Legan ya onlalangoy iray manta ray, makakapangan ira diad pangaakmon day danum na dayat ya walay laok ton plankton. Nasapit itan tan ompugtal so plankton paloob ed dalem na sangi na manta ray insan to la akmonen. Say danum balet et tuloytuloy labat ya onloob ed panagsapitan to insan la ompaway ed asang na manta ray. Pero anggan saray plankton ya mas melag ni nen saray dadalanan ed panagsapit to et sarag ya sapiten na manta ray. Imbaga nen Ed Yong, sakey ya managsulat nipaakar ed siensia ya “singa imposible iyan abilidad.”

 Nonot mo pa: Say panagsapit na manta ray et singa limaran arko ya say itsura to et singa sagaysay ya nantupag iray ngipen to. Say arum ya ngipen et aka-slanting ya paarap tan say arum et pabeneg. Ibiig na sarayan ngipen so danum na dayat kanian napuersa so arum ya danum ya onagus ed tagey na saray ngipen odino diad baetan na saratan, kanian napoporma iray angkekelag tan mapmaples ya ontetelek ya danum.

 No nasangga na saray ngipen iray plankton odino arum nin piraso na naakan, ompugtal iratan tan onloob ed dalem na sangi na manta ray insan to la akmonen. Anggano mas melag ni iray plankton nen say dalanan da diad baetan na saray ngipen, ompugtal ni ran siansia paonlad dalem na sangi na manta ray ta papepelesen na saray mapmaples ya ontetelek ya danum so galaw da, tan napuersa iran ompawil ed agus. Lapud satan ya paraan na panagsapit, naakan nin siansia na manta ray iray angkekelag ya piraso na naakan ya posiblin makalusot la ed nanleetan na saray ngipen tan ompawil la komon ed danum na dayat.

 Kaaruman ni, agnababarado so panagsapit na manta ray tan nalilinisan itan ya bukor anggan panon kapeles so langoy to, odino anggan panon karakel so plankton ed danum.

 Labay ya aligen na saray researcher so paraan na panagsapit na manta ray pian makapandesinyo ira na saray panagsapit ya sarag ton linisan so marutak ya danum tan nasapit iray angkekelanting ya piraso na mapeligron plastic.

 Antoy nibagam? Kasin say paraan na panagsapit na manta ray et linmesa lapud ebolusyon? Odino walay nandesinyo?