Galacia 3:1-29
3 O makulangkulang iran taga Galacia, siopay amalingo ed sikayo, anta malinlinew lan nipaliwawa ed sikayo so inkipasak nen Jesu-Kristo?
2 Saya labat so labay kon naamtaan ed sikayo: Kasin inawat yoy espiritu lapud saray gawa na ganggan odino lapud papanisiaan yoy nadngel yo?
3 Kasin ontan lay inkamakulangkulang yo? Anta ginmapo kayo la ed espiritu, natan balet mansusumpal kayo ed laman?
4 Kasin anggapoy gagala na impanagmak yoy dakerakel ya irap? Agak manisia ya anggapoy gagala na satan.
5 Sirin, kasin samay mangiiter ed sikayo na espiritu tan manggagawa na makapanyari iran gawa* ed limog yo et gagawaen to itan lapud saray gawa na ganggan odino lapud papanisiaan toy nadngel to?
6 Singa si Abraham ya “anisia ed si Jehova, tan sikatoy impasen a matunong lapud satan.”
7 Seguradon amta yo a saramay walaan na pananisia et ananak ira nen Abraham.
8 Natan ta akauna lan impanengneng na Kasulatan ya iyabawag na Dios a matunong iray totoo na nasyones lapud pananisia ra, inyabawag la na satan iyan maong a balita ed si Abraham, salanti: “Diad panamegley mo et nabendisyonan so amin a nasyones.”
9 Kanian saramay walaan na pananisia et nabebendisyonan no panon ya abendisyonan si Abraham a matoor.
10 Ta amin iramay mandedepende ed saray gawa na ganggan et walad silong na ayew; ta walan nisulat: “Naayew so balang sakey ya agmantultuloy a mangunor ed amin a nisulat ed lukot na Ganggan.”
11 Niarum ni, mapatnag ya anggapoy niyabawag a matunong ed arap na Dios diad panamegley na ganggan, ta “say matunong et manbilay nisengeg ed pananisia.”
12 Natan say Ganggan et agmandedepende ed pananisia, noagta “samay manggagawa ed saratan et manbilay unong ed saratan.”
13 Diad impanaliw nen Kristo ed sikatayo, imbulos to itayo ed ayew na Ganggan diad impagmaliw ton sakey a naayew imbes a sikatayo, ta walan nisulat: “Naayew so balang too ya impasak* ed sakey a kiew.”
14 Say gagala et pian makasabi ed saray nasyon so bendisyon ya insipan ed si Abraham diad panamegley nen Jesu-Kristo, pian naawat tayo so insipan ya espiritu diad panamegley na pananisia tayo.
15 Agagi, mansalita ak diad panamegley na sakey ya ilustrasyon: Say sakey a pinaletan a sipanan et agnayarin ibaliwala odino aruman na siopaman, anggano too so nanggawa.
16 Natan saray sipan et sinalita ed si Abraham tan ed bini to. Ag-inkuan na kasulatan a “tan diad saray bini” a singano dakdakel ira, noagta inkuan na satan a “diad binim” a manutukoy ed sakey a bini, salanti, si Kristo.
17 Niarum ni, ibagak iya: Say sipanan a pinaletan na Dios nensaman et agnaandian na kakanaan lapud Ganggan a niiter kayari na apat a lasus tan talomplon taon, tan ag-aderal so sipan lapud satan.
18 Ta no say tawir et lapud ganggan, aliwa la itan a lapud sipan; balet ta mabulos ya inter na Dios itan ed si Abraham diad panamegley na sakey a sipan.
19 Akin sirin et walay Ganggan? Niarum itan pian ompatnag iray impakasumlang, anggad isabi na bini a parad sikato so sipan; tan impasabi itan ed panamegley na saray anghel diad lima na sakey a manamegley.
20 Natan anggapoy manamegley no saksakey so nalalanor, balet say Dios et saksakey.
21 Sirin, kasin agmitunosan so Ganggan ed saray sipan na Dios? Andin balot! Ta no inter so sakey a ganggan pian makapangiter na bilay, nagamoran sirin so inkatunong diad panamegley na ganggan.
22 Balet inyan na Kasulatan so amin a totoo diad pakauley na kasalanan, pian saramay mangipapatnag na pananisia ed si Jesu-Kristo et makaawat ed sipan na Dios.
23 Balet antis ya onsabi so pananisia, sikatayoy babantayan ed silong na ganggan, tan niiyan itayon amin ed pakauley na kasalanan, a maniilalo ed pananisia a magano lan niparungtal.
24 Lapud saya, say Ganggan et nagmaliw a manangibangat tayo pian nitonton itayo ed si Kristo, ta pian niyabawag itayon matunong lapud pananisia.
25 Balet natan ta sinmabi lay pananisia, anggapo itayo la ed panangasikaso na manangibangat.
26 Diad tua, sikayon amin et ananak na Dios lapud pananisia yo ed si Kristo Jesus.
27 Ta amin yo ya abautismoan diad Kristo so angisulong la ed Kristo.
28 Ta anggapoy Judio odino Griego, anggapoy aripen odino bulos a too, anggapoy laki odino bii; ta amin yo et singa saksakey a too a nikasakey ed si Kristo Jesus.
29 Niarum ni, no kayarian kayo nen Kristo, sikayoy peteg a bini nen Abraham, saray tomatawir unong ed sipan.
