Inusar na arum ya daan ya patalos na Biblia ed English ya singa say King James Version so salitan “impierno” ed pigaran bersikulo. (Salmo 16:10; Gawa 2:27 a) Dakel so totoon manisia ya say impierno et sakey ya pasen ya tuloytuloy so apoy tan ditan dudusaen iray mauges ya totoo ya singa nanengneng ed artwork na sayan artikulo. Balet atan kasi so ibabangat na Biblia?

Diad sayan artikulo

•  Kasin say impierno et sakey ya pasen ya tuloytuloy so panirap?

•  Antoy tutukoyen nen Jesus ed samay parabolo to nipaakar ed sakey ya toon mayaman tan si Lazaro?

•  Kasin irerepresenta na impierno ya say inatey et niyarawi la ed Dios?

•  Wala la kasi so akapaway ed impierno?

•  Saray bersikulo na Biblia nipaakar ed impierno odino Lubok

•  Saray salita ed orihinal ya lenguahe na Biblia

•  Say history na impierno

 Andi. Saray orihinal ya salitan impatalos bilang “impierno” ed arum ya daan ya patalos na Biblia (diad Hebreo et “Sheol”; diad Griego et “Hades”) et ontutukoy labat ed “Lubok,” labay ton ibaga et say kaslakan ya pangipoponponan ed saray inatey ya totoo. Ipapanengneng na Biblia ya saray totoon walad “Lubok” et anggapo la ra.

•   Anggapo lay amta na saray inatey kanian agda la naliknay sakit. “Anggapoy kimey, odino kanonotan, odino karunongan, odino kakabatan diad impierno.” (Eclesiastes 9:10, Douay-Rheims Version) Anggapoy narengel ya totoon oneeyag lapud sakit diad impierno. Imbes, oniay ibabaga na Biblia: “Komon ta nabaingan iray mauges, tan agmo ra papaeselen ed lubok [impierno, Douay-Rheims].”—Salmo 31:17; King James Version (30:18, Douay-Rheims); Salmo 115:17.

•   Imbaga na Dios ya say bayar na kasalanan et patey, aliwan panirap ed maapoy ya impierno. Imbaga na Dios ed unonan too, ya si Adan, ya ompatey no agto unoren so ganggan na Dios. (Genesis 2:17) Anggapoy imbaga Ton tuloytuloy ya manirap ed impierno. Tan nen nankasalanan si Adan, oniay imbaga na Dios ya magmaliw ya dusa to: “Lapud dabok ka, ompawil ka ed dabok.” (Genesis 3:19) Kanian anggapo lay Adan. No talagan pairapen na Dios si Adan ed maapoy ya impierno, di binitla To komon itan. Agni inuman na Dios so dusa parad saramay ag-onuunor ed ganggan to. Dakel ya taon kayari na impankasalanan nen Adan, oniay impaisulat na Dios ed Biblia: “Say bayar na kasalanan et patey.” (Roma 6:23) Anggapo lay kaaruman ya dusa ta “say sakey ya inatey la et nibulos la ed kasalanan to.”​—Roma 6:7.

•   Makapadimla ed Dios so ideyan tuloytuloy ya pamairap. (Jeremias 32:35) Kontra itan ed bangat na Biblia ya “say Dios et aro.” (1 Juan 4:8) Labay ton mandayew tayod sikato ta inaro tayo, aliwan lapud antakot tayoy tuloytuloy ya nadusa.—Mateo 22:36-38.

•   Linmad impierno iray maong ya totoo. Ipapanengneng na saray Biblian angusar ed salitan “impierno” ya amta na saray matoor ya lalakin singa si Jacob tan Job ya onla rad impierno. (Genesis 37:35; Job 14:13) Abitla met ya anggan si Jesu-Kristo et walad impierno nen inatey ya anggad nen abilay lamet. (Gawa 2:31, 32) Mapatnag sirin ya no uusaren na saratan ya Biblia so salitan “impierno,” say tutukoyen da et say Lubok. b

 Inusar nen Jesus iyan parabolo ya nabasad Lucas 16:19-31. Saray parabolo et ilustrasyon ya pakaaralan na saray importantin katuaan tan no antoy panmoria na Dios. Kanian say parabolo nipaakar ed toon mayaman tan si Lazaro et aliwan tuan agawa. (Mateo 13:34) Parad kaaruman ya impormasyon nipaakar ed sayan parabolo, nengnengen so artikulon “Siopa may Mayaman a Too tan si Lazaro?”

 Andi. Say doktrina ya say inatey et amta ton niyarawi la ed Dios et kontra ed ibabangat na Biblia, ta malinew ya naaralan ed Biblia ya saray inatey et anggapon balot so amta ra.​—Salmo 146:3, 4; Eclesiastes 9:5.

 On. Wala ray detalyadon salaysay ed Biblia nipaakar ed siameran totoo ya linmad Lubok (ya nipatalos bilang “impierno” ed arum ya Biblia) insan abilay ira lamet. c No talagan walay amta ra legan iran walad impierno, inistorya da komon no anto ray agawad sikara diman. Pero anggapoy anggan sakey ed sikara so angistoryan apairap odino walay antokaman ya agawad sikara. Akin ey? On ta ibabangat na Biblia ya anggapoy amta ra, singa ra “naugip” na araldalem.—Juan 11:11-14; 1 Corinto 15:3-6.