“Suko ki la tan amtaen yo a siak so Dios. Nitandoro ak ed limog na saray nasyon; nitandoro ak diad dalin.”—Salmo 46:10, Balon Mundo a Patalos.

 “Deen ka, tan amtaen mo a Siak Dios ak: nitandoro ak ed saray nasyones, nitandoro ak dia ed dalin.”—Salmo 46:10, Say Biblia.

 Papasesegen na Dios so amin ya totoo ya mandayew irad sikato tan bidbiren da so kanepegan ton manuley diad interon dalin. Sankapatnagan so pakayari tan autoridad na Dios, tan siopaman a malabay ya manbilay ya anggapoy anggaan et kaukolan ton bidbiren itan.—Apocalipsis 4:11.

 “Suko ki la tan amtaen yo a siak so Dios.” Diad arum iran bersion na Biblia, impatalos so unonan parte na sayan balikas ya “deen ka.” Kanian aliway pakatalos na dakel ya totoo ed satan, iisipen da ya kaukolan so pagmaliw ya marespeto odino ideen no walad simbaan. Balet diad samay Hebreon balikas ya impatalos bilang “suko ki la tan amtaen yo a siak so Dios” et bibilinen nen Jehova a a Dios iray totoo ed amin ya nasyon, tan papasesegen to ran itunda da lay ikontra ed sikato tan bidbiren da ya sikato labat so makanepegan ya dayewen.

 Naromog tayo so miparan panamilin diad Salmo 2. Ditan et impromisa na Dios ya deralen to iray onkokontra ed sikato. Balet saramay bibidbiren day autoridad na Dios et mandedepende ed sikato pian naikdan iray panangigiya, biskeg, tan karunongan. ‘Papasalimbengan ira ed Sikato’ kanian maliket tan maligen so liknaan da, lalo la diad mair-irap ya panaon.—Salmo 2:9-12.

 “Nitandoro ak ed limog na saray nasyon; nitandoro ak diad dalin.” Nensaman, nitandoro si Jehova a Dios nen inusar to so baleg a pakayari to pian protektaan iray totoo to. (Exodo 15:1-3) Diad arapen, nitandoro lamet so Dios diad mas malaknab ya paraan sano manpasakop la ed autoridad to so amin ya totood dalin tan mandayew irad sikato.—Salmo 86:9, 10; Isaias 2:11.

 Imbaga na sakey ya reperensya ya say Salmo 46 et “sakey ya kansion ya mangirarayew ed pakayari na Dios, say mabiskeg ya manangiliktar na totoo to.” No kakansionen na totoo na Dios so Salmo 46, ibabalikas da so tiwala da ed pakayari nen Jehova ya manprotekta tan ontulong ed sikara. (Salmo 46:1, 2) Ipapanonot na saray salita ed satan ya salmo ya naynay ya walad sikara si Jehova.—Salmo 46:7, 11.

 Pian ombiskeg so tiwala ra ed pakayari nen Jehova a Dios ya manprotekta ed sikara, pinaseseg ira na salmo ya dalepdepen iray makapakelaw ya ginawa to. (Salmo 46:8) Espisipikon impaimano na sayan salmo ya sarasarag nen Jehova ya patundaen iray guerra. (Salmo 46:9) Diad panaon na Biblia, nibagan pinatunda nen Jehova iray guerra ta prinotektaan to ray totoo to diad saray kalaban da. Balet ipropromisa na Biblia ya asingsingger lan gawaen itan na Dios diad mas malaknab a paraan sano patundaen to la so amin ya guerra ed interon mundo.—Isaias 2:4.

 Kasin siansia nin tutulongan nen Jehova iray mandadayew ed sikato natan? On. Diad tua, pinaseseg nen apostol Pablo iray Kristiano ya mantiwala ya tulongan ira nen Jehova. (Hebreo 13:6) Makatulong iray nabasa ed Salmo 46 pian ombiskeg so tiwala tayo ed pakayari na Dios ya manprotekta ed sikatayo. Ontulong iratan pian ipasen tayoy Dios ya “salimbengan tan biskeg tayo.”—Salmo 46:1.

 Bantayan iyan antikey ya video pian nawalaan kay ideya ed libro na Salmo.