On, ta say Biblia et nanlapud “Dios, a manliligliwa ed saramay naaandiay ilalo.” (2 Corinto 7:6) Anggano aliwa itan ya libro parad mental health, akatulong itan ed dakel pian agda la ituloy so plano ran manbikkel. Tan makatulong met ed sika iray praktikal ya bilin ya wadtan.

•  Anto ran praktikal a bilin so walad Biblia?

•  Kasin wala ray karakter ed Biblia ya imbaga dan labay da lay ompatey?

•  Anto ran teksto ed Biblia so makatulong no iisipen moy manbikkel?

•  Antoy gawaen mo no imbaga na kaarom ya, “Labay ko lay ompatey?”

•  Panon to no sinalik so manbikkel nensaman?

• ● Ibagam ed arum so naliliknam.

   No antoy ibabaga na Biblia: “Say tuan kaaro et mangaaro ed amin a panaon tan sakey ya agi a nailaloan diad panaon na gonigon.”—Proverbio 17:17.

   Say labay ya ibaga: Kailangan tayoy tulong na arum no aliwliwa o negatibo lay iisipen tayo.

   No sarilien moy naliliknam, nairapan ka tan mas nabelatan ka. Pero no ibagam itan ed arum, onlemew so liknaan mo tan magmaliw ya positibo so panagnonot mo.

   Salim iyan gawaen: Mitongtong ka natan ed sakey ya kapamilyam odino kaarom ya pantitiwalaan mo. a Sarag mo met ya isulat so naliliknam.

• ● Manpa-check up ed doktor.

   No antoy ibabaga na Biblia: “Agmankaukolan na managtambal iray totoon maksil so laman da, noagta saraman labat so mansasakit.”—Mateo 9:12.

   Say labay ya ibaga: No walay sakit tayo, manpacheck-up tayod doktor.

   No iisipen na sakey so manbikkel, ompan sintomas itan ya walay sakit tod mental odino diad emosyon. Singa say pisikal ya sakit, ag-itan dapat ya ibaing ta natambal itan.

   Salim iyan gawaen: Manpatulong kan tampol ed professional ya doktor.

• ● Tandaan mo ya inar-aro ka na Dios tan walay malasakit tod sika.

   No antoy ibabaga na Biblia: “Agta say limaran anuyaw et manbili labat na duaran sinsilyo? Ingen ta anggapo ed saratan so nalingwanan na Dios. . . . Agkayo natatakot; mas mabli kayo nen say dakel ya anuyaw.”—Lucas 12:6, 7.

   Say labay ya ibaga: Importante kan maong ed Dios.

   No pakaliknam et anggapoy manmamalasakit ed sika, tandaan mo ya nanenengneng na Dios so amin ya dadalanen mo. Interesado nin siansia ed sika anggano anggapo lay ganam ya manbilay. Ibabaga na Salmo 51:17: “Agmo ipulisay, O Dios, so sakey a puson asugatan tan maer-ermen.” Labay to ya tuloytuloy kan manbilay ta inar-aro to ka.

   Salim iyan gawaen: Basam iray ebidensya ed Biblia ya mangipapanengneng ya inaro ka na Dios. Singa bilang, basam so kapitulo 24 na libron Onapit ed si Jehova.

• ● Manpikasi ka ed Dios.

   No antoy ibabaga na Biblia: “Ipaawit yod [Dios] so amin a kapagaan yo, lapud iyaansakit to kayo.”—1 Pedro 5:7.

   Say labay ya ibaga: Labay na Dios ya ibagam ed sikato so amin ya naliliknam tan no anton talagay pakakaaburidoan mo.

   Sarag kan ikdan na Dios na deen na nonot tan biskeg pian nasarag moy situasyon mo. (Filipos 4:6, 7, 13) Tan susuportaan to iramay impapuson onkekerew na tulong ed sikato.—Salmo 55:22.

   Salim iyan gawaen: Manpikasi kad Dios natan. Bitlam so ngaran to ya Jehova tan ibagam ed sikato so naliliknam. (Salmo 83:18) Ipikasim ed sikato ya tulongan to kan ag-onsuko.

• ● Nonot moy balibalin ibabaga na Biblia ya nagawad arapen.

   No antoy ibabaga na Biblia: “Walaan itayo na sayan ilalo bilang angkla na bilay tayo, a segurado tan malet.”—Hebreo 6:19, paimanod leksab.

   Say labay ya ibaga: Ompan say emosyon mo et manguman-uman, ya singa sakey ya barko ya agmakareen lapud walay bagyo. Pero makatulong so pag-asa ya nabasam ed Biblia pian ondeen so nonot mo.

   Satan ya pag-asa et aliwan pangarap labat. Akabase itan ed promisa na Dios ya ekalen to so amin ya panlalapuay irap tan sakit ya nalilikna tayo.—Apocalipsis 21:4.

   Salim iyan gawaen: Basam so leksion 5 na brosyur ya Maong a Balita ya Nanlapud Dios pian naamtaan mo ni so pag-asa ya walad Biblia.

• ● Gawaen iramay panliliketan mo.

   No antoy ibabaga na Biblia: “Say maliket a puso et maong a tambal.”—Proverbio 17:22.

   Say labay ya ibaga: No naliliketan tayod saray gagawaen tayo, ombalibali liknaan tan ondeen so nonot tayo.

   Salim iyan gawaen: Gawam iray panliliketan mo. Singa bilang, maabig no ondengel kad maliket ya musika, manbasa kay mamabiskeg na liknaan mo, odino arum ni ya labalabay mon gawaen. Magmaliw ka met ya mas maliket no ontulong kad arum, anggan diad simplin paraan.—Gawa 20:35.

• ● Asikasom so laman mo.

   No antoy ibabaga na Biblia: “Say panag-ehersisyo et makagunggona.”—1 Timoteo 4:8, paimanod leksab.

   Say labay ya ibaga: Nagunggonaan tayo no man-exercise tayo, sustoy ugip tayo, tan mangan tayoy masustansia.

   Salim iyan gawaen. Manakar-akar anggan 15 minuto labat.

• ● Tandaan mo ya manguman lanlamang so naliliknam tan say situasyon mo.

   No antoy ibabaga na Biblia: “Agyo amta no antoy nagawa ed bilay yo nabuas.”—Santiago 4:14.

   Say labay ya ibaga: Amin ya problema, kaiba la iramay singa anggapoy solusyon, et temporaryo labat.

   Anggan panon kairap so situasyon mo natan, isip mo ya nayarin manguman itan nabuas. Kanian agka onsusuko. Manggawa kay paraan pian nalabanan mo. (2 Corinto 4:8) Tandaan mo ya posiblin manguman ni situasyon mo, pero no manbikkel ka, agmo la nababawi.

   Salim iyan gawaen: Basam iray istorya ed Biblia tungkol ed saramay adismaya tan labay da lay ompatey. Insan imanoen no panon dan asarag so situasyon da, mabetbet ya diad paraan ya agda inilaloan. Nia ray pigaran alimbawa.

 On, wala ray nabasa ed Biblia ya imbaga dan labay da lay ompatey. Pero, ag-ira nampasnokan na Dios, imbes et tinulongan to ni ra ingen ya nalabanan da itan ya liknaan. Ontan met so sarag ton gawaen ed sika.

Elias

•  ● Siopa si Elias? Si Elias et makpel ya propeta na Dios. Pero wala ray situasyon ya kinmapuy so liknaan to. Ibabaga na Santiago 5:17 ya si “Elias et sakey a toon walaan na liknaan a singa sikatayo.”

•  ● Akin et labay toy ompatey? Wala may inkagawa ya pakalikna nen Elias et bukbukor to la, anggapoy kana to, tan natatakot. Kanian akikasi ed Dios, kuan to, “Jehova, paandim lay bilay ko.”—1 Arari 19:4.

•  ● Antoy akatulong ed sikato? Imbaga nen Elias ed Dios so amin ya nalilikna to. Panon ya pinabiskeg na Dios? Impanengneng na Dios ya walay malasakit tod Elias, tan impanengneng To met ya Sikatoy makapanyari. Pinaseguroan to met si Elias ya walay kana to tan wala ni nagawaan to. Tan inikdan to met na maaro tan marunong ya nakaiba to.

•  ▸ Basaen so tungkol ed si Elias: 1 Arari 19:2-18.

Job

•  ● Siopa si Job? Sakey iyan mayaman ya laki ya baleg so pamilya to tan matoor ya lingkor na Dios.

•  ● Akin et labay toy ompatey? Walay agawa ya inuman toy bilay nen Job. Naupot so amin ya walad sikato. Inatey so amin ya ananak to nen walay agawan trahedya. Aliwan satan labat, adapoan ni na makapairap ya sakit. Tan naakusaan ya sikato lanlamang so akankasalanan ed paniirap to. Kanian nibaga to: “Kabusol koy bilay ko; agko la labay so manbilay.”—Job 7:16.

•  ● Antoy akatulong ed sikato? Nampikasi ed Dios si Job tan imbaga toy nalilikna to ed arum. (Job 10:1-3) Sikatoy pinabiskeg na maar-aro tan makatalos ya kaaro ton si Elihu. Tinulongan toy Job ya nauman so pakanengneng tod situasyon to. Tan say talagan akatulong ed si Job et nen inawat toy bilin tan tulong na Dios.

•  ▸ Basaen so tungkol ed si Job: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moises

•  ● Siopa si Moises? Sikatoy lider na Israel nensaman tan matoor ya propeta na Dios.

•  ● Akin et labay toy ompatey? Ambelat so responsabilidad to, insan lanang ni ya kukuestionen na saray Israelita, kanian naknaksawan la. Onia laingen so kinerew tod Dios: “Ipangasim . . . patey mo ak la.”—Numeros 11:11, 15.

•  ● Antoy akatulong ed sikato? Imbaga nen Moises ed Dios so nalilikna to. Kanian tinulongan na Dios si Moises ya nalemewan ed kimey to pian nabawasan so pakakabelatan to.

•  ▸ Basaen so tungkol ed Moises: Numeros 11:4-6, 10-17.