Antoy Ibabaga na Biblia Nipaakar ed Ibawi?
Say ebat na Biblia
Nayarin isipen na sakey ya duga labat so ombawi, pero no gawaen to itan, nakontra to iyan bilin na Biblia: “Agmo ibabaga: ‘Gawaen kod sikato so ginawa tod siak; ombawi ak ed sikato.’” (Proverbio 24:29) Wala ray bilin ed Biblia ya akatulong ed dakel pian nalabanan day liknaan ya ombawi.
Diad sayan artikulo
Antoy uges to no labay moy ombawi?
No walay akasakit odino nanggaway aliwa ed sika, natural labat ya manpasnok ka tan labay mon nadusa itan a too. Balet no bawian mo, nakontram so ibabaga na Biblia. Akin?
Aglabay na Dios no manggagaway paraan iray totoo pian ombawi. Diad Biblia, oniay imbaga nen Jehova a a Dios: “Kien ko so panangibales; siak so ombawi.” (Roma 12:19) Papasesegen na Biblia iramay naagrabiado ya no posible et mareen dan resolbien iray problema imbes ya ombawi ira. (Roma 12:18) Balet panon to no ginawa da lay amin ya paraan pian mareen ya naayos so problema balet siansia ni? Bibilinen itayo na Biblia ya manmatalek tayon ipetek nen Jehova so antokaman ya aliwan agawa.—Salmo 42:10, 11.
Panon ya manudusa so Dios?
Natan, aabuloyan na Dios iray sekular ya autoridad ya manusa ed saray nanggaway aliwa. (Roma 13:1-4) Balet onsabi panaon ya ukomen to so amin ya manggagaway kaugsan tan seguroen to ya anggapo lan balot so naagrabiado.—Isaias 11:4.
Panon kon nalabanan so liknaan ya ombawi?
Agka bastabasta manggagaway bengatlan agninonot ya maong. (Proverbio 17:27) Kaslakan ya saramay totoon onkikiwas lapud pasnok da et pagbabawian da lanlamang so ginawa ra. Balet saramay mannononot ni antis ya onkiwas et mas maabig iray desisyon da.—Proverbio 29:11.
Amtaen ni no antoy tua. (Proverbio 18:13) No naagrabiado so sakey, mas maong no tepetan to ni sarili to, ‘Wala kasi rason ya agko ni amta no akin ya onmay ginawa to may akasakit ed siak? Kasin nai-stress? Odino kasin agto amta may ginawa to?’ No maminsan, ompan iisipen tayon gagagalaen itayon sakitan na arum pero diad tua et talagan alingo labat ira.
Saray lingon pakatalos nipaakar ed ibawi
Lingon pakatalos: Ipapanengneng na samay imbaga na Biblia ya “mata parad mata” ya ayos labat so ombawi.—Levitico 24:20.
No antoy duga: Samay ganggan ed Israel nensaman ya “mata parad mata” et agto ipapaseseg so ibawi. Satan ya totontonen et akatulong ed saray ukom pian niiter day manepeg ya dusa ed sakey ya nanggaway mauges. b—Deuteronomio 19:15-21.
Lingon pakatalos: No ag-aabuloyan na Biblia so ibawi, agtayo sirin nidepensa so sarili tayo no walay mangataki ed sikatayo.
No antoy duga: No walay mangataki ed sakey ya too, kanepegan ton idepensa so sarili to odino onkerew na tulong ed saray walaan na autoridad. Balet ibabaga na Biblia ya anggad posible et paliisan tayoy maruksan pilaban.—Proverbio 17:14.
a Nabasad Biblia ya Jehova so ngaran na Dios.
b Parad mas detalyadon impormasyon nipaakar ed sayan totontonen, nengnengen so artikulon “Antoy Labay ya Ibaga na ‘Mata Parad Mata’?”
Ompan Nagustoan Mo Met
SAY PANAG-BANTAYAN
No Panon ya Napatunda so Pambubusolan—Agka Ombabawi
Kontrol moy naliliknam, agka ombabawi. Mantiwala ka ya magano lan iter na Dios so hustisya.
EBAT ED SARAY TEPET ED BIBLIA
Antoy Labay ya Ibaga na “Mata Parad Mata”?
Kasin ipapaseseg na ganggan ya “mata parad mata” so ombawi?
EBAT ED SARAY TEPET ED BIBLIA
Antoy Labay ya Ibaga na ‘Aro Yo Iray Mamubusol ed Sikayo’?
Sayan simpli balet ontagos ed puso iran imbaga nen Jesus et nayarin mair-irap tayon gawaen.
BANGAT NA BIBLIA
Salien so Panag-aral na Biblia
Salien so libre ya interactive ya panag-aral na Biblia ya walay personal ya manbangat ed sika.