1 Corinto 11:1-34
11 Alig yo ak komon, a singa pangaalig ko ed si Kristo.
2 Natan et irarayew ta kayo lapud nononoten yo ak diad amin a bengatla tan maapit yon uunoren iray bangat a singa nen inyawat ko iratan ed sikayo.
3 Balet labay kon naamtaan yo a say ulo na balang laki et say Kristo; tan say ulo na bii et say laki; tan say ulo na Kristo et say Dios.
4 Balang laki a manpipikasi odino manpropropesiya ya akapandong et mamapabanday ed ulo to;
5 balet balang bii a manpipikasi odino manpropropesiya ya ag-akapandong et mamapabanday ed ulo to, ta sikatoy mipadpara ed sakey a bii ya akiskisan so ulo to.
6 Ta no agmanpapandong so sakey a bii, sikatoy napuklisan met komon; balet no mabanday parad sakey a bii a sikatoy napuklisan odino nakiskisan, sikatoy manpandong komon.
7 Ta say sakey a laki et agto nepeg a pandongan so ulo to, ta sikatoy kaulibay tan gloria na Dios; balet say bii et gloria na laki.
8 Ta say laki et agnanlapud bii, noagta say bii so nanlapud laki;
9 sakey ni, say laki et ag-apalsa nisengeg ed bii, noagta say bii so apalsa nisengeg ed laki.
10 Satan so makasengeg no akin a say bii et nepeg a nawalaan na tanda na autoridad diad ulo to lapud saray anghel.
11 Nilikud ed satan, nipaakar ed Katawan et anggapoy bii no anggapoy laki odino anggapoy laki no anggapoy bii.
12 Ta unong a say bii et nanlapud laki, say laki et diad panamegley met na bii; balet amin a bengatla et nanlapud Dios.
13 Sikayon mismo so mangukom: Manepeg kasi a manpikasi ed Dios so sakey a bii ya ag-akapandong?
14 Agta ibabangat ed sikayo na palsa a kababaingan ed sakey a laki no andukey so buek to;
15 balet gloria ed sakey a bii no andukey so buek to? Lapud niiter ed bii so buek to imbes a sakey a sakbong na ulo.
16 Anggaman ontan, no say sakey a too et singano labay toy onsuppiat pian ontumbok ed arum a kustombre, amta tayo ya anggapo lay arum a kustombre tayo, anggan saray kongregasyon na Dios.
17 Balet, legan ya iiter ko irayan bilin, agta kayo irarayew lapud say pantitipon yo et pankaugsan, aliwan pankaabigan.
18 Ta manuna ed amin, sano mantitipon kayo ed sakey a kongregasyon, narerengelan ko a walaray inkaapag-apag ed limog yo; tan anggan panon et manisia ak ed satan.
19 Ta seguradon wala met iray sekta diad limog yo, pian saray totoon naabobonan et napatnagan met diad limog yo.
20 Kanian sano mantitipon kayo ed sakey a pasen et agkayo makanepegan a mangan ed pangdem na Katawan.
21 Ta sano kanen yo la itan, kada sakey et mamangan lay pangdeman ton dili, kanian samay sakey et narasan balet samay sananey et abuek.
22 Agta wala met iray kaabungan yo a panganan tan paninuman yo? Odino kasin mumudmoraen yo so kongregasyon na Dios tan gagawaen yon kababaing iramay andian na naakan? Antoy ibagak ed sikayo? Kasin irayew ta kayo? Diad saya et agta kayo irayew.
23 Ta inawat ko ed Katawan imay inyawat ko met ed sikayo, a diad samay labi ya iyawat lay Katawan a Jesus et sikatoy angala na tinapay
24 tan kayari ton akisalamat, pinisag to itan tan inkuan to: “Saya so mankabaliksay laman ko a parad sikayo. Itultuloy yon gawaen iya bilang pakanodnonotan ed siak.”
25 Ontan met so ginawa to ed kopa, kayari ton nangdem, ya inkuan to: “Sayan kopa et mankabaliksay balon sipanan a pinaletan na dalak. Itultuloy yon gawaen iya, kapagno inumen yo itan, bilang pannodnonot yo ed siak.”
26 Ta kapagno kakanen yo iyan tinapay tan iinuman yo iyan kopa, iyaabawag yo so impatey na Katawan, anggad isabi to.
27 Lapud saya, siopaman ya agmakanepegan a mamangan na tinapay tan oniinum ed kopa na Katawan, sikatoy mankasalanan nipaakar ed laman tan dala na Katawan.
28 Usisaen ni komon na sakey a too so inkasikaton dili no kasin makanepegan ed satan, insan sikatoy abuloyan a mangan ed tinapay tan oninum ed kopa.
29 Ta samay mamangan tan oniinum et naukom no sikatoy mamangan tan oniinum ya agto natetebek so kabaliksan na laman.
30 Satan so makasengeg no akin a dakel ed limog yo so makapuy tan masakit, tan amayamay la so inatey.*
31 Balet no natebek tayo no anto itayo, ag-itayo naukom.
32 Anggaman ontan, sano uukomen itayo nen Jehova et didisiplinaen to itayo, pian ag-itayo naukom a kaiba na mundo.
33 Lapud saya, agagik, sano mantitipon kayo pian kanen itan, alagar yoy sakey tan sakey.
34 No walay narasan, sikatoy mangan la diad abung, pian agyo pakaukoman so pantitipon yo. Balet iyuksoy ko so arum niran bengatla sano onsabi ak ditan.
