Unonan Samuel 13:1-34
13 Walay sakey a too na Dios+ diad Juda ya imbaki nen Jehova ed Bethel tan asabian toy Jeroboam ya akaalagey ed abay na altar+ pian manpaasewek na bagat.
2 Et oniay inkelyaw to ed altar unong ya ingganggan nen Jehova: “O altar, altar! Oniay imbaga nen Jehova: ‘Sakey ya ugaw a laki a manngaray Josias+ so iyanak ed sankaabungan nen David! Ibagat tod sika iray saserdote na saray atagey a pasen, saramay manpapaasewek na bagat ed sika, tan poolan tod sika iray pukepukel na totoo.’”+
3 Diad saman ya agew et sikatoy angiter na tanda, a kuan to: “Nia so tanda ya inyabawag nen Jehova: Say altar et napaldua, tan saray dapol* ditan et nibantak.”
4 Sanen nadngel nen Arin Jeroboam so inkelyaw na too na tuan Dios ed samay altar diad Bethel, inekal to may lima to ed altar tan inyunat to, insan inkuan to: “Erel yo yan too!”+ Et kinmebet* a tampol imay lima ton inyunat to ed samay too, tan agto la napikos.+
5 Insan apaldua so altar kanian nibantak iray dapol a wadtan, unong ed samay tanda ya imbaga nen Jehova ed too na tuan Dios.
6 Et oniay inkuan na ari ed samay too na tuan Dios: “Komon ta kerewen moy panangasi* nen Jehova a Dios mo, tan ipikasim ak pian ompawil so limak ed dati.”+ Kanian samay too na tuan Dios et kinerew toy panangasi nen Jehova, tan say lima na ari et pinmawil ed dati.
7 Insan imbaga na ari ed samay too na tuan Dios: “Mila kad siak dimad abung ko tan mangan ka, tan ikdan ta kay regalo.”
8 Balet oniay ebat na samay too na tuan Dios ed ari: “Anggano iter mod siak so kapalduay abung mo, agak milad sika tan agak mangan na tinapay odino oninum na danum ed sayan pasen.
9 Ta oniay ingganggan nen Jehova ed siak: ‘Agka mamangan na tinapay odino oniinum na danum, tan agka ompapawil ed samay dinalan mo.’”
10 Kanian sikatoy inmalis a sananey so dinalan to, tan agpinmawil ed samay dinalan to a paonlad Bethel.
11 Et walay sakey a masiken lan propeta a manaayam ed Bethel, tan kasabid abung na saray anak ton lalaki et imbalita rad sikato so amin a ginawa na too na tuan Dios ed saman ya agew diad Bethel tan saray imbaga tod ari. Kayari ran inistorya iratan ed si ama ra,
12 tinepet nen ama ra: “Iner so dinalan to?” Kanian imbaga rad sikato no iner so dinalan na samay too na tuan Dios a nanlapud Juda.
13 Inkuan tod saray anak to: “Iparaan yoy asno a luganan ko.” Et imparaan day asno tan linmugan ed satan.
14 Tinumbok to may too na tuan Dios tan aromog ton manyudyurong ed silong na baleg a kiew. Insan inkuan tod sikato: “Sika may too na tuan Dios a nanlapud Juda?”+ Et inmebat: “On, siak.”
15 Inkuan to nid sikato: “Mila kad siak diad abung ko tan mangan kay tinapay.”
16 Balet inkuan to: “Agak nayarin ompawil a kaibam odino awaten so imbitasyon mo, agak met nayarin mangan na tinapay odino oninum na danum a kaibam ed sayan pasen.
17 Ta oniay ingganggan nen Jehova ed siak, ‘Agka mamangan na tinapay odino oniinum na danum ditan. Agka ompapawil ed samay dinalan mo.’”
18 Et oniay ebat tod sikato: “Propeta ak met a singa sika, tan imbagad siak na sakey ya anghel iyan mensahe nen Jehova, ‘Papawil mo tan ipilam ed abung mo pian mangan na tinapay tan oninum na danum.’” (Tinilaan to.)
19 Kanian sikatoy pinmawil a kaiba to pian mangan na tinapay tan oninum na danum diad abung to.
20 Sanen akarungo la rad lamisaan, sinmabi so mensahe nen Jehova ed samay propetan amapawil ed sikato,
21 tan oniay imbaga to ed samay too na tuan Dios a nanlapud Juda, “Oniay inkuan nen Jehova: ‘Lapud sinumlang mo so bilin nen Jehova tan agmo inunor so ingganggan ed sika nen Jehova a Dios mo,
22 tan pinmawil ka pian mangan na tinapay tan oninum na danum ed sayan pasen ya imbaga tod sikan, “Agka mamangan na tinapay odino oniinum na danum,” say bangkay mo et ag-iyan ed ponponan na saray inmuunan atateng mo.’”+
23 Kayarin angan na tinapay tan inminum imay too na tuan Dios, imparaan na samay masiken a propeta so asno a luganan na samay propetan pinapawil to.
24 Insan linma la, balet diad dalan et walay asabat ton leon tan sikatoy pinatey na satan.+ Say bangkay to et nibantak ed dalan, tan samay asno et walad abay to; samay leon et manalalagey met ed abay na bangkay.
25 Et wala ray totoon ondadalan ditan ya akanengneng ed samay bangkay a nibantak ed dalan tan samay leon a manalalagey ed abay to. Tan imbalita ra itan kasabi rad syudad a panaayaman na samay masiken a propeta.
26 Sanen nadngel itan na samay propetan amapawil ed sikato, inkuan ton tampol: “Sikato may too na tuan Dios ya anumlang ed ganggan nen Jehova;+ kanian sikatoy inyawat nen Jehova ed sakey a leon, a mangataki tan mamatey ed sikato, unong ya imbaga nen Jehova ed sikato.”+
27 Insan inkuan tod saray anak to: “Iparaan yoy asno a luganan ko.” Kanian imparaan da itan.
28 Insan sikatoy linma tan aromog to may bangkay a walad dalan tan manalalagey ed abay to so asno tan say leon. Agkinan na leon so bangkay tan agto inataki imay asno.
29 Et inalsa na masiken a propeta imay bangkay na too na tuan Dios tan inlugan tod asno, insan to insempet diad dilin syudad to, a nanermenan to tan imponpon to.
30 Say bangkay to et inyan na propeta ed dilin ponponan to, tan sikatoy inakisan da, a kuan da: “Agayla yan agawa, agik!”
31 Kayari ton imponpon, inkuan tod saray anak to: “Sano ompatey ak, iponpon yo ak ed angiponponan ed samay too na tuan Dios. Iyan yo ray pukel ko ed abay na saray pukel to.+
32 Seguradon nagawa so salita nen Jehova ya inkelyaw to sumpad samay altar diad Bethel tan sumpad amin ya abung a panagdayewan diad saray atagey a pasen+ ed saray syudad na Samaria.”+
33 Anggan agawa iraya, agnin siansia tinaynan nen Jeroboam so mauges a kagagawa to, noagta intultuloy toy anuro ed totoo na saray saserdote ed saray atagey a pasen.+ Gagawaen ton saserdote so* siopaman a malabay ed satan, a kuan to: “Sikatoy magmaliw a saserdote ed saray atagey a pasen.”+
34 Sayan kasalanan na sankaabungan nen Jeroboam+ et sengegan na impamatey tan impangupot ed sikara diad tapew na dalin.+
Paimanod leksab
^ Odino “saray dapol a nantaba,” salanti, saray dapol ya atalem ed taba na saray bagat.
^ Odino “aparalisa.”
^ Odino “palemek moy lupa.”
^ Literal, “Papanoen toy lima na.”
