Oniay imbaga nen Elaine, sakey ya tinedyer: “No nanenengneng ko ya nilasus so followers na saray kaklasek, naisip ko, ‘Grabe—sikat ira!’ Aminen ko, medyo naiinggit ak.”

 Kasin aliknam met la itan? No on, natulongan ka na sayan artikulo pian naiwasan moy tukso ya manparakel na man-follow tan man-like ed sika diad social media.

•  Anto ray peligro?

•  “Papapawayen dan sikat ira”

•  Panon kaimportante ed sika iray followers tan likes?

•  Agka magmamaliw ya “mapaabeba pero mayabang”

 Diad Proverbio 22:1, ibabaga na Biblia ya “say maabig a ngaran et nepeg a pilien nen say dakel a kayamanan.” Kanian ayos labat sirin ya labay mon marakep so reputasyon mo, tan labay mon nalabayan ka na arum.

 Balet no maminsan, ompan diad sobran panlabay mo ya awaten ka na arum et agka la maliket no agka sikat. Mapeligro kasi itan? On, so ebat nen Onya ya mantaon na 16:

 “Wala ray totoon ambabangil so gagawaen da pian onsikat ira, singa bilang, diad eskuelaan mi wala ray ontataboy manlapud second floor na bilding.”

 Pian napansin ira na kapara dan kabataan, wala ray totoon i-video day sarili da ya manggagaway andi-kakanaan ya bengatla insan da i-post. Singa bilang, wala ray tinedyer ya nan-upload na video da ya mangakan ira na laundry detergent pods—sabon iratan ya walad capsule tan makasamal iratan. Ag-itan nepeg ya gawaen na anggan siopan too!

 Oniay ibabaga na Biblia: “Agkayo manggagaway antokaman lapu labat . . . [ta] labay yoy mampasirayew.”—Filipos 2:3, Maung a Balita.

 Isipen pa:

•   Panon kaimportante ed sika so pagmaliw ya sikat ed social media?

•   Kasin ipeligrom so laman mo o bilay mo pian labat napansin ka tan awaten ka na saray kaparam ya kabataan?

 Wala ray arum ya agda met ipepeligroy bilay da pian magmaliw iran sikat. Naimano nen Erica ya mantaon na 22, so arum nin gagawaen na saray kabataan:

 “Post lan post iray totoo na saray balibalin nagagawad bilay da, tan ompapaway ya singa dakdakel so kakaaro da ta nandurumay kaiba da ed post da. Papapawayen dan sikat ira.”

 Imbaga nen Cara ya mantaon na 15, ya wala ray totoon mantitila pian labat onsikat ira:

 “Wala ray totoon manpo-post na litrato da ya singa ra walad party pero diad tua et wala ra labat ed abung da.”

 Inamin nen Matthew ya mantaon na 22, ya ginawa to met itan:

 “Nan-post ak na litratok tan say in-tag kon location et Mount Everest, anggano agak nin balot akakar ed Asia!”

 Oniay ibabaga na Biblia: “Labay mi manbilay a matua ed amin a bengatla.”—Hebreo 13:18.

 Isipen pa:

•   No manguusar kay social media, kasin manpo-post kay aliwan tua pian labat onsikat ka?

•    Kasin nanenengneng ed saray litrato tan comment mo no siopa kan talaga tan no anto ray papanisiaan mo?

 Iisipen na arum ya dapat dakdakel so followers tan likes mo pian sikat kad social media. Inamin nen Matthew ya ontan so iisipen to nensaman:

 “Tetepetan ko ray arum ya totoo, ‘Pigara lay followers yo?’ odino ‘Pigaray sankarakelan ya likes ed im-post yo?’ Pian ondakel so follower ko, man-follow ak na totoon anggan agko kabat pian i-follow da ak met. Labalabay koy onsikat, tan mas lalon asugsogan ak lapud social media.”

 Naimano nen Maria ya mantaon na 25, ya wala ray totoon say panamabli da ed sarili da et akadepende ed karakel na man-follow tan man-like ed sikara:

 “No daiset so nan-like ed selfie na sakey ya bii, isipen to laingen pangit so sarili to. Siempre aliwa itan, balet ontan so kaslakan ya reaksion na totoo. Sikara lanlamang so manbu-bully ed sarili da.”

 Oniay ibabaga na Biblia: “Ag-itayo komon magmaliw a mapaatagey, a mangilalagyat na panlalaslasan tan paniibegan.”—Galacia 5:26.

 Isipen pa:

•   No active kad social media, napapansin mo kasi ya lapud satan et nikokomparam lay sarilim ed arum?

•    Kasin mas importante ed sika so karakel na follower nen say pakawalaan na tuan kakaaro?