Kasin Kasalanan so Pansigarilyo?

I-PLAY

Say ebat na Biblia

Anggapoy nabasad Biblia tungkol ed panagsigarilyo a o arum nin paraan na pangusar ed tabako. Balet wala ray prinsipyo ditan ya mangipapanengneng ya aglabay na Dios iray bisyo ya marutak tan makapuy so epekto tod laman, kanian ipapasen ton kasalanan so pansigarilyo.

Respetoen so bilay. “Say Dios . . . so mangiiter ed amin a totoo na bilay tan linawa.” (Gawa 17:24, 25) Lapud regalo na Dios so bilay tayo, nepeg ya agtayo manggagaway bengatla ya mamatikey ed bilay tayo, singa say pansigarilyo. Diad interon mundo, say panagsigarilyo so sakey ed saray manunan sengegan na ipapatey ya sarag komon a paliisan.
Aroen so kaparan too. “‘Arom so kaparam a too a singa ed sikan dili.” (Mateo 22:39) No mansigarilyo tayo ed kawalaay totoo, agtayo ipapanengneng so panangaro ed sikara. Saramay lanang ya makakasungap na asewek na sigarilyo et baleg so posibilidad ya nawalaan met ira na saray sakit ya miparad sakit na saray mansisigarilyo.
Labay na Dios ya masanto o malinis itayo. “Iyapay yo ray laman yo bilang mabilay a bagat, masanto tan makapaliket ed Dios.” (Roma 12:1) “Linisan tayoy sarili tayo ed amin a karutakan na laman tan espiritu pian magmaliw itayon lalon masanto legan tayon tatakotan so Dios.” (2 Corinto 7:1) Say pansigarilyo et kontra ed pansiansian masanto odino malinis lapud gagagalaen na saray managsigarilyo ya sungapen so samal ya manderal ed laman da.

Kasin walay ibabaga na Biblia tungkol ed panangusar na marihuana o arum ni ran druga?

Anggapoy nabasad Biblia tungkol ed marihuana (tatawagen met ya weed o pot) odino arum ni ran druga. Balet wala ray prinsipyo ditan ya mangipapanengneng ya agnayari mangusar na ontan iran makapaadik ya substansia. Likud ed saramay abitla lan prinsipyo, nia ni ray arum:

Nepeg tayon kontrolen so panagnonot tayo. “Arom si Jehova a Dios mo ed . . . interon nonot mo.” (Mateo 22:37, 38) “Mantultuloy kayon manlikas diad amin a paraan.” (1 Pedro 1:13) Say toon aka-druga et agto nakontrol ya maong so panagnonot to, tan dakel ni ingen so naadik ed druga. Akapokus lay nonot da ed pangala tan pangusar na druga imbes ya diad saray balibalin bengatla.—Filipos 4:8.
Unoren iray batas na gobierno. ‘Ontulok ed saray gobierno tan autoridad.’ (Tito 3:1) Diad dakel ya bansa, iistriktoan na batas so pangusar na druga. No labay tayon paliketen so Dios, nepeg tayon unoren iray sekular ya autoridad.—Roma 13:1.

Say Epekto na Tabako ed Laman Mo

Base ed tantiya na World Health Organization, kada taon et manga anemiran milyon ya totoo so ompapatey lapud panagsigarilyo, kaibay masulok ya 600,000 ya agmansisigarilyo pero makakasungap na asewek na sigarilyo. Imanoen no antoy epekto na tabako ed laman na saray mansisigarilyo tan ed saray makakasungap ed asewek na satan.

Cancer. Say asewek na sigarilyo et walaan na masulok ya 50 kemikal ya panlapuay sakit ya cancer. Ibabaga na Encyclopædia Britannica ya say asewek na sigarilyo so “panisiaan ya sengegan na 90 porsiento na amin ya kaso na lung cancer.” Lapud panagsigarilyo, nayari met ya na-cancer so arum ya parte na laman, singa say sangi, trachea, esophagus, kulokulong, larynx, altey, pancreas, tan bladder.

Sakit ed respiratory. Posiblin panlapuay sakit ya pneumonia tan trangkaso so asewek na sigarilyo. Saray ugugaw ya lanang ya makakasungap na asewek na sigarilyo et mas mainomay ya nawalaay sakit ya asthma, graben panukok, tan say bala da et onkapuy tan nairapan ya ombaleg.

Sakit ed puso. Saray mansisigarilyo et baleg so posibilidad ya na-stroke o nawalaay sakit ed puso. Say carbon monoxide ed asewek na sigarilyo ya akaloob lad bala et tampol ya onlad saray ulat tan paraiseten toy oxygen ed dala. No daiset so oxygen ed dala, nairapan so puso ya mangibuga na oxygen ed laman.

Epekto ed panlukon. Saray malukon ya mansisigarilyo et posiblin ompaway so anak da ya kulang ed bulan, kulang so belat to, odino walay deperensya tod laman, singa bilang nayarin bungis. Nayari met ya nawalaay sakit ed respiratory odino biglan ompatey so ugaw.

a Say panagsigarilyo ya tutukoyen dia et ginagalan pansungap ed asewek na sigarilyo, tabako, odino pipa. Balet, saray prinsipyon wadia et onaplika met ed panaggagal, pansungap na pinulbos ya tabako, pangusar ed electronic a sigarilyo ya walay nicotine to, tan arum nin produkto.