Roma 9:1-33
9 Ibabagak so katuaan nipaakar ed si Kristo; agak mantitila, lapud say konsiensiak et mantatasi a kaibak diad masanton espiritu,
2 ya agaylay paneermen ko tan agnaandi so ot-ot ed pusok.
3 Ta labay ko a siak la komon so nisian ed Kristo bilang sakey a naayew imbes a saray agagik, saray kakanayon ko,
4 a sikaran mismo et Israelita ira, a parad sikara so pakatagibi bilang ananak tan say gloria tan saray sipanan tan sikara so angiteran ed Ganggan tan say sagradon panaglingkor tan saray sipan;
5 a poli na saray inmuunan atateng tan nanlapuan nen Kristo unong ed laman: say Dios, a manuuley ed amin, so narayew komon ed andi-anggaan. Amen.
6 Balet, aliwa a singano say salita na Dios so sinmaew. Ta aliwan amin ya inyanak nen Israel et Israelita.
7 Tan aliwan lapud bini ira nen Abraham et ananak to ran amin, noagta: “Say tawagen a ‘binim’ et manlapud si Isaac.”
8 Say kabaliksan na saya, say ananak ed laman et aliwan peteg ya ananak na Dios, noagta say ananak diad panamegley na sipan so ipapasen a bini.
9 Ta say salita na sipan et onia: “Diad sayan panaon et onsabi ak tan si Sara so nawalaan na sakey ya anak a laki.”
10 Ingen aliwan diad satan labat, noagta sanen angilukon met si Rebeca na lason manlapud sakey a laki, si Isaac ya inmunan ateng tayo:
11 ta sanen agni ra nianak odino nanggawa na antokaman a maong odino mauges, (ta pian say gagala na Dios nipaakar ed panagpili et mansiansian akadepende ed Sikato a manatawag, aliwan diad saray gawa),
12 nibaga ed sikato: “Say panguloan so magmaliw ya aripen na yugtan.”
13 Unong a nisulat: “Inarok si Jacob, balet binusol koy Esau.”
14 Anto sirin so ikuan tayo? Wala ta’y ag-inkahustisya ed Dios? Agbalot komon magmaliw ya ontan!
15 Ta inkuan to ed si Moises: “Kasian ko so siopaman a kasian ko, tan ipatnag koy panangabagey ed siopaman a pangipatnagan koy panangabagey.”
16 Kanian sirin, akadepende itan ed Dios, a walaan na panangasi, aliwan diad samay manlabay odino diad samay mansasagpot.
17 Ta nipaakar ed si Faraon et inkuan na Kasulatan: “Lapud saya et inabuloyan ta kan manbilay, ta pian diad panamegley mo et nipanengneng koy pakapanyarik, tan niyabawag so ngaran ko ed interon dalin.”
18 Kanian sirin, diad samay labay to et kakasian to, balet aabuloyan to so arum ya onawet so kapusoan da.
19 Kanian ikuan mo ed siak: “Akin a sikatoy manaanap ni na lingo? Ta siopay makapanguman ed linawa to?”
20 O too, siopa ka pian ebatan moy Dios? Ibaga kasi na minoldi ed samay nanmoldi ed satan, “Akin et oniay impanggawam ed siak?”
21 Anto? Agta say managgaway banga et walaan na pakauley ed sakey a masa na pitek pian manggaway sakey a banga ya onkana ed kagalangan, tan sakey ya onkana ed kababaingan?
22 Natan, no say Dios et mantetepel tan andukey so panaanos to ed saray banga na sanok a ginawan makanepegan ed kadederal, anggano linawa ton ipatnag so sanok to tan ipaamta so pakapanyari to,
23 ta pian nipaamta to iray kayamanan na gloria to ed saray banga na panangasi, ya akauna lan intarya to parad gloria,
24 salanti, sikatayo a tinawag to manlapud limog na saray Judio tan manlapu met ed limog na saray nasyon, anto natan?
25 Singa met iya ed samay imbaga to ed si Oseas: “Saramay aliwan totook et tawagen kon ‘totook,’ tan samay agko inaro et tawagen kon ‘inad-aro’;
26 tan diman ed pasen a nibaga ed sikara ya, ‘Aliwan sikayo iray totook,’ sikaray tawagen diman ya ‘ananak na mabilay a Dios.’”
27 Niarum ni, si Isaias et onkekelyaw nipaakar ed Israel: “Anggaman singa buer ed dayat so bilang na ananak na Israel, saray nakdaan labat so nilaban.
28 Ta si Jehova et mikuentaan diad dalin, a satan so sumpalen to tan patikeyen to.”
29 Ontan met, unong ya imbaga la nen Isaias nensaman: “No si Jehova na saray armada et ag-angitilak na sakey a bini parad sikatayo, nagmaliw itayo la natan a singa Sodoma tan Gomorra.”
30 Anto sirin so ikuan tayo? Saray totoo na nasyones, anggaman agda tutumboken so inkatunong et nagmaliw iran matunong ed imaton na Dios lapud pananisia;
31 balet say Israel, anggaman susumpalen da so ganggan na inkatunong et agda met sigpot ya asumpal so ganggan.
32 Antoy makasengeg? Lapud susumpalen da itan diad panamegley na saray gawa, aliwan diad panamegley na pananisia. Sikaray atiror ed “baton pakatiroran”;
33 unong a nisulat: “Nia! Iletneg ko ed Sion so sakey a baton pakatiroran tan sakey a baton-dampay a pakatumbaan, balet samay walaan na pananisia ed satan et agnadismaya.”
