Unonan Samuel 15:1-34
15 Diad koma-18 taon na uley nen Arin Jeroboam+ ya anak nen Nebat, si Abiam et nagmaliw ya ari ed Juda.+
2 Sikatoy taloy taon a nanuley ed Jerusalem. Say ngaran na ina to et Maaca+ ya apo nen Abisalom.
3 Inalig to so amin a kasalanan a ginawa nen ama to, tan aliwan matoor* so puso to ed si Jehova a Dios to, aliwan singa say puso nen David ya inmunan ateng to.
4 Balet nisengeg ed si David,+ sikatoy inikdan nen Jehova a Dios to na silew ed Jerusalem+ diad impanuro Tod anak to bilang ari a kasalat to tan inabuloyan To a mansiansia so Jerusalem.
5 Ta ginawa nen David no antoy duga ed pakanengneng nen Jehova, tan legay bilay to et agto impulisay so amin ya ingganggan Tod sikato, likud labat ed samay nipaakar ed si Urias a Heteo.+
6 Tan legay bilay nen Rehoboam et naynay a walay nagagawan guerra ed baetan da nen Jeroboam.+
7 Tan saray arum nin agawa ed si Abiam, say amin a kimey to, et akasulat ed libro na saray agawa diad panaon na arari na Juda.+ Et wala met so agawan guerra ed baetan nen Abiam tan Jeroboam.+
8 Tan si Abiam et nampainawa la a kaiba na saray inmuunan atateng to, tan sikatoy imponpon da diad Syudad nen David; tan si Asa ya anak to+ so nagmaliw ya ari a kasalat to.+
9 Diad koma-20 taon na uley nen Arin Jeroboam na Israel, si Asa et ginmapon nanuley ed Juda.
10 Sikatoy nanuley na 41 a taon ed Jerusalem. Say ngaran na bai to et Maaca+ ya apo nen Abisalom.
11 Et ginawa nen Asa no antoy duga ed pakanengneng nen Jehova,+ a singa si David ya inmunan ateng to.
12 Pinataynan tod dalin da iray paabang a lalaki ed templo+ tan ineekal to ray makapadimlan idolo* a ginawa na saray inmuunan atateng to.+
13 Inekal to ni ingen bilang reyna si Maaca+ a bai to lapud sikatoy nanggawa na mabanbanday ya idolo parad panagdayew ed sagradon poste.* Intumba nen Asa so mabanbanday ya idolo+ nen bai to tan pinoolan to diad Lawak na Kidron.+
14 Ingen ta saray atagey a pasen et agnaandi.+ Balet diad interon bilay* nen Asa et matoor* so puso to ed si Jehova.
15 Tan inyan tod abung nen Jehova iray bengatlan pinasanto to tan nen ama to—saray pilak, balitok, tan nanduruman kagawaan.+
16 Et naynay a walay nagagawan guerra ed baetan nen Asa tan Baasa+ ya ari na Israel.
17 Kanian si Arin Baasa na Israel et inmataki ed Juda tan ginapoan ton ipaalagey* so Rama+ pian anggapoy makapaway odino makaloob ed teritorya nen Arin Asa na Juda.+
18 Diad saman et inala nen Asa so amin a pilak tan balitok ya akeraan ed saray pasen a pangiinay kayamanan diad abung nen Jehova tan ed saray pasen a pangiinay kayamanan diad abung* na ari tan impawit tod saray lingkor to. Insan imbaki ira nen Arin Asa ed kinen Ben-hadad, ya anak nen Tabrimon ya anak nen Hezion tan ari na Sirya+ a manaayam ed Damasco, tan impaibaga to:
19 “Walay paknaan* ta’n dua, pati si amak tan si amam. Impawitan ta kay regalo a pilak tan balitok. Lingwanan mo lay paknaan* yo nen Arin Baasa na Israel pian onatras la.”
20 Dinengel nen Ben-hadad si Arin Asa tan imbaki to ray papangulo na saray armada to ed saray syudad na Israel, tan nilusob day Ijon,+ Dan,+ Abel-bet-maaca, say interon Kineret, tan say amin a dalin na Neftali.
21 Sanen nadngelan itan nen Baasa, tinundaan ton tampol so pangipapaalagey* ed Rama tan nansiansia ed Tirza.+
22 Et impatawag nen Arin Asa so amin a taga Juda—anggapoy nipuera—tan inaala da ray bato tan saray troso ed Rama ya uusaren nen Baasa ed pangipapaalagey to, tan inusar iratan nen Arin Asa pian ipaalagey* so Geba+ diad Benjamin, tan say Mizpa.+
23 Tan saray arum nin agawa ed si Asa, say impangipatnag toy inkabiskeg to tan amin a kimey to tan saray syudad ya impaalagey to,* et akasulat ed libro na saray agawa diad panaon na arari na Juda. Balet sanen masiken la et adapoan na sakit ed sali to.+
24 Tan si Asa et nampainawa la a kaiba na saray inmuunan atateng to tan sikatoy imponpon a kaiba ra diad Syudad nen David ya inmunan ateng to; tan si Jehosafat+ ya anak to so nagmaliw ya ari a kasalat to.
25 Et si Nadab+ ya anak nen Jeroboam so nagmaliw ya ari ed Israel diad komaduan taon na uley nen Arin Asa na Juda, tan duay taon a nanuley ed Israel.
26 Sikatoy nantultuloy a nanggaway mauges ed pakanengneng nen Jehova tan inalig toy kagagawa tan say kasalanan nen ama to+ ya inlagyat ton gawaen na Israel.+
27 Si Baasa ya anak nen Ahias a nanlapud sankaabungan nen Isacar et akikomplot sumpad si Nadab, tan sikatoy pinatey nen Baasa diad Gibeton,+ a sakop na saray Filisteo, legan a kukubkoben itan nen Nadab a kaiba toy interon Israel.
28 Kanian sikatoy pinatey nen Baasa diad komatlon taon na uley nen Arin Asa na Juda tan si Baasa so nagmaliw ya ari a kasalat to.
29 Tan sanen sikatoy nagmaliw ya ari, pinatey to so interon sankaabungan nen Jeroboam. Anggapoy inkera ton mabilay ed sankaabungan nen Jeroboam; inupot to ran amin unong ed imbaga nen Jehova diad panamegley na lingkor ton si Ahias a Silonita.+
30 Agawa iya lapud saray kasalanan a ginawa nen Jeroboam tan inlagyat ton gawaen na Israel tan lapud sinakitan ton maong so liknaan nen Jehova a Dios na Israel.
31 Tan saray arum nin agawa ed si Nadab, say amin a kimey to, et akasulat ed libro na saray agawa diad panaon na arari na Israel.
32 Tan naynay a walay nagagawan guerra ed baetan nen Asa tan Arin Baasa na Israel.+
33 Diad komatlon taon na uley nen Arin Asa na Juda, si Baasa ya anak nen Ahias et nagmaliw ya ari ed interon Israel legan a walad Tirza tan 24 a taon a nanuley.+
34 Balet sikatoy nantultuloy a nanggaway mauges ed pakanengneng nen Jehova,+ tan inalig toy kagagawa tan say kasalanan nen Jeroboam ya inlagyat ton gawaen na Israel.+
Paimanod leksab
^ Odino “andiay sigpot a debosyon.”
^ Say Hebreon termino na saya et nayarin mikonektaan ed salita parad “tai na ayep” tan uusaren a panmudmora.
^ Literal, “saray agew.”
^ Odino “walaay sigpot a debosyon.”
^ Odino “pabiskegen; ipaalagey lamet.”
^ Odino “palasyo.”
^ Odino “sipanan.”
^ Odino “sipanan.”
^ Odino “pamapabiskeg; pangipapaalagey lamet.”
^ Odino “pabiskegen; ipaalagey lamet.”
^ Odino “pinabiskeg to; impaalagey to lamet.”
