Unonan Samuel 1:1-53
1 Natan, si Arin David et masiken lan maong,+ tan anggano nanlalatop so iyuules dad sikato, siansia nin nabebetelan.
2 Kanian inkuan ed sikato na saray lingkor to: “Wala komoy naromog a biin kalangweran, sakey a birhen, parad katawan kon ari, tan sikatoy manserbi tan mangasikasod ari. Sikatoy ondukol ya akadangan ed taklay mo pian makaliknay petang so katawan kon ari.”
3 Et nananap ira na magangganan bii diad amin a teritorya na Israel, tan aromog day Abisag+ a Sunamita+ tan inawit dad ari.
4 Sayan bii et talagan maganggana, tan sikato so mangaasikaso tan manseserbid ari, balet sikatoy ag-inakdolan na ari.
5 Diad saman, si Adonias+ ya anak nen Hagit et ipapaatagey toy sarili to, a kuan to: “Siak so magmaliw ya ari!” Sikatoy angiparaan na karwahe to a kaibay lalakin de-kabayoan tan 50 lalaki ya ombatik ed unaan to.+
6 Balet sikatoy agbalot binano* nen ama to diad pangibagan: “Akin et oniay ginawam?” Sikatoy guapguapo met, tan inyanak nen ina to kayarin niyanak si Absalom.
7 Et kinatongtong toy Joab ya anak nen Zeruia tan si Abiatar+ a saserdote, tan imbaga ran sikatoy tulongan tan suportaan da.+
8 Balet si Zadok+ a saserdote, si Benaias+ ya anak nen Jehoiada, si Natan+ a propeta, si Simei,+ si Rei, tan saray mabibiskeg a sundalo+ nen David et agsinmuporta ed si Adonias.
9 Ag-abayag et angibagat si Adonias+ na saray karnero, baka, tan saray pinataban ayayep diad abay na bato na Zohelet, ya asingger ed En-rogel, tan inimbitaan toy amin ya agagi ton lalaki ya ananak na ari tan amin a lalaki ed Juda a lingkor na ari.
10 Balet agto inimbitaan si Natan a propeta, si Benaias tan saray mabibiskeg a sundalo, odino si Solomon ya agi to.
11 Et inkuan nen Natan+ ed si Bat-sheba+ ya ina nen Solomon:+ “Agmo ta nadngelan a nagmaliw ya ari si Adonias+ ya anak nen Hagit, tan anggapoy amta nen David a katawan tayo ed satan?
12 Kanian abuloyan mon bilinen ta ka, pian niliktar moy bilay mo tan say bilay na* anak mon si Solomon.+
13 La kad si Arin David tan ibagam ed sikato, ‘O katawan kon ari, agta sinambaan mod lingkor mo, a kuan mo: “Say anak mon si Solomon so magmaliw ya ari a kasalat ko, tan sikato so onyurong ed tronok”?+ Akin balet et si Adonias so nagmaliw ya ari?’
14 Legan a wadman kan mitotongtong ed ari, onloob ak tan pekderan ko ray imbagam.”
15 Kanian si Bat-sheba et linmad ari, diad pribadon kuarto to. Say ari et masikesiken la, tan si Abisag+ a Sunamita so manseserbid sikato.
16 Insan si Bat-sheba et tinmuek tan dinmakmomod arapan na ari, tan inkuan na ari: “Antoy labay mon kerewen?”
17 Et inmebat: “Katawan ko, diad arapan nen Jehova a Dios mo et sinambaan mod lingkor mo, ‘Say anak mon si Solomon so magmaliw ya ari a kasalat ko, tan sikato so onyurong ed tronok.’+
18 Balet si Adonias so nagmaliw ya ari, tan anggapoy amta na katawan kon ari ed satan.+
19 Sikatoy nambagat na dakdakel a kalakian a baka, pinataban ayayep, tan saray karnero, tan inimbitaan toy amin ya anak a lalaki na ari tan si Abiatar a saserdote tan si Joab a pangulo na armada;+ balet agto inimbitaan si Solomon a lingkor mo.+
20 Et natan, O katawan kon ari, manaalagar ed sika so interon Israel pian ibagam no siopay onyurong ed trono na katawan kon ari a kasalat to.
21 No andi, sano say katawan kon ari et manpainawa la a kaiba na saray inmuunan atateng to, siak tan say anak kon si Solomon et ipasen a traidor.”
22 Legan a sikatoy mitotongtong ed ari, linmoob si Natan a propeta.+
23 Et tampol ya imbagad ari: “Wadiay Natan a propeta!” Linmay Natan ed arapan na ari tan dinmakmomod dalin diad arapan na ari.
24 Tan inkuan to: “O katawan kon ari, imbagam ta a ‘Si Adonias so magmaliw ya ari a kasalat ko, tan sikato so onyurong ed tronok’?+
25 Ta natan et sikatoy linman angibagat+ na dakdakel a kalakian a baka, pinataban ayayep, tan saray karnero, tan inimbitaan to so amin ya anak a lalaki na ari tan saray pangulo na armada tan si Abiatar a saserdote.+ Wadman ira a mamangan tan oniinum a kaiba to, tan ibabaga ra, ‘Manbilay komon na andukey si Arin Adonias!’
26 Balet siak a lingkor mo, si Zadok a saserdote, si Benaias+ ya anak nen Jehoiada, tan si Solomon a lingkor mo et agto inimbitaan.
27 Kasin inabuloyan iya na katawan kon ari ya agto impaamta ed lingkor to no siopay nepeg ya onyurong ed trono na katawan kon ari a kasalat to?”
28 Et inmebat si Arin David: “Tawag yoy Bat-sheba.” Et linmoob si Bat-sheba tan inmalagey diad arapan na ari.
29 Insan nansamba so ari: “Unong a mabilay si Jehova, samay angiliktar ed siak* manlapud amin a gonigon,+
30 no panon a sinambaan kod sika diad arapan nen Jehova a Dios na Israel, a kuan ko, ‘Say anak mon si Solomon so magmaliw ya ari a kasalat ko, tan sikato so onsublay ya onyurong ed tronok!’ ontan so gawaen ko diad sayan agew.”
31 Diad saman et tinmuek si Bat-sheba tan dinmakmomo ed dalin diad arapan na ari tan inkuan to: “Manbilay komon ya anggad angga si Arin David a katawan ko!”
32 Et tampol ya inkuan nen Arin David: “Tawag yoy Zadok a saserdote, si Natan a propeta, tan si Benaias+ ya anak nen Jehoiada.”+ Kanian linma irayad arapan na ari.
33 Inkuan na ari ed sikara: “Ipila yo ray lingkor na katawan yo, tan palugan yoy anak kon si Solomon ed samay luluganan kon mula,*+ insan sikatoy iyakar yod Gihon.+
34 Diman et sikatoy lanaan nen Zadok a saserdote tan si Natan a propeta+ bilang ari ed Israel; insan paknol yoy tambuyog tan ibaga yo, ‘Manbilay komon na andukey si Arin Solomon!’+
35 Insan tumbok yo diad ipawil to, tan sikatoy onloob tan onyurong ed tronok, tan magmaliw ya ari a kasalat ko, tan sikatoy turoen kon lider ed Israel tan ed Juda.”
36 Et tampol ya inmebat ed ari si Benaias ya anak nen Jehoiada: “Amen! Komon ta pekderan itan nen Jehova a Dios na katawan kon ari.
37 No panon a si Jehova et walad katawan kon ari, ontan to met komon ed si Solomon,+ tan say trono to et gawaen To komon a mas makapanyari nen say trono nen Arin David a katawan ko.”+
38 Diad ontan, si Zadok a saserdote, si Natan a propeta, si Benaias+ ya anak nen Jehoiada, tan saray Kereteo tan Peleteo+ et linmasur tan pinalugan day Solomon ed mula nen Arin David,+ insan da inyakar ed Gihon.+
39 Et inala nen Zadok a saserdote so saklor a panagkargaay larak+ diman ed tolda+ insan nilanaan toy Solomon,+ tan pinaknol day tambuyog, tan oniay inkekelyaw na amin a totoo: “Manbilay komon na andukey si Arin Solomon!”
40 Kayari na satan et tinmumbok ed sikato so amin a totoo tan tinmatdang ira, a mantotogtog ira na saray plauta tan malikeliket ira, kanian linmetak so dalin lapud ingal da.+
41 Et nadngel itan nen Adonias tan amin ya inimbitaan to kayari ran angan.+ Sanen nadngel nen Joab so tanol na tambuyog, inkuan ton tampol: “Akin kasi et walay makmaksil ya ungol ed syudad?”
42 Legan ton mansasalita, sinmabi si Jonatan+ ya anak nen Abiatar a saserdote. Et inkuan nen Adonias: “Gala dia, ta sakey kan maong* a too, tan seguradon maong so ibalitam.”
43 Balet inmebat si Jonatan ed si Adonias: “Andi! Si Arin David a katawan tayo et ginawa ton ari si Solomon.
44 Imbaki na ari a mangulop ed sikato si Zadok a saserdote, si Natan a propeta, si Benaias ya anak nen Jehoiada, tan saray Kereteo tan Peleteo, insan pinalugan da ed mula na ari.+
45 Tan diman ed Gihon et sikatoy nilanaan nen Zadok a saserdote tan si Natan a propeta bilang ari. Kayari na satan et tinmaynan irad man a malikeliket, tan say syudad et manungol. Saman may ingal a nadngel yo.
46 Sakey ni, yinmurong lay Solomon ed trono na ari.
47 Likud ed satan, sinmabi ray lingkor na ari pian ibalikas dad si Arin David a katawan tayo so liket da, a kuan da, ‘Komon ta say Dios mo et gawaen ton mas makapadinayew so ngaran nen Solomon nen say ngaran mo, tan say trono to et gawaen To komon a mas makapanyari nen say tronom!’ Diad saman et tinmuek so ari diad dukolan.
48 Ontan met, inkuan na ari, ‘Narayew komon si Jehova a Dios na Israel, a natan et tinuro to may sakey ya onyurong ed tronok tan inabuloyan ton nanengneng itan na saray mismon matak!’”
49 Tan amin iramay inimbitaan nen Adonias et ataktakot, tan kada sakey et inmalagey tan nagsipawil ed pasen to.
50 Ataktakot met si Adonias lapud si Solomon, kanian inmalagey tan linmad altar tan binembenan to ray saklor na altar.+
51 Et oniay imbalita ed si Solomon: “Si Adonias et ataktakot ed si Arin Solomon; tan binembenan to ray saklor na altar, a kuan to, ‘Komon ta sambaan nin unona nen Arin Solomon ed siak ya agto pateyen ed espada so lingkor to.’”
52 Diad saya et inkuan nen Solomon: “No ipatnag ton sikatoy makanepegan, anggapoy anggan sakey a buek to a napelag ed dalin; balet no walay mauges a naamtaan ed sikato,+ sikatoy nepeg ya ompatey.”
53 Kanian angibaki si Arin Solomon na mangiyepas ed sikato diad altar. Insan sikatoy linmad si Arin Solomon tan dinmakmomo ed arapan to; kayari na saya et inkuan nen Solomon ed sikato: “Sempet ka lad abung mo.”
Paimanod leksab
^ Odino “say liknaan to et agbalot sinakitan.”
^ Odino “kamarerwam tan say kamarerwa na.”
^ Odino “anondon ed kamarerwak.”
^ Say Hebreon salita et manutukoy ed nanlaok a poli na asno tan kabayo.
^ Odino “makanepegan.”
