Sarasarag na malleefowl ed southern Australia ya pansiansiaen so temperatura na panag-iknolan to ya ag-onlampas odino onabeba na duara odino taloran degrees ed 34 degrees Celsius (93°F). Panon ton nakokontrol so ontan ya temperatura, agew tan labi diad loob na sakey ya taon?

 Kada winter, mankokotkot so malleefowl na abot ya say kaaralem to et manga sakey metro (3 feet) tan say kaawang to et manga taloran metro (10 feet). Panoen itan na lakin malleefowl na dikarika, bulobulong, tan arum nin nabubulok ya bengatla. No nabasa iratan na uran diad pansampot na winter, mankotkot ditan na abot ya pan-iknolan na asawa to, insan to tabonan na mabuer ya dalin. Agmanbayag, nabulok la iramay inkarga to diman tan ompetang, kanian magmaliw itan ya natural incubator.

 Kada no man-iknol so inahin ya malleefowl, kotkoten na lakin malleefowl imay dalin ya intabon to pian makapan-iknol imay inahin diman ed abot ya walad dalem. Kayarin man-iknol imay inahin ya malleefowl, itabon ya tampol na lakin malleefowl imay dalin ya inekal to. Manlapud Setyembre anggad Pebrero, say iknol na sakey a malleefowl et anggad 35. a

 Mabetbet ya ilubog na malleefowl so tepek tan dila to diad mabuer ya dalin pian na-check to so temperatura na satan. Babawasan odino aaruman to so dalin ya akatabon depende ed panaon. Singa bilang:

•   No spring, sano nabubulok la imay bulobulong tan dikarika ya inkarga to, ompetang ya maong so kawalaan na iknol, kanian bawasan na lakin malleefowl so intabon ton dalin pian ombetel. No ambetel la imay dalin, ipawil to lamet.

•   No summer balet, aruman na lakin malleefowl imay dalin ya intabon to pian agnaluto ed agew iramay iknol. Kinabuasan to iratan ya kaykayen insan to salatan na mas ambetel ya dalin.

•   No autumn la tan abulok lan amin iramay bulobulong tan dikarika ya intabon to, eekalen la na malleefowl so halos amin ya dalin ya intabon to pian napetangan na agew iramay iknol tan naagew iramay intaytayak ton dalin. No pinmetang la iratan, ipawil to lamet pian napetangan iramay iknol legan na sanlabi.

 Diad average, kada agew et mankakaykay so lakin malleefowl na anggad limaran oras pian nakotkot tan nitabon to so anggad 850 kilo (1,874 lbs) ya dalin. Makakatulong itan ya pankakaykay to pian ag-onawet so dalin. Kanian no napusnakan la ray siwsiw, mainomay dan ombotbot papaway.

 Antoy nibagam? Kasin say abilidad na lakin malleefowl ya kontrolen so temperatura na paniknolan na asawa to et basta labat nan-evolve? Odino walay nandesinyo?