Say “Balon Jerusalem,” ya mamiduan nabasa ed Biblia, et simbolikon syudad ya mangirerepresenta ed grupo na saray patumbok nen Jesus ya onlad tawen pian nakaiba ton manuley ed Panarian na Dios. (Apocalipsis 3:12; 21:2) Diad Biblia, sayan grupo et atawag met ya nobya nen Kristo.

1.   Say Balon Jerusalem et walad tawen. Kada no nabitla ed Biblia so Balon Jerusalem, nabasa ya onleleksab itan manlapud tawen, ya saray puerta na satan a syudad et babantayan na saray anghel. (Apocalipsis 3:12; 21:2, 10, 12) Nanengneng met ed kabaleg na satan ya syudad ya imposiblin diad dalin so kawalaan to. Kuadrado itan ya say kabaleg to et “12,000 ya estadyo” odino “manga 2,200 kilometro.” a (Apocalipsis 21:16; paimanod leksab) Say katagey to sirin et ngalngali 560 kilometro, kanian imposiblin diad dalin itan ya syudad.

2.   Say Balon Jerusalem et irerepresenta to so grupo na saray patumbok nen Jesus, say nobya nen Kristo. Say Balon Jerusalem et tinawag ya “nobya, say magmaliw ya asawa na Kordero.” (Apocalipsis 21:9, 10) Diad satan ya deskripsion, say Kordero et isisimbolo toy Jesu-Kristo. (Juan 1:29; Apocalipsis 5:12) “Say magmaliw ya asawa na Kordero,” say nobya nen Kristo, et isisimbolo to ray Kristiano ya nakaiba nen Jesus diad tawen. Say relasyon nen Jesus ed sarayan Kristiano et inkompara na Biblia ed relasyon na asawan laki tan asawan bii. (2 Corinto 11:2; Efeso 5:23-25) Ontan met, akaukit so “12 ngaran na 12 apostol na Kordero” ed saray pundasyon a bato na Balon Jerusalem. (Apocalipsis 21:14) Paneknekan na sayan detalye ya say Balon Jerusalem et ontutukoy ed saray Kristiano ya onlad tawen ta ibabaga na Biblia ya “akaletneg [ira] ed pundasyon na saray apostol tan saray propeta.”​—Efeso 2:20.

3.   Say Balon Jerusalem et parte na sakey a gobierno. Say Jerusalem nensaman so kabisera na bansan Israel. Si Arin David, say anak ton si Solomon, tan saray kailalakan da et nanuley ditan “diad trono nen Jehova.” (1 Awaran 29:23) Say Jerusalem sirin ya tinawag a “masanton syudad” et insimbolo to so uley na Dios panamegley na saray arari ya nanlapud pamilya nen David. (Nehemias 11:1) Say Balon Jerusalem, a tinawag met ya “masanton syudad,” et saramay nakaiba nen Jesus diad tawen ya “manuley . . . bilang arari ed dalin.”​—Apocalipsis 5:9, 10; 21:2.

4.   Say Balon Jerusalem et mangiter na bendisyon ed saray totoo diad dalin. Say Balon Jerusalem et adeskribe ya “onleleksab manlapud tawen, manlapud Dios.” Ipapanengneng na satan ya usaren na Dios so Balon Jerusalem pian manggawa na saray pananguman diad dalin. (Apocalipsis 21:2) Nanengneng met ed satan ya say Balon Jerusalem et konektado ed Panarian na Dios, ya usaren na Dios pian nagawa so linawa to, “a singa ed tawen, ontan met diad dalin.” (Mateo 6:10) Nia ray bendisyon no nagawa la so gagala na Dios parad saray totoo diad dalin:

   •   Naandi lay kasalanan. Walay “ilog na danum na bilay” ya onaagus manlapud Balon Jerusalem tan mamapabuna ed saray “kiew na bilay” ya “mamaabig ed saray nasyon.” (Apocalipsis 22:1, 2) Lapud sayan pisikal tan espiritual ya panagpaabig, naandi lay kasalanan kanian magmaliw lan perpekto so bilay na totoo. Atan so talagan gagala na Dios parad totoo manlapu lad gapo.​—Roma 8:21.

   •   Saray totoo et nawalaan na maapit ya relasyon ed Dios. Lapud kasalanan et niyarawi so totoo ed Dios. (Isaias 59:2) No naandi lay kasalanan, nasumpal la iyan propesiya: “Say tolda na Dios et walad katooan, tan sikatoy manayam a kaiba ra, tan magmaliw iran totoo to. Tan say Dios a mismo et niwala ed sikara.”​—Apocalipsis 21:3.

   •   Anggapo lay irap tan patey. Panamegley na Panarian na Dios, “punasen to so amin a lua ed kamataan da, tan anggapo lay patey, anggapo met lay panermen tan panakis tan panotot.”​—Apocalipsis 21:4.