Unonan Samuel 11:1-43
11 Balet si Arin Solomon et angaro na dakdakel a bibiin dayo,+ likud nid anak na Faraon:+ saray bibiin Moabita,+ Ammonita,+ Edomita, Sidonio,+ tan Heteo.+
2 Nanlapu iraya ed saray nasyon a nipaakar ed sikara et inkuan nen Jehova ed saray Israelita: “Agkayo miuulop ed sikara,* tan ag-ira nayarin miulop ed sikayo; ta seguradon iyarawi day puso yo pian ontumbok ed dirios da.”+ Balet, ag-ira tinaynan nen Solomon tan inaro to ra.
3 Tan sikatoy awalaan na 700 ya asawa a prinsesa tan 300 ya onkokomaduan asawa, tan saray asawa to et kalkalna ran inyarawi so puso to.*
4 Sanen matatken lay Solomon,+ inyarawi na saray asawa to so puso to pian ontumbok ed arum a dirios,+ tan aliwan matoor* so puso to ed si Jehova a Dios to a singa ed puso nen David ya ama to.
5 Tan si Solomon et nandayew ed si Astoret+ a diosa na saray Sidonio, tan ed si Milcom+ a makapadimlan dios na saray Ammonita.
6 Tan ginawa nen Solomon so mauges ed pakanengneng nen Jehova, tan agto sigpot a tinumbok si Jehova a singa ed ginawa nen David ya ama to.+
7 Diad saman, si Solomon et angipaalagey na atagey a pasen+ parad si Kemos a makapadimlan dios na Moab diad palandey a walad arap na Jerusalem tan parad si Molec+ a makapadimlan dios na saray Ammonita.+
8 Ontan so ginawa to parad amin a bibiin dayo ya asawa to a manpapaasewek na bagat tan manbabagat ed saray dirios da.
9 Et sinmanok si Jehova ed si Solomon lapud niyarawi so puso to ed si Jehova a Dios na Israel,+ samay amiduan nampanengneng ed sikato+
10 tan angipasakbay ed sikato nipaakar ed sayan bengatla, a sikatoy agnepeg a mandayew ed arum a dirios.+ Balet agto inunor so ingganggan nen Jehova.
11 Natan et inkuan nen Jehova ed si Solomon: “Lapud ginawam iya tan agmo inunor so sipanan ko tan saray inter kon totontonen unong ya ingganggan kod sika, ekalen* kod sika so panarian, tan iter ko ed sakey ed saray lingkor mo.+
12 Balet nisengeg ed si David ya amam et agko iya gawaen legan a mabilay ka. Ekalen ko itan ed lima na anak mo,+
13 ingen ta agko ekalen so interon panarian.+ Iter koy sakey a tribu ed anak mo,+ nisengeg ed si David a lingkor ko tan nisengeg ed Jerusalem a pinilik.”+
14 Et walay inabuloyan nen Jehova ya onsumpad si Solomon,+ salanti, si Hadad ya Edomita a nanlapud pamilyay ari na Edom.+
15 Sanen tinalo nen David so Edom,+ linmay Joab a pangulo na armada pian iponpon iramay pinapatey, tan sinali ton pateyen so amin a lalaki ed Edom.
16 (Ta anem bulan a nansiansia ditan si Joab tan say interon Israel ya anggad naupot toy amin a lalaki ed Edom.)
17 Balet binmatik si Hadad a kaibay arum ya Edomitan lingkor nen ama to, tan linma rad Ehipto; ugaw nid saman si Hadad.
18 Kanian inmalis irad Midian tan linma rad Paran. Angipila ra na lalaki manlapud Paran+ tan linma rad Ehipto, diad Faraon ya ari na Ehipto, ya angiter na abung, nansuplay na naakan, tan angiter na dalin ed sikato.
19 Et agamoran nen Hadad so panangabobon na Faraon kanian say agi nen asawa ton si Tapenes a reyna* et inter tod si Hadad pian magmaliw ya asawa to.
20 Asabi panaon, say agi nen Tapenes et angiyanak na sakey a laki, si Genubat, tan sikatoy pinabaleg* nen Tapenes diad abung na Faraon; tan si Genubat et nanayam ed abung na Faraon a kaiba iray ananak a lalaki na Faraon.
21 Legan a walad Ehipto, nadngelan nen Hadad a si David et nampainawa la a kaiba na saray inmuunan atateng to+ tan si Joab a pangulo na armada et inatey met la.+ Kanian inkuan nen Hadad ed Faraon: “Abuloyan mo ak lan onalis, pian makasempet ak ed dalin ko.”
22 Balet inkuan na Faraon ed sikato: “Antoy kulang ed sika legan a wadia kad siak, akin et labay moy onsempet ed dalin mo?” Et oniay ebat to: “Anggapo, abuloyan mo ak labat lan onalis.”
23 Wala ni sakey ya inabuloyan na Dios ya onsumpad si Solomon,+ salanti, si Rezon ya anak nen Eliada, ya imbatikan toy katawan ton Hadadezer+ ya ari na Zoba.
24 Sikatoy nantipon na kakaiba ton lalaki tan nagmaliw a pangulo na sakey a grupo na saray tulisan sanen tinalo* ira nen David.+ Kanian linma rad Damasco+ tan nanayam tan nanuley ira ditan.
25 Tan sikatoy sinmumpa ed Israel diad amin ya agew nen Solomon, ya inmarum nid kaugsan a ginawa nen Hadad; tan binusol toy Israel legan a sikatoy manuuley ed Sirya.
26 Tan wadtan met si Jeroboam+ ya anak nen Nebat, sakey ya Efraimita a taga Zereda tan lingkor nen Solomon,+ a say ngaran na ina to et Zerua, sakey a balo. Sikatoy nanrebelde* met ed ari.+
27 Niay rason no akin a sikatoy nanrebelde ed ari: Impaalagey nen Solomon so Pukdol*+ tan sinuldongan to so padir na Syudad nen David ya ama to.+
28 Si Jeroboam et maabilidad a laki. Sanen anengneng nen Solomon a makulikuli yan kalangweran a laki, sikatoy tinuro ton mangasikaso+ ed saramay inobligan mankimey manlapud sankaabungan nen Jose.
29 Diad saman a panaon et pinmaway ed Jerusalem si Jeroboam, tan sikatoy anengneng nen propetan Ahias+ a Silonita diad dalan. Si Ahias et akasulong na balon kawes, tan sikaran dua labat so wadman ed uma.
30 Et binembenan nen Ahias so balon kawes ya akasulong ed sikato insan pinilat tod 12 piraso.
31 Tan inkuan tod si Jeroboam:
“Alam so samploran piraso, ta oniay imbaga nen Jehova a Dios na Israel: ‘Ekalen ko so panarian ed lima nen Solomon, tan iter kod sika so samploran tribu.+
32 Balet say sakey a tribu et mansiansiad sikato+ nisengeg ed si David a lingkor ko+ tan nisengeg ed Jerusalem, say syudad a pinilik manlapud amin a tribu na Israel.+
33 Gawaen ko iya lapud tinaynan da ak+ tan dinmakmomo ra ed si Astoret a diosa na saray Sidonio, si Kemos a dios na Moab, tan si Milcom a dios na saray Ammonita, tan ag-ira nanakar ed saray dalan ko, ya agda ginawa so duga ed pakanengneng ko tan ag-ira tinmumbok ed saray totontonen ko tan saray panangukom ko a singa ed ginawa nen David ya ama nen Solomon.
34 Balet agko ekalen so interon panarian ed lima to, tan sikatoy pansiansiaen ko a pangulo diad amin ya agew na bilay to, nisengeg ed si David a lingkor kon pinilik,+ lapud inunor to ray ganggan ko tan saray totontonen ko.
35 Balet ekalen kod anak to so inkaari tan iter kod sika, salanti, say samploran tribu.+
36 Iter kod anak to so sakey a tribu, pian si David a lingkor ko et naynay a walaay silew ed arapan ko diad Jerusalem,+ say syudad a pinilik pian mansiansia ditan so ngaran ko.
37 Sika so pilien ko, tan uleyan mo so amin a pipirawaten mo,* tan magmaliw kan ari ed Israel.
38 Tan no unoren mon amin so iganggan kod sika tan manakar ka ed saray dalan ko tan gawaen moy duga ed pakanengneng ko, a tumboken mo ray totontonen tan ganggan ko a singa ginawa nen David a lingkor ko,+ mansiansia ak met a walad sika. Mangiletneg ak parad sika na manbayag a sankaabungan,* a singa inletneg ko parad si David,+ tan iter kod sika so Israel.
39 Tan iyabebak so ilalak nen David lapud saya,+ balet aliwan naynay.’”+
40 Kanian sinali nen Solomon ya ipapatey si Jeroboam, balet tinmakas si Jeroboam paonlad Ehipto, diad kinen Sisac+ ya ari na Ehipto,+ tan sikatoy nanayam ditan ya anggad impatey nen Solomon.
41 Tan saray arum nin agawa ed si Solomon, amin a kimey to tan say karunongan to, et akasulat ed libro na saray agawa ed si Solomon.+
42 Say karukey* na impanuley nen Solomon ed interon Israel legan a walad Jerusalem et 40 taon.
43 Insan si Solomon et nampainawa la a kaiba na saray inmuunan atateng to tan sikatoy imponpon diad Syudad nen David ya ama to; tan si Rehoboam+ ya anak to so nagmaliw ya ari a kasalat to.
Paimanod leksab
^ Odino “Agkayo mangaasawa odino miaasawa ed sikara.”
^ Odino “saray asawa to et maksil so impluensya rad sikato.”
^ Odino “andiay sigpot a debosyon.”
^ Literal, “pilaten.”
^ Reyna ya agmanuuley.
^ Odino posiblin, “sikatoy pinakso.”
^ Odino “pinatey.”
^ Literal, “intagey toy lima to.”
^ Odino “Milo.” Hebreon salita a mankabaliksay “tambak.”
^ Odino “pipirawaten na kamarerwam.”
^ Salanti, linya na arari, sakey a dinastiya.
^ Literal, “Saray agew.”
