No ibukay moy Biblia, puro salita so nanengneng mo. Agka komon nadidismaya ed satan. Imbes, isip mo ya say Biblia et singa buffet table ya napnapnoy naakan. Agmo nayarin kanen ya amin so nanenengneng mo. Balet sarag moy manpili na kanen mo ya talagan napesel ka.

 Pian talagan nagunggonaan ka ed pambasam na Biblia, kaukolan moy manpokus ed babasaen mo. Natulongan ka na sayan artikulo ya gawaen itan.

Diad sayan artikulo

•  Akin ya kaukolan moy manpokus ed babasaen mod Biblia?

•  Panon kan nagunggonaan ya maong ed pambasam na Biblia?

•  No antoy ibabaga na arum ya kabataan

 No mas mansasagpot kad pambabasam na Biblia, mas lalo kan nagunggonaan. Isip mo pa: No isawsaw mo labat ya magano so tsaa ed danum, natawayan mo met itan na daiset. Pero mas ompaway so taway to no abayag mon intalem.

 Ontan met ed panagbasa na Biblia. Imbes ya apuraen moy manbasa, nonot mon maong no antoy nitulong ed sika na satan. Ontan so ginawa na angisulat ed Salmo 119. No nipaakar ed ganggan na Dios, oniay imbaga to: “Naynay kon dadalepdepen itan.”—Salmo 119:97.

 Balet aglabay ya ibaga na satan ya sanagew mon basaen so Biblia. Say punto: Angigana so salmista na panaon pian dalepdepen so Salita na Dios. Tan atan so akatulong ed sikato pian makapanggawa na maong iran desisyon.—Salmo 119:98-100.

 “Imbagad siak nen mamak, ‘Walay pitoran agew ed sakey simba, tan maslak ya gagawaen mod saratan et parad sarilim. Anto kasi no ikdan mo met na panaon si Jehova? Aman so duga!’”—Melanie.

 No sankanonot mo ray prinsipyo na Biblia, mas makapanggawa kay maong iran desisyon—singa bilang, no manpipili kay kakaaro odino no natutukso kan manggaway aliwa.

•   Manplano ka. “Mangi-set na eskedyul parad pambasam na Biblia,” so kuan na kabataan ya si Julia. “Dapat akaplano la no antoy basaen mo, kapigan ka manbasa, tan no iner ka manbasa.”

•   Segurom ya makapampokus ka legan kan manbabasa. “Mananap kay mareen ya pasen,” so kuan na kabataan si Gianna. “Ipaamtam met ed saray kapamilyam so eskedyul mod panagbasam na Biblia pian agda ka naisturbo.”

   No manbabasa kad elektronikon gadyet, erep moy amin ya notification. Sarag mo ingen ya salien so manbasa ed printed ya Biblia. Diad tua, base ed research et mas mainomay mon natalosan so babasaen mo no aka-print. Pero no diad screen so pambabasaan mo, mas nairapan kan manpokus.

   “Agak makapokus no manbabasa ak ed gadyet. Wala ray notification odino na-lowbatt odino onkapuy so Internet. Pero no diad printed ya libro, say kaukolan ko labat et magenap ya liwawa.”—Elena.

•   Manpikasi ka ni. Patulongan ka ed si Jehova ya natalosan, natandaan, tan nagunggonaan ed parte na Biblia ya labay mon basaen.—Santiago 1:5.

   Pian nipanengneng mo ya pankikimeyan moy impikasim, paaralem mo ni antam ed salaysay ya babasaen mo. Panon mon nagawaan itan? No JW Library app so uusaren mo odino manbabasa kay Biblia diad online, sarag mon i-click so bersikulo pian makalmo kay kaaruman iran impormasyon tan saray artikulo nipaakar ed satan.

•   Tepetan moy sarilim. Singa bilang: ‘Antoy naaralan kod sayan salaysay tungkol ed si Jehova? Wala kasi nanenengneng ko dia ya kualidad ton sarag kon aligen?’ (Efeso 5:1) ‘Antoy naaralan ko ed sayan salaysay ya sarag kon iyaplikad bilay ko?’ (Salmo 119:105) ‘Nausar ko kasi iyan abasak pian natulongan koy arum?’—Roma 1:11.

   Sarag mo met ya itepet ed sarilim, ‘Antoy koneksion na sayan abasak ed tema na Biblia?’ Importante itan ya tepet. Akin? Lapud amin ya walad Biblia—manlapud Genesis ya anggad Apocalipsis—et mikonektaan ed sakey a manunan tema: No panon ya pasantoen nen Jehova so ngaran to panamegley na Panarian to ed tawen tan pruebaan ton sikato so walaan na karapatan ya manuley tan say paraan na panuuley to so sankaabigan.