Saray sea cucumber et ayayep ya manbibilay diad dalem na dayat tan diad saray coral reef. Say laman da et masagapsap odino walay turok-turok to. Makapabilib so laman da ta sarag dan pakulaneyen ya singa wax odino paaweten ya singa tabla diad loob labat na pigaran minuto odino segundo. Lapud satan ya abilidad na saray sea cucumber, main-inomay day onlabot ed anggan saray mainget ya abot insan ira manpaawet pian ag-ira naguyor na saray onaataki ed sikara. Say sekreto da et lapud makapabilib ya laman da.

 Isipen pa: Walay taloran pagmaliwan na laman na sea cucumber​—anawet, medyo anawet, tan anlemek. Pian nagawaan da iratan, pankokonektaan odino panhihiwalayen na sea cucumber iray fiber na laman da. Manguusar ira na nanduruman protina ya mamapaawet tan mamapalemek na laman da.

 Saray protina ya mamapaawet et pankokonektaan to iray fiber na laman na sea cucumber pian onawet itan. Saray protina ya mamapalemek et panhiwalayen to iray fiber na laman da pian onlemek itan. Magmaliw ya anlemek so laman na sea cucumber ya singa itan natutunaw.

 Aaligen na saray scientist so abilidad na laman na sea cucumber. Labay day manggawa na electrode ya usaren dad pan-opera na utek, ya onawet no iyan da itan ed dugan pangikargaan da ed satan insan sarag to met so onlemek. No makagawa ira na onian electrode, makatulong itan ed pan-opera da.

 Antoy nibagam? Kasin say makapabilib ya laman na sea cucumber et resulta na ebolusyon? Odino walay nandesinyo?