Ibabaga na Biblia ya “si Jehova et agto isiblet so antokaman a maong a bengatla ed saramay manaakar a walaay integridad.” (Salmo 84:11) Antoy labay ya ibaga na “manaakar a walaay integridad”? Aya may manbilay ka unong ed samay insipan mod si Jehova nen indedikam so bilay mo ed sikato. (Eclesiastes 5:4, 5) Panon kan makapanakar ya walaay integridad kayari na bautismom?

Diad sayan artikulo

•  Tuloytuloy ya anosan iray problema

•  Tuloytuloy ya labanan iray tukso

•  Pansiansiam so seseg mo

 Ibabaga na Biblia: “Nepeg itayon ondalan ed dakel ya irap pian makaloob itayo ed Panarian na Dios.”—Gawa 14:22.

 Say labay ton ibaga: Diad tua, amin ya Kristiano et maka-eksperiensya na dakel ya problema ed bilay. Singa bilang, ompan balawen odino pairapen da ka lapud Kristiano ka. Tan wala met iray problema ya apektado so amin, singa say problemad kuarta tan sakit.

 No antoy nayarin nagawa: Nayarin manguman so kipapasen mod bilay, tan no maminsan diad paraan ya agmo labay. Ibabaga na Biblia ya nayarin walay aliwliwan nagawa ed anggan siopa—Kristiano man o andi.—Eclesiastes 9:11.

 No antoy nagawaan mo: Antam la ya wala ray probleman onsabi kanian makapanparaan ka no panon mon arapen iratan. Isip mo ya no walay problema, pankanawnawam itan ya pabiskegen so pananisiam tan mas mantiwala ed si Jehova. (Santiago 1:2, 3) Onsabi panaon ya nibagam met may imbaga nen apostol Pablo: “Walay biskeg kon arapen so amin a bengatla lapud samay mangiiter ed siak na pakayari.”—Filipos 4:13.

 Tip: Kabaten si Jose. Nabasam so istoryay bilay to diad Genesis kapitulo 37 tan 39 anggad 41. Isipen iya: Anto ray probleman agto iilaloan ya onsabid sikato, tan panon ton inarap iratan? Panon ya tinulongan nen Jehova si Jose?

 Ompan makatulong iya:

•   Basaen:

   “Antoy Gawaen Ko no Walay Agawan Makapaermen Diad Pamilya Mi?”

   “Kasin Matibay Ak?”

   “No Panon Kan Makapan-adjust ed Pananguman”

•   I-download:

   “No Mansasakit so Ateng”

 Ibabaga na Biblia: “Balet nasusubok so kada sakey sano sikatoy nasagyat tan natangguyor na dilin pilalek to.”—Santiago 1:14.

 Say labay ton ibaga: No maminsan, ompan natukso itayo ed saray pilalek tayo, tan no agtayo iratan nakontrol et makapanggawa tayoy aliwa.

 No antoy nayarin nagawa: Kayarim ya manpabautismo, naliknam nin siansia iray “pilalek na laman.” (2 Pedro 2:18) Ompan natukso ka ni ingen ya mi-sex anggan agka ni kasal.

 No antoy nagawaan mo: Antis ka nin natukso, mandesisyon ka la natan ya agmo abuloyan iray pilalek mo ya mangidikta no antoy gawaen mo. Tandaan so imbaga nen Jesus: “Anggapoy toon nayarian toy manpaaripen ed duaran katawan.” (Mateo 6:24) Sarag mon pilien no siopay unoren mo. Pilim si Jehova. Anggan panon kabiskeg so mauges ya pilalek, sarag moy mandesisyon ya agbalot gawaen itan.—Galacia 5:16.

 Tip: Amtaen no iner ka mabiskeg tan no anto ray kakapuyan mo. Pilim iray kakaaro ya ontulong ed sikan napapaway iray balibalin kualidad mo. Iwasan iray totoo, lugar, tan situasyon ya nayarin makatukso ed sika ya manggaway aliwa.—Salmo 26:4, 5.

 Ompan makatulong iya:

•   Basaen:

   “Panon Kon Nalabanan so Tukso?”

   “Panon Kon Nitunda so Pannonot ed Sex?”

   “No Panon ya Nalabanan so Desdes na Kalimog”

   “Kasin Aaligen Moy Paraan na Panagnonot nen Jehova?”

 Ibabaga na Biblia: “Itultuloy ya ipanengneng na kada sakey ed sikayo so ontan ya inkakuli yo . . . pian agkayo magmaliw a mangiras.”—Hebreo 6:11, 12.

 Say labay ton ibaga: No say sakey et ag-akapokus ed gagawaen to, ompan ontayam tan magmaliw ya mangiras.

 No antoy nayarin nagawa: Seguro eksayted kan maong tan masetseseg ka kayarim ya nampabautismo. Inar-arom si Aman Jehova. Balet kalabas na panaon, ompan nairapan ka la ya lanang ya unoren si Jehova kanian nayarin nadismaya ka tan nabawasan so seseg mo.—Galacia 5:7.

 No antoy nagawaan mo: Ituloy mon gawaen no antoy duga anggano no maminsan et singa agmo labay ya gawaen itan. (1 Corinto 9:27) Ituloy mo met so onapit ed Amam ed tawen diad panaral mo pian mas nakabat mo ni tan diad lanang mon pitongtong ed sikato diad pikakasi. Ontan met, mikaaro ka ed saramay labalabay day manlingkor ed si Jehova.

 Tip: Tandaan mo ya inar-aro kan maong nen Jehova tan labay to kan tulongan. Agmo iisipen ya ombabarong ed sika no abalang ya agano so seseg mo. Oniay ibabaga na Biblia: “Iikdan toy pakayari iray naksawan, tan pakakasilen ton maong iramay andiay biskeg.” (Isaias 40:29) Bendisyonan to ray sagpot mo ya napapawil so seseg mo.

 Ompan makatulong iya:

•   Basaen:

   “Kabataan—Itultuloy Yon Pansagpotan so Pakaliktar Yo”

   “Paano Ko Gagawing Kasiya-siya ang Pagsamba sa Diyos?”

•   Bantayan:

   No Antoy Ibabaga na Arum ya Kabataan—Talagan Maliket so Bilay Ko

 Tandaan: No tuloytuloy kan manakar a walaay integridad, napaliket moy puso nen Jehova! (Proverbio 27:11) Maliket si Jehova ta pinilim so onkampi ed sikato, tan iter tod sikay amin ya kaukolan mo pian nalabanan mo ray iyaataki nen Satanas.