Galacia 5:1-26
5 Lapud satan a kawayangan et imbulos itayo nen Kristo. Kanian mansiansia kayon malet, tan agyo aabuloyan a sakbaten yo lamet so pako na inkaaripen.
2 Siak lan mismo so mangibabaga ed sikayo a no nasegat kayo et anggapoy kakanaan nen Kristo ed sikayo.
3 Sakey ni, ibagak lamet ed balang toon manpasegat a sikatoy obligadon manumpal ed interon Ganggan.
4 Sikayoran manggugunaet a niyabawag a matunong ed panamegley na ganggan et nisian ed Kristo; inyarawi yoy inkasikayo ed agnaparaan a kaabigan to.
5 Sikatayo balet et magunaet a manaalagar ed samay pipirawaten tayon inkatunong diad panamegley na espiritu tan lapud pananisia tayo.
6 No nipaakar ed si Kristo Jesus, aliwan importante so panagpasegat odino agpanagpasegat, noagta say pananisia ya igigiya na aro.
7 Maabig lay gagawaen yo nensaman.* Siopa so angamper ed sikayo ed panguunor yo ed katuaan?
8 Sayan paraan na pananangguyor et agnanlapud Dios a manatawag ed sikayo.
9 Say daiset a lebadura et palebagen toy interon masa.
10 Matalek ak ed sikayoran akikasakey ed Katawan ya agkayo mannonot na sananey; balet samay pansesengegan na gonigon yo et akoen toy kaukom to, anggano siopa itan a too.
11 Balet, agagi, akin et napapasegsegang ak ni no ipupulong koy panagpasegat? No ontan, anggapo la sirin so pakatiroran nipaakar ed panamairapan a kiew.*
12 Komon ta saramay lalaki a manasalin maneral ed sikayo et manpakapon ni ingen.
13 On, agagi, atawag kayo parad kawayangan; agyo balet ibabaraan iyan kawayangan pian peneken yo iray mauges a pilalek yo, noagta manpaaripen kayo ed balang sakey nisengeg ed aro.
14 Ta say interon Ganggan et nasusumpal ed onian balikas: “Arom so kaparam a too a singa ed sikan dili.”
15 Et no mantultuloy kayon mankeketketan tan manaakmonan, manalwar kayo ompan makapanuupotan kayo la.
16 Balet saya so ibagak, Mantultuloy kayon manakar unong ed espiritu pian agyon balot gawaen so pilalek na laman.
17 Ta say pilalek na laman et sumlang ed espiritu, tan say espiritu et sumlang ed laman; mansumlangan iraya kanian agyo gagawaen iray bengatlan labay yon gawaen.
18 Niarum ni, no iwawanwan kayo na espiritu, anggapo kayo ed silong na ganggan.
19 Natan et mapatnag iray gawa na laman, tan saraya et say pilalawanan,* karutakan, anggapoy-baing a kagagawa,*
20 idolatriya, espiritismo, pambubusolan, pansisiblangan, imon, sanok, pankokolkol, inkaapag-apag, saray sekta,
21 ib-ibeg, panagbuanges, maingal a panliliket, tan saray bengatlan singa saraya. Nipaakar ed saraya et papasakbayan ta kayo, a singa impamasakbay ko la ed sikayo, a saramay manggagawa ed saraya et agda natawir so panarian na Dios.
22 Balet, say bunga na espiritu et aro, gayaga, deen, andukey a panag-anos, kaabigan, kamaongan, pananisia,
23 inkaulimek, panangontrol ed dili. Anggapoy ganggan a sumpad sarayan bengatla.
24 Niarum ni, saramay kien nen Kristo Jesus et anaeg* la ed makasalanan a laman pati ed saray mabiskeg a liknaan tan pilpilalek na satan.
25 No manbibilay itayo unong ed espiritu, mantultuloy itayon paiwanwan ed espiritu.
26 Ag-itayo komon magmaliw a mapaatagey, mangilagyat na panlalaslasan, tan maniibegan.
Paimanod leksab
^ Gal 5:19
* Sayan salita et manutukoy ed amin a klase na agmanepeg a seksual a relasyon. Nengnengen so Apendise 4.
