Singa makapa-excite no isipen mon ombiig ka lay ayaman, pero singa makapataktakot met. Panon mon naamtaan no talagan sarag mo lay ombiig?

•  Isip moy rason no akin ya labay mo lay ombiig

•  Kuentam so gastos

•  No antoy ibabaga na arum ya kabataan

 Ompan dakel so rason ya labay mo lay ombiig​—tan nayarin aliwan duga so arum ed saratan. Alimbawa, oniay imbaga na kabataan ya si Mario: “Labay koy ombiig pian natakasan ko la ray responsabilidad kod abung.”

 Diad tua, mas ondakel so responsabilidad mo no ombiig ka. “No ombiig ka la,” kuan nen Onya ya 18 so taon to, “sika lay manlinis ed panaayaman mo, sika lay akauley ed kanen mo, sika lay manbayar na kuryente tan danum​—tan agka bastabasta natulongan na atateng mo ta agmo la ra kaiba!”

 Tandaan: Isip mon maong so rason no akin ya labay mo lay ombiig pian naamtaan mo no talagan sarag mo la.

 Imbaga nen Jesus: “Siopad sikayo so malabay a mangipaalagey na tori ya agni onyurong ya unona tan kuentaen toy nagastos pian naseguro to no kasin walay magenap a panumpal tod satan?” (Lucas 14:28) Panon mon ‘kuentaen so nagastos’ ed ibiig mo? Itepet mo iraya ed sarilim:

  KASIN ANTAK SO MANTIPON O MAGASTOS AK?

 Ibabaga na Biblia: “Say kuarta et sakey a proteksion.”—Eclesiastes 7:12.

•  Kasin agak makakatipon?

•  Kasin magastos ak?

•  Kasin onuutang ak ya lanang?

 No on so ebat mo ed anggan sakey labat ed sarayan tepet, ompan say iisipen mon balibalin bilay no akabiig ka la et puro problema manaya!

 “Binmiig si kuyak nen 19 to. Sakey taon ni labat, naupot lay tipon to, arimata may kotse to, a-cancel may credit card to ta agla makakabayar, kanian mikakasi ya ompawil lad abung mi.”​—Danielle.

 No antoy sarag mon gawaen natan: Tepetan mo ray atateng mo no manga pigaray nagagastos da ed sakey bulan. Anto ray babayaran dad abung, tan panon dan iba-budget so nanaalmo dan kuarta pian nabayaran iratan? Panon iran makakatipon?

 Tandaan mo: No antam so mantipon tan aralen moy magmaliw ya agmagastos legan ya wala ka nid pudir na atateng mo, niparaan moy sarilim ed realidad na bilay no bilang ta ombiig ka la.

  KASIN WALAY DISIPLINAK ED SARILIK?

 Ibabaga na Biblia: “Kada sakey et nepeg ton sakbaten so dilin responsabilidad to.”​—Galacia 6:5.

•  Kasin agko gagawaen ya tampol iray nepeg kon gawaen?

•  Kasin kaukolan ak nin panonotan na saray atateng ko ed saray kimey kod abung?

•  Kasin lanang lan agak onsesempet ed oras ya imbaga na atateng ko?

 No on so ebat mo ed anggan sakey labat ed sarayan tepet, ompan mas nairapan kan magmaliw ya responsable no ombiig ka la.

 “No ombiig ka la, wala ray kaukolan mon gawaen anggano agmo labay. Anggapoy mangiganggan ed sika ya gawaen mo iratan, kanian dapat ya walay disiplinam ed sarilim tan ipasal mo.”​—Jessica.

 No antoy sarag mon gawaen natan: Diad loob na sakey bulan, gawam iray arum nin kimey ed abung anggad sarag mo. Alimbawa, manlinis kay abung ya bukor mo, ipesak moy kawes mo, mitindaan ka, sikay manluto na pangdeman yo, tan sika met lay mansinop na anganan yo. Makatulong itan pian nawalaan kay ideya no antoy magmaliw ya bilay mo no ombiig ka la.

 Tandaan: Importante so disiplina ed sarili no akabiig ka la.

  KASIN NAKONTROL KOY EMOSYON KO?

 Ibabaga na Biblia: “Amin iraya et nepeg yon ekalen ed inkasikayo: say sanok, pasnok, kaugsan, makapasakit iran salita.”​—Colosas 3:8.

•  Kasin naiirapan ak ya mibagay ed arum?

•  Kasin mipepetang so ulok?

•  Kasin labay kon siak a lanang so naunor?

 No on so ebat mo ed anggan sakey labat ed sarayan tepet, ompan nairapan ka no wala lay roommate mo​—odino diad ilabas na panaon, nairapan ka met no wala lay asawam.

 “Nen binmiig ak tan wala ray roommate ko, naamtaan ko ray kaukolan kon i-improve ed sarilik. Dati, iisipen ko ya anosan la na arum so aliwliwan ugalik no nai-stress ak. Pero naaralan ko ya agko dapat idamay so arum ed stress ko.”​—Helena.

 No antoy sarag mon gawaen natan: Aral moy mibagay ed atateng mo tan agagim anggano makakagawa ray lingo odino wala ray ugali dan agmo labay. Ta diad tua, say panagtratom ed sikara natan et pakanengnengan no panon mon tratoen iray magmaliw ya kaamong mo no ombiig ka la.

 Tandaan: Say ibiig na ayaman et aliwan paraan pian natakasan mo ray responsabilidad mo ed abung. Kaukolan moy manparaan antis na ibiig mo pian nasarag mo. Maong no mitongtong kad saramay asarag da. Tepetan mo ra no anto ray labay dan umanen ed saray desisyon da odino no anto ray naamtaan da la komon nensaman ya natan da labat naamtaan. Balibalin itepet mo iratan ed arum ed anggan anton importantin desisyon ya gawaen mo!