On. Ibabaga na Biblia no antoy gawaen tayo pian naandi lay pakakakonsiensia tayo. (Salmo 32:1-5) No walay ginawa tayon aliwa pero talagan magbabawi tayo la, perdonaen itayo na Dios tan tulongan to tayon nainawaan. (Salmo 86:5) Ipapanengneng na Biblia ya wala met so nitulong na pakakakonsiensia. Nayarin napakiwas itayo ya itunda so aliwan gagawaen tayo tan pansagpotan tayon agla uliten itan. (Salmo 51:17; Proverbio 14:9) Balet bibilinen itayo na Biblia ya agtayo nepeg ya sobran nakonsiensia, tan ompan huhusgaan ti lay sarili tayo ya anggapo lay pag-asa tayo odino agtayo makanepegan ed pakanengneng na Dios. No ontan so pakanengneng tayod sarili tayo, ompan ‘akmonen itayo na alablabas ya ermen.’—2 Corinto 2:7, paimanod leksab.

•  Akin et nakokonsiensia itayo?

•  Antoy nayarin gawaen ko no nakokonsiensia ak?

•  Saray teksto ed Biblia nipaakar ed pakakakonsiensia tan panamerdona

 Dakel so rason ya nayarin pakakonsiensiaan tayo. Ompan asakitan tayoy sakey ya inaro tayod bilay odino walay agtayo agawaan ya iisipen tayon dapat ya gawaen tayo. No maminsan, nakokonsiensia tayo anggano agtayo met dapat nakonsiensia. Singa bilang, no masyadon atagtagey so estandarte ya labay tayon aboten, lanang tayon nakonsiensia kada no nalingo tayo. Kanian papasesegen itayo na Biblia ya nepeg ya dugaruga labat so ilaloan tayod sarili tayo.—Eclesiastes 7:16.

 Imbes ya nadismaya la, wala ni nagawaan mo pian nipetek so situasyon. Anto iratan?

•   Amin mo ray lingom. Manpikasi ka ed Dios ya Jehova a tan kerew mon perdonaen to ka. (Salmo 38:18; Lucas 11:4) Makaseguro ka ya dengelen ka na Dios no talagan magbabawi ka tan gagawaen moy anggaay nayarian mon agla uliten itan. (2 Awaran 33:13; Salmo 34:18) Nanenengneng toy tuan inkatoom ya agnanengneng na arum ya too. No nanengneng na Dios ya pansasagpotan tayon itunda so mauges ya kagagawa, “matoor tan matunong” ya perdonaen to iray kasalanan tayo.—1 Juan 1:9; Proverbio 28:13.

   No walay aliwan ginawam ed sakey ya too, siempre kaukolan mon aminen itan tan kerew kay perdona ed sikato. Aliwan mainomay itan! Kaukolan moy manpakpel tan manpaabeba. Balet walay duaran importantin nagawaan na impapuson ikerew na perdona: Nainawaan kan maong tan magmaliw ya mareen lamet so relasyon yo.—Mateo 3:8; 5:23, 24.

•   Nonoten iray teksto nipaakar ed panangasi na Dios. Singa bilang, imanoen so nabasa ed 1 Juan 3:19, 20. Binidbir na Biblia ya nayarin “kokondenaen itayo na puso tayo,” labay ya ibaga et ompan masyadon mauges lay pakanengneng tayod sarili tayo tan pakalikna tayo et ag-itayo makanepegan ed panangaro na Dios. Balet, ibabaga met na satan ya teksto ya “say Dios et mas baleg nen say puso tayo.” Panon? Amta toy amin ya nipaakar ed sikatayo tan natatalosan to ray nalilikna tan kakapuyan tayo. Amta to met ya aliwa tayon perpekto tan mainomay tayoy makagawa na aliwa. b (Salmo 51:5) Kanian agto ipulisay iramay talagan magbabawi ed saray lingo ra.—Salmo 32:5.

•   Agmo la nononoten so apalabas. Dakel so salaysay ed Biblia nipaakar ed lalaki tan bibii ya datin nanggaway aliwa pero inuman day kabibilay da. Say sakey ya alimbawa et si Saulo a taga Tarso, a nagmaliw ya apostol Pablo. Nen Fariseo ni, pinairap ton maong iray papatumbok nen Jesus. (Gawa 8:3; 9:1, 2, 11) Balet nen naamtaan ton say talagan susumpaen to et say Dios tan say Mesias, odino Kristo, nagbabawi si Saulo. Inuman to ray kagagawa to tan nagmaliw ya Kristianon maong so alimbawa to. Siempre, pagbabawian ya maong nen Pablo iray ginawa to nensaman, balet aliwan satan so sankanonot to lan lanang. Amta nen Pablo ya baleg so panangasi na Dios ed sikato kanian nagmaliw ya maseseg ya managpulong tan nampokus ed bilay ya anggapoy anggaan.—Filipos 3:13, 14.

 Jeremias 31:34 “Perdonaen koy lingo ra, tan lingwanan ko lay kasalanan da.”

 Say labay ya ibaga: No pinerdona itayo la na Dios, agto la ipanonot lamet iray lingo tayo. Talagan mapangasi.