Anto Iratay “Tombok na Panarian”?
Say ebat na Biblia
Saray “tombok na Panarian,” a tatawagen met no maminsan ya “saray tombok paonlad panarian,” et isisimbolo toy autoridad pian lukasan ed saray totoo so tsansan ‘makaloob ed Panarian na Dios.’ (Mateo 16:19; The New American Bible; Gawa 14:22) a Inter nen Jesus ed si Pedro “iray tombok na Panarian na tawen.” Labay ton ibaga, niiter ed si Pedro so autoridad ya ipaamta ya saray totoon walaan na pananisia ed Dios et makaloob ed Panarian diad tawen no naawat day masanton espiritu na Dios.
Parad siopa iray tombok?
Inusar nen Pedro so autoridad ya inter na Dios pian lukasan so dalan parad taloran grupo ya onloob ed Panarian:
Saray Judio tan akombertin Judio. Ag-abayag kayari impatey nen Jesus, pinaseseg nen Pedro iray mananisian Judio ya awaten dan si Jesus so pinili na Dios ya manuley ed Panarian. Impaamta nen Pedro ed sikara no antoy nepeg dan gawaen pian niliktar ira. Kanian nibagan nilukasan to so dalan pian makaloob irad Panarian, tan nilibo so “angawat ed salita to.”—Gawa 2:38-41.
Saray Samaritano. Ag-abayag et imbaki si Pedro ed saray Samaritano. b Inusar to lamet so sakey a tombok na Panarian nen kaiba toy apostol Juan tan ‘impikasi da ra pian makaawat ira na masanton espiritu.’ (Gawa 8:14-17) Atan so angilukas na dalan pian makaloob ed Panarian iray Samaritano.
Saray Gentil. Kayari na talora tan kapalduan taon manlapud impatey nen Jesus, impaamta na Dios ed si Pedro ya saray Gentil (aliwan Judio) et wala met so tsansa dan onloob ed Panarian. Kanian inusar nen Pedro so sakey nin tombok pian pulongan iray Gentil, kanian akaawat iray masanton espiritu, nagmaliw iran Kristiano, tan walay ilalo ran magmaliw ya membro na Panarian.—Gawa 10:30-35, 44, 45.
Antoy labay ya ibaga na ‘iloob ed Panarian’?
Saramay ‘onloob ed Panarian’ et manuley iran kaiba nen Jesus diad tawen. Imbaga na Biblia ya ‘onyurong irad saray trono’ tan “manuley ira bilang arari ed dalin.”—Lucas 22:29, 30; Apocalipsis 5:9, 10.
Saray lingon pakatalos tungkol ed saray tombok na Panarian
Lingon pakatalos: Si Pedro so mandesisyon no siopay makaloob ed tawen.
Katuaan: Ibabaga na Biblia ya si Kristo Jesus, aliwan si Pedro so “mangukom ed saray mabilay tan saray inaatey.” (2 Timoteo 4:1, 8; Juan 5:22) Diad tua, imbagan mismo nen Pedro ya si Jesus so “tinuro na Dios a magmaliw ya ukom na saray mabilay tan inaatey.”—Gawa 10:34, 42.
Lingon pakatalos: Aalagaren na tawen so desisyon nen Pedro no kapigan to usaren iray tombok na Panarian.
Katuaan: Nen impaamta nen Jesus so tungkol ed saray tombok na Panarian, oniay imbaga tod si Pedro: “Siopaman a singeren mo naani ed dalin nasinger naani ed tawen; tan siopaman ya ukbaran mo ed dalin naukbaran naani ed tawen.” (Mateo 16:19, Say Biblia) Anggano say pakatalos na arum ed saya et aalagaren na tawen so desisyon nen Pedro, nanengneng ed orihinal iran Griegon salita ya uunoren to labat so desisyon ed tawen tan aliwan sikato so unonan mandesisyon.
Nanengneng ed arum ya bersikulo ed Biblia ya uunoren nen Pedro so desisyon ed tawen no uusaren to ray tombok na Panarian. Singa bilang, inunor to iray instruksion na Dios nen inusar toy komatlon tombok.—Gawa 10:19, 20.
a No maminsan, uusaren na Biblia so terminon “tombok” pian isimbolo so autoridad tan responsabilidad.—Isaias 22:20-22; Apocalipsis 3:7, 8.
b Duma so relihyon na saray Samaritano ed saray Judio pero manisia met irad arum ya bangat tan kaugalian ed Mosaikon Ganggan.
Ompan Nagustoan Mo Met
EBAT ED SARAY TEPET ED BIBLIA
Anto so Panarian na Dios?
Amtaen no akin ya say gobierno na Dios et superyor ed amin ya gobierno.
ESSENTIAL BIBLE TEACHINGS
Anto so Panarian na Dios?
Legan na ministeryo nen Jesus, say manunan topic ya imbangat to et say Panarian na Dios. Nilasus taon lan ipipikasi na saray papatumbok to ya onsabi la komon itan ya Panarian.
EBAT ED SARAY TEPET ED BIBLIA
Siopa ray Onlad Tawen?
Dakel so totoo ya lingo so pakatalos da ya onlad tawen so amin ya maong a totoo. Anton talaga so ibabangat na Biblia?
BANGAT NA BIBLIA
Salien so Panag-aral na Biblia
Salien so libre ya interactive ya panag-aral na Biblia ya walay personal ya manbangat ed sika.