Filemon 1:1-25
1 Siak, si Pablo, a nipriso nisengeg ed si Kristo Jesus, kaibak si Timoteo ya agi tayo, so nansulat ed sika Filemon, ya inad-aro tan kakimeyan mi,
2 tan ed si Apia, ya agi tayon bii, tan ed si Arquipo, a kapara tayon sundalo, tan ed kongregasyon a walad abung mo:
3 Nawalaan kayo komon na agnaparaan a kaabigan tan deen a manlalapu ed Dios ya Ama tayo tan ed Katawan a Jesu-Kristo.
4 Naynay ak a misasalamat ed Dios ko sano bibitlaen ta ka ed saray pikakasik,
5 lapud narerengelan ko so nipaakar ed panangaro tan pananisiam parad Katawan a Jesus tan parad amin a masanto;
6 ta pian say pananisia ya inanabang mo ed arum et mamakiwas ed sikan manggaway maong lapud amtam a diad impikasakey tayo ed si Kristo et akaawat itayo na dakel a maabig a bengatla.
7 Ta aliketan ak tan aligliwa ak a maong lapud panangarom, ta diad panamegley mo, agi, et linmigsa so kapusoan na saray masanto.
8 Nisengeg ed saya, anggano makmakpel ak a mansasalita nipaakar ed si Kristo pian pagawak komon ed sika no antoy manepeg,
9 pasesegen ta ka laingen unong ed aro, lapud amtam met lan masiken ak la, on siak, si Pablo, a nipriso met natan nisengeg ed si Kristo Jesus;
10 pasesegen ta ka nipaakar ed si Onesimo ya ana’ko, a singa to ak ama legan a wala ak ed prisoan,
11 ya anggapoy usar to ed sika nensaman balet natan et mausar la ed sika tan siak.
12 Sikatoy papawilen ko la ed sika, on, sayan pinabpablik.
13 Agko ni labay komon a papawilen ta pian anggano anggapo ka dia et sikatoy makapanlingkor ni ed siak legan ya akapriso ak nisengeg ed maong a balita.
14 Balet no agmo iyabuloy et agko labay so manggawa na antokaman, ta pian say panggawam na maong et aliwan lapud apilitan ka labat, noagta unong ed panlabayan mon dili.
15 Nayarin sikatoy tinmaynan ya agano lapud saya, pian sano ompawil ed sika et lawas mo lan nakaiba,
16 ya aliwa lan sakey ya aripen noagta nagkalalo ni nen say aripen, salanti, sakey ya agin inad-aro, lalo la ed siak, ingen ta nagkalalo ni ed sika ta sikatoy aripen mo tan agim ed Katawan.
17 No ipapasen mo ak sirin a kaibam, sikatoy awat mo a singa siak.
18 Ontan met, no walay mauges a ginawa to ed sika odino walay utang to ed sika, siak lay paningilan mo ed satan.
19 Siak a mismo so angisulat ed saya: Bayaran ko itan, tan agko la kaukolan ya ibaga ya utang mo ed siak so bilay mo.
20 On, agi, komon ta nagunggonaan ak ed sika lapud impikasakey ta ed Katawan: paligsam so pusok lapud impikasakey mo ed si Kristo.
21 Lapud manmamatalek ak ya ontulok ka, nansulat ak ed sika ta amtak a gawaen mo so nagkalalo ni nen saray imbagak.
22 Balet niarum ni ed satan, iparaan mo met komon so pampundoan ko, ta maniilalo ak a diad panamegley na pikakasi yo et nibulos ak nisengeg ed sikayo.
23 Manpapakomusta ed sika si Epafras, a kaparak a priso nisengeg ed si Kristo Jesus,
24 ontan met iray kakimeyan ko a di Marcos, Aristarco, Demas, tan Lucas.
25 Niwala komon so agnaparaan a kaabigan na Katawan tayon Jesu-Kristo ed espiritun ipapatnag yo.
