1 Corinto 8:1-13
8 Natan nipaakar ed saray kakanen ya inyapay ed saray idolo: amta tayo a walay pikakabat tayon amin. Say pikakabat et pansengegan na panagpaatagey, balet say aro et makapabiskeg.
2 No iisipen na siopaman a walay pikakabat to nipaakar ed sakey a bengatla, agto ni amta itan a singa kaukolan to ni ingen ya amtaen.
3 Balet no say sakey et aaroen toy Dios, sayan too et kabat to.
4 Natan nipaakar ed pangan ed kakanen ya inyapay ed saray idolo, amta tayon anggapoy kakanaan na sakey ya idolo diad mundo, tan wala labat so saksakey a Dios.
5 Ta anggano wala iramay tatawagen a “dirios,” balanglan diad tawen odino diad dalin, tan tua a dakel so “dirios” tan dakel so “kakatawan,”
6 diad sikatayo et wala so saksakey a Dios ya Ama, a nanlapud sikato so amin a bengatla, tan manbibilay itayo parad sikato; tan wala so saksakey a Katawan, si Jesu-Kristo, a diad panamegley to et manbibilay so amin a bengatla, tan manbibilay itayo diad panamegley to.
7 Anggaman ontan, sayan pikakabat et ag-amta na amin a totoo; balet say arum, lapud nipasal la ra ed idolo anggad natan, so mamangan na kakanen ya imbagat ed sakey ya idolo, tan nadudutakan so konsiensia ra lapud makapuy itan.
8 Balet ag-itayo onapit ed Dios lapud kakanen; no ag-itayo mangan, ag-itayo nakulangan, tan no mangan itayo, anggapo so kigalangan tayo.
9 Balet mantultuloy kayon manalwar pian sayan autoridad yo et agbalot magmaliw a pakatiroran na saramay makapuy.
10 Ta no sikan walaan na pikakabat et nanengneng na samay sakey a makapuy ya akarungo ka ed pananganan diad sakey a templo na idolo, agta napabiskeg laingen so konsiensia to a mangan na saray kakanen ya inyapay ed saray idolo?
11 Diad tua, say pikakabat mo et sengegan na pakaderal na samay makapuy, say agim, a nisengeg ed sikato et inatey si Kristo.
12 Balet sano mankasalanan kayo ed agagi yo tan nasugatan yo so makapuy a konsiensia, mankakasalanan kayo ed si Kristo.
13 Kanian, no say kakanen et pakatiroran na agik, agak lan balot mangan lamet na karne, pian agnatiror ed siak so agik.
