No maminsan, iisipen na arum ya mandadayew ed Dios no kasin sulit ya unoren iray prinsipyo ed Biblia. (Salmo 73:2, 3) Ompan salien da ya gawaen iray kontra ed ganggan nen Jehova insan iyamot da iratan ed kapananisiaan da.

 Makatulong iyan artikulo ed saramay doble so panagbilay da pero labay da lan itunda itan.

Diad sayan artikulo

•  Anto so doblin panagbilay?

•  Kasin mauges ak ya too no doble so panagbilay ko?

•  Panon kon nitunda so doblin panagbilay?

•  No antoy ibabaga na arum ya kabataan

 Nibagan doble so panagbilay mo no gagawaen mo ray antam ya aliwa no kaibam iray totoon ag-manguunor ed si Jehova; balet no kaibam iray agagi ed kongregasyon, say ipapanengneng mo et labay mon panlingkoran si Jehova. Duaran klase so kabibilay mo, tan singa ka akasulong na maskara ta walay iyaamot mo.

 “No doble so panagbilay mo, parehon walay iyaamot mo ed saray agagi tan ed saray nakakaibam ya agmandadayew ed Dios, kanian anggapoy makankabat ed tuan inkatoom. Labay ton ibaga, lolokoen mo ran amin.”—Erin.

 Kasin antam? Doble met so panagbilay na sakey no gagawaen to ray aglabay nen Jehova no anggapoy makakanengneng ed sikato.

 “Nen 14 so taon ko, ginmapo ak ya nan-browse na saray imoral ya picture tan video diad Internet. Ipapanengneng kod arum ya agko labay so pornograpiya, pero diad tua et labay ko.”—Nolan.

 Prinsipyo ed Biblia: “Anggapoy toon nayarian toy manpaaripen ed duaran katawan; ta balanglan busolen to imay sakey tan aroen to imay sananey, odino sikatoy mansiansia ed sakey tan balawen to imay sananey.”—Mateo 6:24.

 Andi met. Siempre, wala ray totoo ya agdan talaga labay ya unoren so estandarte na Biblia. Pero ontan ka met kasi? Odino wala ray rason mo, singa bilang:

•   Natatakot ka ya isipen na saray kakaibam ya duma ka ed sikara.

•   Mas nakasundom iray schoolmates mo nen saray agagi.

•   Naiirapan ka tan singa agmo nasarag ya unoren iray ganggan na Dios.

 “Seguro kanian labay na arum ya kabataan so miulop ed saray agmanguunor ed prinsipyo na Biblia ta labay da ya walay kakaaro da. Pero say problema, anggan siopa lad tan.”—David.

 Pero siempre, aliwa iratan ya rason pian magmaliw ya doble so panagbilay tayo. Balet ipapanengneng na satan ya anggan saray maong ya totoo et nayarin natukso ya manbilay na ontan. No ontan so situasyon mo, antoy gawaen mo?

1.  1. Isip moy paraan na kabibilay mo natan. Tepetan moy sarilim: ‘Kasin onia so klase bilay ya labay ko? No paulyanan ko labat iya, anto kasi magmaliw ya resulta?’

    Prinsipyo ed Biblia: “Say marunong et . . . nanenengneng toy peligro, balet say andiay kakabatan et ondidiretso tan aanien to ray pansumpalan.”—Proverbio 27:12.

2.  2. Ibagam so tua. Ibagam so situasyon mo ed saray atateng mo o diad matatken ed espiritual ya kaarom. Seguradon maliket iran ontulong tan proud irad sika ta labay mon gawaen so duga!

    “Nairapan kon aminen ed arum ya doble so panagbilay ko, pero nen nibagak la, nainawaan ak ya maong.”—Nolan.

    Prinsipyo ed Biblia: “Samay sasakbongan to ray kasalanan to et ag-ontalona, balet siopaman a mangipapatua tan mangipupulisay ed saratan et nakasian.”—Proverbio 28:13.

3.  3. Awat moy resulta na ginawam. Tandaan mo ya abalang moy tiwala na atateng mo tan na agagi ed kongregasyon lapud walay inyamot mo ed sikara. Lapud satan, nayarin wala ray restriksion ya iter ed sika na atateng mo odino na saray elder ed kongregasyon. Awat mo iratan, tan manlapud natan et gawam so anggaay nayarian mon “manbilay a matua ed amin ya bengatla”.—Hebreo 13:18.

    Prinsipyo ed Biblia: “Dengel kad simbawa tan awat moy disiplina, pian magmaliw kan marunong diad arapen mo.”—Proverbio 19:20.

4.  4. Tandaan mo ya inar-aro ka na Dios. Lapud inar-aro itayo nen Jehova, iimanoen ton amin so gagawaen tayo. Kanian no doble so panagbilay mo, amta to itan kanian napaermen mo so puso to. Pero ‘lapud iyaansakit to ka,’ labalabay to kan tulongan pian nauman moy kabibilay mo.—1 Pedro 5:7.

    Prinsipyo ed Biblia: “Ta saray mata nen Jehova et onnenengneng ed interon dalin pian ipatnag toy biskeg to parad saramay matoor so puso rad sikato.”—2 Awaran 16:9.