Unonan Samuel 12:1-33
12 Si Rehoboam et linmad Siquem, ta diman so nila na interon Israel+ pian sikatoy gawaen dan ari.+
2 Sanen nadngelan iya nen Jeroboam ya anak nen Nebat (sikatoy wala nid Ehipto lapud binmatik nisengeg ed si Arin Solomon tan nanayam ed Ehipto),+
3 sikatoy impatawag da. Insan si Jeroboam tan say interon kongregasyon na Israel et linmad si Rehoboam tan inkuan da:
4 “Pinabelat nen amam so pako mi.+ Balet no say mairap a panaglingkor ed amam et painomayen mo, tan palemewen moy ambelat* a pako ya impasakbat tod sikami, manlingkor kamid sika.”
5 Diad saman et inkuan tod sikara: “Mamalabas kayoy taloran agew; insan pawil kayod siak.” Kanian inmalis iray totoo.+
6 Et kinmonsulta si Arin Rehoboam ed saray mamasiken* a nanlingkor ed si Solomon ya ama to sanen mabilay ni, a kuan to: “Antoy nisimbawa yo ya iyebat kod sarayan totoo?”
7 Et inmebat irad sikato: “No magmaliw kan lingkor na sarayan totoo diad sayan agew tan iter moy kekerewen da tan maabig so iyebat mod sikara, mansiansia ran lingkor mo.”
8 Balet agto dinengel so insimbawa ed sikato na saray mamasiken,* noagta kinmonsulta ed saray kalangweran a lalakin kaugawan to tan natan et manlilingkor lad sikato.+
9 Intepet tod sikara: “Antoy nisimbawa yo ya iyebat tayo ed sarayan totoo ya angibagad siak, ‘Palemew moy pako ya impasakbat ed sikami nen amam’?”
10 Et inkuan na saray kalangweran a lalakin kaugawan to: “Oniay ibagam ed saray totoon angibagad sikan, ‘Pinabelat nen amam so pako mi, balet palemew mo itan parad sikami’; ibagam ed sikara, ‘Say kiking ko et mas malapar nen say balangbang nen amak.
11 No si amak et pinasakbatan to kayo na ambelat a pako, siak balet, mas pabelaten ko ni so pako yo. No si amak et dinusa to kayo ed panamegley na saray siplat, siak balet, dusaen ta kayo ed panamegley na saray latiko.’”
12 Si Jeroboam tan say amin a totoo et linmad si Rehoboam diad mikatlon agew, unong ya imbaga na ari: “Pawil kayod siak diad mikatlon agew.”+
13 Balet aliwliway inyebat na ari ed saray totoo, tan agto dinengel imay insimbawa ed sikato na saray mamasiken.*
14 Sikatoy akitongtong ed sikara unong ed simbawa na saray kalangweran a lalaki, a kuan to: “No si amak et pinabelat toy pako yo, siak balet, mas pabelaten ko ni itan. No si amak et dinusa to kayo ed panamegley na saray siplat, siak balet, dusaen ta kayo ed panamegley na saray latiko.”
15 Kanian agdinengel na ari iray totoo, ta sayan inkagawa et nanlapud si Jehova,+ pian nasumpal imay imbaga nen Jehova ed si Jeroboam ya anak nen Nebat diad panamegley nen Ahias+ a Silonita.
16 Sanen anengneng na interon Israel ya aglabay na ari so ondengel ed sikara, oniay inkuan dad sikato: “Antoy nabebetangan mi ed si David? Anggapoy tawir mi ed anak nen Jesse. La ka lad dirios mo, O Israel. Akauley ka lad dilin sankaabungan mo, O David!” Diad ontan et sinmempet so Israel ed saray ayaman* da.+
17 Balet nantultuloy ya inuleyan nen Rehoboam iray Israelita a manaayam ed saray syudad na Juda.+
18 Diad saman, si Adoram,+ a mangaasikasod saramay tinawag a mankimey parad ari, et imbaki nen Arin Rehoboam ed interon Israel, balet sikatoy tinutupak da ya anggad inatey. Balet si Arin Rehoboam et linmugan ed karwahe to tan batik ed Jerusalem.+
19 Tan saray Israelita et nantultuloy a nanrebelde+ ed sankaabungan nen David anggad sayan agew.
20 Sanen nadngelan na interon Israel a pinmawil lay Jeroboam, sikatoy impatawag da ed pantitiponan da tan ginawa ran ari ed interon Israel.+ Anggapoy sinmuporta ed sankaabungan nen David noag say tribu na Juda labat.+
21 Kasabi nen Rehoboam ed Jerusalem, tinipon ton tampol so interon sankaabungan na Juda tan say tribu nen Benjamin, say 180,000 nipasal* a sundalo, pian milaban ed sankaabungan na Israel, diad ontan et nipawil so inkaari ed si Rehoboam ya anak nen Solomon.+
22 Et sinmabi so mensahe na tuan Dios ed si Semaias+ a too na tuan Dios, a kuan to:
23 “Ibagam ed si Rehoboam ya anak nen Solomon ya ari na Juda tan ed interon sankaabungan na Juda tan Benjamin tan ed arum nin totoo,
24 ‘Oniay inkuan nen Jehova: “Agkayo milalaban ed saray Israelita ya agagi yo. Pawil ki lad kaabungan yo, ta siak so nanlapuan na sayan inkagawa.”’”+ Kanian inunor day mensahe nen Jehova tan sinmempet la rad kaabungan da, unong ya imbagad sikara nen Jehova.
25 Et impaalagey* nen Jeroboam so Siquem+ diad mapalandey a rehyon na Efraim tan nanayam ditan. Insan inmalis tan impaalagey* toy syudad na Penuel.+
26 Inkuan nen Jeroboam ed sarili to: “Ompan ompawil so panarian ed sankaabungan nen David.+
27 No sarayan totoo et mantultuloy ya onlan mangiyapay na saray bagat ed abung nen Jehova diad Jerusalem,+ ompawil met so puso ra ed katawan dan si Arin Rehoboam na Juda. Seguradon pateyen da ak tan ompawil irad si Arin Rehoboam na Juda.”
28 Kayarin kinmerew na simbawa so ari, sikatoy nanggawa na duaran balitok a kilaw a baka+ tan inkuan tod saray totoo: “Nairapan ki lan maong no ontatdang kayo nid Jerusalem. Nia so Dios mo, O Israel, ya angipaway ed sika ed dalin na Ehipto.”+
29 Insan inyan toy sakey diad Bethel,+ tan samay sakey diad Dan.+
30 Lapud saya et nankasalanan ira,+ tan saray totoo et linma ya anggad Dan pian mandayew ed samay kilaw a bakan wadman.
31 Tan sikatoy nanggawa na saray abung a panagdayewan diad saray atagey a pasen tan anuro na saray saserdote diad saray totoo ya aliwan Levita.+
32 Si Jeroboam et angiyuksoy met na piesta diad koma-15 agew na komawalon bulan, a singa samay piesta ed Juda.+ Sikatoy nambagat ed saray kilaw a bakan ginawa to diad samay altar a ginawa to diad Bethel,+ tan diad Bethel et sikatoy anuro na saray saserdote ed saray atagey a pasen a ginawa to.
33 Tan sikatoy ginmapon angiyapay diad samay altar a ginawa to ed Bethel diad koma-15 agew na komawalon bulan, diad samay bulan a sikato labat so amili; tan angiyuksoy na piesta parad saray totoo na Israel, tan tinmatdang diad altar pian mangiyapay tan manpaasewek na bagat.
Paimanod leksab
^ Odino “makapairap.”
^ Odino “mamatatken.”
^ Odino “mamatatken.”
^ Odino “mamatatken.”
^ Literal, “saray tolda.”
^ Literal, “apili.”
^ Odino “pinabiskeg.”
^ Odino “pinabiskeg.”
