita et nayari met ya ipatalos ya “panliketan so panlilingkor ed KATAWAN,” odino “panliketan iray insipan ed sika na KATAWAN.” Labay ton ibaga, ‘magmaliw tayon maliket’ no panlingkoran tayo so tuan Dios. (Salmo 37:4) Akin et nibaga tayon ontan?

 Saramay mandadayew ed si Jehova et aaligen day panagnonot to ya nabasa ed Biblia. Agda labat kakabaten so Dios, amta da met ya no sikatoy unoren da, parad pankaabigan da lanlamang. Bilang resulta, malinis so konsiensia ra tan naiwasan day makagaway lingo tan makapuy iran desisyon. (Proverbio 3:5, 6) Singa bilang, ag-ira makakaliknay pasnok odino inggit no nanenengneng dan maasensoy bilay na saray maagum o matilan totoo. (Salmo 37:1, 7-9) Maliket ira ta amta dan magano lan ekalen na Dios so amin ya ag-inkahustisya tan bendisyonan To iray matoor tan manggagaway kamaongan. (Salmo 37:34) Malikeliket met ira ta amta dan napapaimis tan aabobonan ira na Ama dad tawen.—Salmo 5:12; Proverbio 27:11.

 “Iter tod sika iray pirawat na pusom.” Sarayan salita et nayari met ya ipatalos ya “ebatan to iray pikakasim” odino “iter toy labalabay mo.” Agto labay ya ibagan iter nen Jehova so anggan anto lad tan ya kerew tayo. Si Jehova et singa sakey ya maaron ateng ya amta to so sankaabigan parad ananak to. Kanian dapat ya saray kerew tan paraan na kabibilay tayo et base ed estandarte tan panlabayan to. (Proverbio 28:9; Santiago 4:3; 1 Juan 5:14) Ta no ontan, makapantiwala tayon dengelen itayo na “Dumerengel na pikakasi.”—Salmo 65:2; Mateo 21:22.

 Si Arin David ya nanuley ed Israel nensaman so nan-compose ed Salmo 37. Say style na impansulat to et alphabetic o akrostik. b

 Aminpigapigan abiktima na ag-inkahustisya si David. Sikatoy labay ya pateyen nen Arin Saul tan na arum nin mangakalaban ed sikato. (2 Samuel 22:1) Balet lanang ya mantitiwala ed Dios. Amta nen David ya onsabi panaon, deralen lanlamang na Dios iray mauges. (Salmo 37:10, 11) Anggano singa maasensoy bilay da, “singa ra balon tubon dika” ya nalenes o naandi lanlamang.—Salmo 37:2, 20, 35, 36.

 Nabasa ed Salmo 37 no antoy pansumpalan na saray manguunor ed saray estandarte na Dios tan no antoy pansumpalan na saray mangibabaliwala ed satan. (Salmo 37:16, 17, 21, 22, 27, 28) Makatulong met itan pian magmaliw tayon marunong tan napaliket tayo so Dios.

 Bantayan iyan antikey ya video pian nawalaan kay ideya ed libro na Salmo.