Roma 15:1-33
15 Balet, sikatayoran mabiskeg et nepeg tayon awiten iray kakapuyan na saramay aliwan mabiskeg, tan agtayo papaliketen so inkasikatayo.
2 Komon ta paliketen na kada sakey ed sikatayo so kapara ton too ed no anto so maong, salanti, samay makapabiskeg ed sikato.
3 Ta anggan say Kristo et agto pinaliket so inkasikato, noagta unong a nisulat: “Inanosan ko iray panagpabanday na saramay mamapabanday ed sika.”
4 Ta amin ya insulat nensaman et insulat pian nibangat itayo, ta pian diad panagsungdo tayo tan panagligliwa na Kasulatan et nawalaan itayo na ilalo.
5 Say Dios a mangitatarya na panagsungdo tan ligliwa et iyabuloy to komon a naalig yo so panagnonot nen Kristo Jesus,
6 ta pian diad panamegley na saksakey a boses et mankakasakey kayo a mangigloria ed Dios tan Ama na Katawan tayon Jesu-Kristo.
7 Kanian awat yo so sakey tan sakey, a singa ed impangawat met nen Kristo ed sikatayo, diad kigloriaan na Dios.
8 Ta ibabagak a peteg a nanlingkor si Kristo ed saramay asegat nisengeg ed inkamatua na Dios, ta pian napekderan to iray insipan na Dios ed inmuunan atateng da,
9 tan saray nasyon et mangigloria ed Dios lapud panangasi to. Ta unong a nisulat: “Lapud saya et maparungtal ta kan bidbiren diad limog na saray nasyon tan mankanta ak na panangidayew ed ngaran mo.”
10 Tan inkuan to lamet: “Manliket kayo, sikayoran nasyones, a pati saray totoo to.”
11 Niarum ni: “Idayew yo si Jehova, amin yon nasyones, tan amin komon a totoo so mangidayew ed sikato.”
12 Tan inkuan lamet nen Isaias: “Niwala naani so lamot nen Jesse, tan onsabi naani so sakey a manuley ed saray nasyon; sikato so panilaloan na saray nasyon.”
13 Say Dios a mangiiter na ilalo et panoen to kayo komon na gayaga tan deen diad panamegley na pananisia yo ed sikato, ta pian ondaak kayo ed ilalo diad pakayari na masanton espiritu.
14 Natan et manisia ak met, agagik, a napno kayo na kamaongan, ta napno kayo la na amin a pikakabat, ta pian nayarian yo met a simbawaen so sakey tan sakey.
15 Anggaman ontan, mas diretsaan so pansusulat ko ed sikayo nipaakar ed pigaran punto, a singano papanonotan ta kayo lamet, lapud agnaparaan a kaabigan ya inter na Dios ed siak
16 pian magmaliw ak a lingkor* nen Jesu-Kristo diad saray nasyon tan makapibiang ak ed masanton kimey na maong a balita na Dios, ta pian sarayan nasyon et magmaliw a makapaliket ya apay, ya apasanto ed panamegley na masanton espiritu.
17 Kanian walay rason ko pian manliket ed si Kristo Jesus nipaakar ed saray bengatlan parad Dios.
18 Ta agko ipalaran ya ibaga so sakey a bengatla no aliwan nipaakar ed saramay kinimeyan nen Kristo diad panamegley ko ta pian magmaliw a matulok iray nasyon, diad salitak tan gawak,
19 diad pakayari na saray tanda tan pakelaw, diad pakayari na masanton espiritu; ta pian sigpot kon nipulong so maong a balita nipaakar ed Kristo manlapud Jerusalem angga ed amin a pasen a mamaarap ed Ilirico.
20 On, diad onian paraan et ginetmak met ya ipulong so maong a balita, aliwan diad pasen a nadngelan lay ngaran nen Kristo, ta pian agak mangipaalagey ed tapew na inletneg la na sananey a too,
21 noagta, unong a nisulat: “Saramay ag-apakabatan nipaakar ed sikato et makanengneng, tan saramay ag-akadngel et makatalos.”
22 Lapud saya et aminpiga ak met ya asebelan a makakar ed sikayo.
23 Balet natan ta anggapo lay teritoryan agko akimeyan ed sarayan pasen, tan pigay taon lan pipirawaten koy makakar ed sikayo
24 kapagno mamaarap ak ed España, maniilalo ak a sano manbiahe ak ditan et napinengnengan ta kayo tan nipatnubang yo ak kayarin makapanliket ak a magano diad pakapiulop ed sikayo.
25 Balet natan et ngalngali ak la manbiahe a mamaarap ed Jerusalem pian manlingkor ed saray masanto.
26 Ta saramay walad Macedonia tan Acaya et aliketan a mangiter ed saray kayarian da bilang kontribusyon parad saray mairap-bilay ed limog na saray masanton walad Jerusalem.
27 Tua, aliketan iran manggawa ed saya, ingen ta akautang ira ed saray masanto ed Jerusalem; ta no akinabang iray nasyon ed espiritual a kaykayarian na saraya, wala met so utang dan manlingkor ed sarayan agagi diad panamegley na saray bengatlan parad laman da.
28 Kanian sano nasumpal ko la iya tan nipalimak la ed sikara iyan bunga, onsamar ak ed sikayo sano mamaarap ak ed España.
29 Niarum ni, amtak a sano onla ak ed sikayo et awit ko so daakan a panamendisyon nen Kristo.
30 Natan et kerewen ko ed sikayo, agagi, diad panamegley nen Katawan tayon Jesu-Kristo tan diad panamegley na aro a manlalapud espiritu, a manseet kayo komon a mangipikasi ed siak diad Dios,
31 a niliktar ak komon ed saray agmananisia ed Judea tan say ministeryok a parad Jerusalem et magmaliw a makapaliket ed saray masanto,
32 ta pian nainawaan ak a kaiba yo sano makakar ak ed sikayo a walaan na gayaga lapud linawa na Dios.
33 Niwala komon ed sikayon amin so Dios a mangiiter na deen. Amen.
