Unonan Samuel 19:1-21
19 Et imbaga nen Ahab+ ed si Jezebel+ so amin a ginawa nen Elias tan no panoy impamatey tod amin a propeta diad panamegley na espada.+
2 Kanian angibaki si Jezebel na mensahero ed si Elias, a kuan to: “Dusaen ak komon na ambelabelat na saray dirios, no diad onian oras nabuas et agta ka gawaen a singa kada sakey* ed sikara!”
3 Lapud satan et ataktakot si Elias kanian binmatik pian niliktar toy bilay* to.+ Et akasabid Beer-sheba,+ a sakop na Juda,+ tan intilak to diman so lingkor to.
4 Sikatoy linmad kalawakan tan sanagew a nanakar, insan tinmunda ed silong na kiew a retama* tan yinmurong diman tan kinerew to a sikatoy* ompatey la komon. Inkuan to: “Duga la! O Jehova, paandim lay bilay ko,*+ ta anggapoy pidumaan kod saray inmuunan atateng ko.”
5 Et sikatoy dinmukol tan akaugip dimad silong na kiew a retama.* Kabebekta, walay anghel ya angablit ed sikato+ tan inkuan to: “Bangon ka tan mangan ka.”+
6 Sanen ninmengneng, walad uloan to so malimpek a tinapay diad tapew na saray ampetapetang a bato tan sambuyog a danum. Sikatoy angan tan inminum, insan dinmukol lamet.
7 Et pinmawil lamet so anghel nen Jehova tan sikatoy kinablit to tan inkuan to: “Bangon ka tan mangan ka, ta ompan agka makapaot a manakar.”
8 Kanian sikatoy binmangon, insan angan tan inminum. Lapud kinmasil ed kinan to, ayarian toy nanakar ed loob na 40 agew tan 40 labi ya anggad akasabid Horeb, say palandey na tuan Dios.+
9 Et sikatoy linmoob ed ungib+ tan diman amalabas na labi; tan si Jehova et akitongtong ed sikato, a kuan to: “Antoy gagawaen mo dia, Elias?”
10 Sikatoy inmebat: “Pinasyay seseg ko parad si Jehova a Dios na saray armada;+ ta saray totoo na Israel et imbeneg day sipanan mo,+ inggeba da ray altar mo, tan pinapatey da ray propetam diad panamegley na espada,+ tan siak labat lay akera. Natan et labay da ak a pateyen.”*+
11 Balet inkuan To: “Paway ka, tan alagey ka diad palandey a walad arapan nen Jehova.” Diad saman et ondadalan si Jehova,+ tan napapaldua iray palandey tan onleletak iray angkakabaleg a bato ed arapan nen Jehova lapud maksil tan mabiskeg a dagem,+ balet si Jehova et anggapod dagem. Kayari na dagem et walay yegyeg,+ balet si Jehova et anggapod yegyeg.
12 Kayari na yegyeg et walay apoy,+ balet si Jehova et anggapod apoy. Kayari na apoy et walay nadngel a kalmado tan makalnan boses.+
13 Sanen nadngel itan nen Elias, sinakbongan toy lupa to na kawes ton parad propeta+ insan pinmaway tan inmalagey ed lolooban na ungib. Insan walay nadngel ton boses ya angibagan: “Antoy gagawaen mo dia, Elias?”
14 Sikatoy inmebat: “Pinasyay seseg ko parad si Jehova a Dios na saray armada; ta saray totoo na Israel et imbeneg day sipanan mo,+ inggeba da ray altar mo, tan pinapatey da ray propetam diad panamegley na espada, tan siak labat lay akera. Natan et labay da ak a pateyen.”*+
15 Et inkuan nen Jehova ed sikato: “Pawil ka, tan la ka ed kalawakan na Damasco. Kasabim diman, lanaan moy Hazael+ bilang ari ed Sirya.
16 Tan si Jehu ya apo nen Nimsi et lanaan mo+ bilang ari ed Israel, tan si Eliseo* ya anak nen Safat a taga Abel-mehola et lanaan mo bilang propeta ya onsalat ed sika.+
17 Siopaman a makaliktar ed espada nen Hazael+ et pateyen nen Jehu;+ tan siopaman a makaliktar ed espada nen Jehu et pateyen nen Eliseo.+
18 Wala ni atilak ed siak a 7,000 diad Israel,+ a sarayan amin et agtinmalimukor ed si Baal+ tan ag-inmangob ed sikato.”+
19 Kanian sikatoy tinmaynan diman tan aromog toy Eliseo ya anak nen Safat legan a manbabaka, a diad unaan to et walay 12 paris a baka, tan samay koma-12 paris so pambabaka to. Et dinmagod sikato si Elias tan imbuntok tod sikato so kawes ton parad propeta.+
20 Diad saman et intilak to ray baka tan batik a tinmumbok ed si Elias tan inkuan to: “Abuloyan mo ak pa nin onangob ed si amak tan si inak. Insan ak ontumbok ed sika.” Et inkuan nen Elias ed sikato: “La ka, sempet ka, ta agta ka met sesebelan.”
21 Kanian pinmawil tan angalay sakey paris a baka tan imbagat to, tan inusar ton impantungo iray kagawaan a panagbaka pian ilambong so karne na saray baka, tan inter tod saray totoo tan angan ira. Kayari na satan, tinumbok toy Elias tan ginmapon nanlingkor ed sikato.+
Paimanod leksab
^ Odino “agko gawaen so kamarerwam a singa say kamarerwa na balang sakey.”
^ Odino “kamarerwa.”
^ Melag a kiew ya ontutubod desierto.
^ Odino “kamarerwak.”
^ Odino “say kamarerwa to et.”
^ Melag a kiew ya ontutubod desierto.
^ Odino “aanapen day kamarerwak.”
^ Odino “aanapen day kamarerwak.”
^ Kabaliksan toy “Say Dios so Kilalaban.”
