Hebreos 11:1-40
11 Say pananisia et panagmatalek a seguradon nagawa iray bengatlan iilaloan, a walaay makakombinsin ebidensya a tua iratan anggano agnanenengneng.
2 Ta diad panamegley na saya, akaawat na maabig a pantasi iray totoo nensaman.
3 Lapud pananisia, atalosan tayo ya apalsa* iray bengatla diad uniberso* diad panamegley na salitay Dios, kanian saray bengatlan nanenengneng et nanlapud saray bengatlan agnanengneng.
4 Lapud pananisia, si Abel et angiyapay na sakey a bagat ed Dios a magmaong ni nen say bagat nen Cain, tan diad panamegley na satan a pananisia et apaneknekan a sikatoy matunong, ta tinasian na Dios iray regalo to; tan diad panamegley na satan et sikatoy mansasalita ni anggano inatey la.
5 Lapud pananisia, si Enoc et inyalis ta pian agto nanengneng so ipapatey, tan aglan balot aromog lapud sikatoy inyalis na Dios; ta antis a sikatoy niyalis et apaneknekan ya apaliket ton maong so Dios.
6 Sakey ni, no anggapoy pananisia et agbalot napaliket so Dios, ta samay onaasingger ed sikato et nepeg a manisia a sikatoy wala tan tumangan to iramay masimoon a manaanap ed sikato.
7 Lapud pananisia, si Noe et tinmakot ed Dios tan angipaalagey na biong a pakasalbaan na sankaabungan to, kayarin pinasakbayan na Dios nipaakar ed saray bengatlan agni anengneng; tan diad panamegley na sayan pananisia et inukom to so mundo, tan sikatoy nagmaliw a tomatawir na inkatunong a mitunosan ed pananisia.
8 Lapud pananisia, si Abraham et tinmulok sanen sikatoy tinawag na Dios pian onla ed sakey a pasen a niganan tawiren to; tan sikatoy linma, anggano agto amta no iner so laen to.
9 Lapud pananisia, sikatoy nanayam bilang sangkaili diad insipan a dalin, a singa diad sananey a bansa, tan nanayam ed saray tolda a kaiba toy Isaac tan si Jacob, saray kaiba ton manawir ed satan lanlamang a sipan.
10 Ta aalagaren to so syudad a walaan na saray tuan pundasyon, a say mangipaalagey tan manggawa ed satan et say Dios.
11 Lapud pananisia met, si Sara a mismo et akaawat na pakayarin manlukon,* anggano sikatoy akulaw lan maong, ta impasen ton matoor imay angisipan.
12 Kanian samay sakey met a too, ya impasen ya agla makailalak,* so nanlapuan na saray ananak a singa karakel na bibitewen ed tawen tan singa saray agnabilang a buer diad gilig na dayat.
13 Amin irayan totoo et inaatey a walaan na pananisia, anggano agda la naalagar so kasumpalan na saray sipan, balet abayag da lan anengneng iratan tan maliket dan inilaloan tan inyabawag da a sikaray sangkaili tan miaayam labat ed dalin a kawalaan da.
14 Ta papaneknekan na saramay mangibabaga ed saratan a magunaet dan aanapen so sakey a pasen a panayaman dan dili.
15 Ingen, no peteg a nodnonoten da imay pasen a nanlapuan da, wala komon so pankanawnawa ran ompawil.
16 Balet panggugunaetan da lan dampoten imay magmaong a pasen, salanti, samay walad tawen. Kanian say Dios et agto ra imbaing, pian ontawag ira ed sikato bilang Dios da, ta sikatoy angiparaan na sakey a syudad parad sikara.
17 Lapud pananisia, si Abraham et singa to la inyapay si Isaac sanen asubok, tan sayan too a maliket ya angawat ed saray sipan et akaparaan lan mangiyapay ed bogbogtong ya anak to,
18 anggano imbaga la ed sikaton: “Say tawagen a ‘binim’ et manlapud si Isaac.”
19 Balet inisip to a nayarian na Dios a paolien so anak to anggano inatey la; tan aliling to et inawat to lanlamang so anak to manlapud ipapatey.
20 Lapud pananisia met, si Isaac et amendisyon ed si Jacob tan si Esau nipaakar ed saray bengatlan onsabi.
21 Lapud pananisia, si Jacob, sanen magano lan ompatey et benendisyonan to so kada sakey ed saray ilalak nen Jose tan nandayew ed Dios legan a sikatoy akapapeg ed baston to.
22 Lapud pananisia, si Jose et insalaysay to so nipaakar ed impaway na saray anak na Israel manlapud Ehipto, sanen sikatoy magano lan ompatey; tan nambilin nipaakar ed saray pukel to.
23 Lapud pananisia, si Moises et taloy bulan ya inyamot na saray ateng to kayari na inkianak to, lapud anengneng dan malimlimgas so melag ya ugaw tan ag-ira tinmakot ed ganggan na ari.
24 Lapud pananisia, agnilabay nen Moises so patawag ya anak na marikit nen Faraon sanen sikatoy binmaleg la,
25 a mas pinili toy napairap a kaiba na totoo na Dios nen say temporaryon panliket ed kasalanan,
26 lapud say napabanday bilang Sakey a Nilanaan* et impasen ton kaykayamanan a babaleg ni nen say kaykayamanan na Ehipto; ta akateen so ilalo to ed pakaawat ed tumang.
27 Lapud pananisia, tinaynan to so Ehipto, ya agto tinakotan so sanok na ari, ta sikatoy nansiansian malet a singa sankanengneng to imay Sakey ya agnanengneng.
28 Lapud pananisia, sinelebraan toy paskua tan say panangiwalsik na dala, pian samay imbakin maneral et agto pateyen iray panguloan ya anak da.
29 Lapud pananisia, binmaliw ira ed Ambalangan Dayat a singa ed amagan dalin, balet nalner iray Ehipsio sanen sinali ray ombaliw.
30 Lapud pananisia, nagba iray padir na Jerico kayari da iratan a niliber a pitoy agew.
31 Lapud pananisia, si Rahab a balangkantis so ag-apideral ed saramay agtinmulok, ta maabig so impangawat to ed saray espiya.
32 Tan anto ni so ibagak? Kulang so panaon no ituloy ko nin isalaysay so nipaakar ed si Gideon, Barak, Samson, Jefte, David, ontan met ed si Samuel tan arum niran propeta,
33 a lapud pananisia et tinalo da iray panarian a kalaban da, ginawa ra no anto so matunong, agamoran da iray sipan, pinadeen da iray leon,
34 anggapon balot so epekto na apoy ed sikara, aliktaran day tarem na espada, binmiskeg ira sanen makapuy ira, nagmaliw iran makapanyari ed pilalaban, inuusilan da iray armada na kakabusol.
35 Saray bibii et inawat da iray inaatey da a pinaoli; balet saray arum et mas nilabay da ni napairap nen say nibulos diad panamegley na pikompromiso, ta pian nagamoran day magmaong a kioli.
36 On, asubok so arum diad panamegley na panagbalaw tan panaglewet, ya aliwan satan labat noagta diad impakabalor tan impakapriso met.
37 Tinupak ira, sinubok ira, nilalagari ira, pinatey ira ed panamegley na espada, nankawes ira na saray katat na karnero tan katat na kanding, tan mankakkaukolan ira, nanirap ira, tan minaltrato ira;
38 tan aliwan manepeg so mundo ed sikara. Nanayam ira diad desierto tan kapalandeyan tan saray ungib tan abot na dalin.
39 Ingen, anggaman akaawat irayan amin na maabig a pantasi lapud pananisia ra, agda naawat so kasumpalan na sipan,
40 ta abayag lan imparaan na Dios so magmaong a bengatla parad sikatayo, ta pian ag-ira magmaliw ya ayadyari no anggapo itayo.
