Galacia 4:1-31
4 Natan ibagak a no say tomatawir et sakey a melag nin ugaw, anggapon balot so pidumaan to ed sakey ya aripen, anggano sikatoy katawan na amin a bengatla,
2 balet sikatoy walad pudir na saray lalakin angimatalekan tan saray manag-asikaso ed sankaabungan anggad agew ya inggana na ama to.
3 Mipadpara, sanen sikatayoy melag nin ugugaw, naaripen itayo ed saray inuugaw a bengatla a kien na mundo.
4 Balet sanen asabi lay panaon, imbaki na Dios so Anak to, ya inyanak na sakey a bii tan nisilong ed ganggan,
5 ta pian nibulos to iramay walad silong na ganggan diad panaliw to ed sikara, insan natagibi itayo bilang ananak.
6 Natan lapud ananak kayo, imbaki na Dios so espiritu na Anak to ed kapusoan yo tan satan so onkekelyaw: “Abba,* Ama!”
7 Kanian sirin, aliwa ka lan sakey ya aripen noagta sakey ya anak; tan no sakey kan anak, sakey ka met a tomatawir diad panamegley na Dios.
8 Balet, sanen agyo ni kabat so Dios, nampaaripen kayo nensaman ed saramay aliwan peteg a dirios.*
9 Balet natan ta kabat yo lay Dios, odino natan ta kabat kayo lay Dios, akin et ompapawil kayo lamet ed saray makapuy tan andi-kakanaan ya inuugaw iran bengatla tan labay yo lamet so manpaaripen ed saratan?
10 Estrikto yon ngingilinan iray agew tan saray bulan tan saray panaon tan saray taon.
11 Napapagaan ak ed sikayo, ompano anggapoy kakanaan na impansagpot ko nipaakar ed sikayo.
12 Agagi, mikakasi ak ed sikayo, Magmaliw kayon singa siak, lapud ontan ak met nensaman ed sikayo. Anggapoy kasalanan yo ed siak.
13 Balet amta yo a say pansasakit ko ed laman so makasengeg ya inyabawag ko ed sikayo so maong a balita diad unonan pankanawnawa.
14 Tan anggano sakey a subok ed sikayo so pansasakit ko ed laman, agyo ak binalaw odino agkayo linmutda lapud pandimla yo ed siak; balet inawat yo ak a singa sakey ya anghel na Dios, singa si Kristo Jesus.
15 Kawalaan la sirin na liket yo nensaman? Ta segurado ak a no nayari labat komon et sinukit yo la iray mata yo tan inter yo ed siak.
16 No ontan sirin, kasin nagmaliw ak lan kabusol yo lapud ibabagak ed sikayo so katuaan?
17 Aliwan maabig so getma ra ed panasagyat da ed sikayon miulop ed sikara, balet ta labay da kayon isian ed siak, pian nasagyat kayon miulop ed sikara.
18 Balet, maong komon no maabig so getma ra ed naynay a panasagyat da ed sikayon miulop ed sikara, tan aliwa labat a sano wadtan ak a kaiba yo,
19 ana’ko ran angkekelag, a sengegan na pampapasakit ko lamet a singa manaanak anggad nipatnag yo so Kristo.
20 Balet labay ko komon a wadtan ak ed sikayo natan tan umanen koy panagsalitak, ta nagogonigon ak lapud sikayo.
21 Ibaga yo ed siak, sikayoran malabay a nisilong ed ganggan, Agyo ta narerengel so Ganggan?
22 Alimbawa, nisulat a si Abraham et awalaan na duaran anak a lalaki, say sakey et diad aripen a bii tan say sakey et diad bulos a bii;
23 balet say anak na aripen a bii et nianak unong ed laman, say anak na bulos a bii et diad panamegley na sakey a sipan.
24 Saraya et walaan na simbolikon kabaliksan; ta sarayan bibii et mankabaliksan na duaran sipanan, say sakey et ginawa ed Palandey Sinai, a mamawala na saray anak a magmaliw ya ariripen, tan saya et si Hagar.
25 Natan sayan Hagar et mankabaliksan na Sinai, sakey a palandey ed Arabia, tan irerepresenta toy Jerusalem natan, ta sikatoy naaripen a kaiba iray anak to.
26 Balet say Jerusalem ed tagey et bulos, tan sikato so ina tayo.
27 Ta walan nisulat: “Manliket ka, lepes a bii ya agmakaanak; oneyag ka tan onkelyaw ka ed gayaga, sika a biin agmakakalikna na sakit ed panag-anak; ta saray anak na pinaulyanan a bii et mas dakdakel nen saray anak na biin walaan na asawa.”
28 Natan agagi, sikatayoy ananak nipaakar ed sipan, a singa si Isaac.
29 Balet no panon a pinasegsegang na samay nianak unong ed laman imay nianak unong ed espiritu, ontan met natan.
30 Anggaman ontan, antoy ibabaga na Kasulatan? “Pataynan moy aripen a bii tan say anak to, ta say anak na aripen a bii et agnepeg a magmaliw a tomatawir a kaibay anak na bulos a bii.”
31 Kanian sirin, agagi, sikatayoy ananak na bulos a bii, aliwan sakey ya aripen a bii.
