Unonan Samuel 20:1-43
20 Et tinipon nen Arin Ben-hadad+ na Sirya+ so interon armada to pati say 32 arum nin arari tan saray kabayo tan karwahe ra; sikatoy tinmatdang tan kinubkob+ toy Samaria+ tan inataki to itan.
2 Insan sikatoy angibaki na saray mensahero ed kinen Arin Ahab+ na Israel diad syudad tan inkuan tod sikato: “Oniay imbaga nen Ben-hadad,
3 ‘Gawak iray pilak tan balitok mo, pati saray sankaabigan ya asawam tan ananak mon lalaki.’”
4 Diad saya et inmebat so ari na Israel: “Unong a kuan mo, katawan kon ari, kayarian mo ak pati say amin a walad siak.”+
5 Ag-abayag et pinmawil iray mensahero tan inkuan da: “Oniay imbaga nen Ben-hadad, ‘Saya so mensahek ed sika: “Iter mod siak iray pilak mo, balitok mo, saray asawam, tan saray ananak mon lalaki.”
6 Balet diad onian oras nabuas et ibakik ed sika iray lingkor ko, tan mansukimat irad abung mo tan diad kaabungan na saray lingkor mo, tan amin a bengatlan mablid sika et samsamen tan alaen da.’”
7 Diad satan et impatawag na ari na Israel so amin a mamatatken ed dalin da tan inkuan to: “Imano yo pa, tan nengneng yo a sayan too et determinadon mangidapoy kadederal, ta kekerewen to ray asawak, saray ananak kon lalaki, saray pilak ko, tan saray balitok ko, et inmabobon ak.”
8 Et inkuan ed sikato na amin a mamatatken tan amin a totoo: “Agmo uunoren tan agka onaabuloy.”
9 Kanian inkuan tod saray mensahero nen Ben-hadad: “Ibaga yod katawan kon ari, ‘Amin may unonan kinerew mo et iter ko, balet sayay kekerewen mo natan et agko niiter.’” Et inmalis iray mensahero tan impasabi ra yad sikato.
10 Natan, oniay mensahe nen Ben-hadad ed sikato: “Dusaen ak komon na ambelabelat na saray dirios, no magenap so dabok ed Samaria pian makala na sankaakop so balang sakey ya ontutumbok ed siak!”
11 Et oniay ebat na ari na Israel: “Ibaga yod sikato, ‘Samay mangisusulong na armas to et agnepeg a manlastog a singano lalakseben to la itan.’”+
12 Sanen arengel to yan ebat, legan a sikato tan saray arari et maniinuman diad saray tolda* ra, inkuan tod saray lingkor to: “Manparaan kayon onataki!” Kanian namparaan ira pian atakien so syudad.
13 Balet walay sakey a propetan linmad si Arin Ahab+ na Israel tan inkuan to: “Oniay imbaga nen Jehova, ‘Anengneng mo yan baleg a grupo? Iyawat ko rad limam diad sayan agew, tan seguradon naamtaan mo a siak si Jehova.’”+
14 Inkuan nen Ahab: “Panon?” tan sikatoy inmebat: “Oniay imbaga nen Jehova, ‘Usaren ko ray lingkor na saray prinsipe na saray probinsya.’”* Kanian intepet nen Ahab: “Siopay mangigapo na guerra?” tan sikatoy inmebat: “Sika!”
15 Diad ontan et binilang nen Ahab iray lingkor na saray prinsipe na saray probinsya, et 232 ira; insan binilang toy amin a lalakin Israelita, et 7,000 ira.
16 Diad kaagwan et pinmaway irad syudad legan a manbuebuek si Ben-hadad diad saray tolda* a kaiba to ray 32 ararin ontutulong ed sikato.
17 Kapaway na saray lingkor na saray prinsipe na saray probinsya, angibakin tampol si Ben-hadad na saray mensahero. Kapawil da et inkuan dad sikato: “Wala ray lalakin pinmaway ed Samaria.”
18 Diad saman et inkuan to: “No pinmaway ira pian mikareenan, erel yo ran mabilay; odino no pinmaway ira pian miguerra, siansia nin erel yo ran mabilay.”
19 Balet sanen pinmaway irayad syudad—saray lingkor na saray prinsipe na saray probinsya tan saray armadan manumtumbok ed sikara—
20 kada sakey et kinabil toy kalaban to. Et binmatik iray Siryano+ tan inusilan ira na Israel, balet si Arin Ben-hadad na Sirya et tinmakas ya akalugan ed kabayo kaibay arum a lalakin de-kabayoan.
21 Balet pinmaway so ari na Israel tan inataki to ray akalugan ed kabayo tan karwahe, kanian sigpot ton tinalo iray* Siryano.
22 Diad saginonor et linmay propeta+ ed ari na Israel tan inkuan to: “La ka, manpabiskeg ka tan nonot mo no antoy gawaen mo,+ ta diad kagapo na ontumbok a taon* et onatakid sika so ari na Sirya.”+
23 Natan, saray lingkor na ari na Sirya et inkuan dad ari ra: “Say Dios da et Dios na kapalandeyan. Kanian atalo da tayo. Balet no milaban tayod sikara diad patar, natalo tayo ra.
24 Tan oniay gawaen mo: Ekal moy amin ya arari+ diad pasen da, tan isalat mod sikara iray gobernador.
25 Insan mantipon* ka na armada a singa ed samay naandin armadam, tan ontan met so gawaen mo ed saramay naandin kabayo tan karwahe. Milaban tayod sikara diad patar, et seguradon natalo tayo ra.” Kanian dinengel toy simbawa ra tan ontan a mismo so ginawa to.
26 Diad kagapo na taon,* tinipon nen Ben-hadad iray Siryano tan tinmatdang irad Afek+ pian milaban ed Israel.
27 Saray totoo na Israel et tinipon met tan inikdan iray abasto, insan pinmaway ira pian miabetan ed saray Siryano. Sanen nankampo iray totoo na Israel ed arapan da, singa ra duaran melag a pulok na kanding, balet saray Siryano et pinano ray dalin.+
28 Et linma so too na tuan Dios ed ari na Israel tan imbaga to: “Oniay imbaga nen Jehova, ‘Lapud inkuan na saray Siryano: “Si Jehova et Dios na kapalandeyan, tan aliwan Dios na saray patar,” sayan baleg a grupo et iyawat kod limam,+ tan seguradon naamtaan mo a siak si Jehova.’”+
29 Pitoy agew iran nankampo a nanarapan, tan diad komapiton agew et ginmapo so guerra. Diad sanagew et 100,000 manaakar a Siryanon sundalo so pinatey na saray totoo na Israel.
30 Saray akera et batik ed Afek,+ dimad syudad. Balet nagba so padir tan pinmata ed 27,000 ed saramay akeran lalaki. Binmatik met si Ben-hadad tan linmad syudad, tan inmamot ed sakey a kuarto ed loob.
31 Et inkuan na saray lingkor tod sikato: “Nadngelan mi a saray arari na sankaabungan na Israel et makasi.* Abuloyan mo kami pan mansulong na sakon abel ed saray balangbang mi tan mangiberber na lubir ed ulo mi tan onla kamid ari na Israel. Agla pigan isalba toy bilay mo.”*+
32 Kanian nansulong iray sakon abel ed balangbang da tan binedberan day lubir so ulo ra tan linma rad ari na Israel tan inkuan da: “Oniay imbaga nen Ben-hadad a lingkor mo, ‘Panangasim, abuloyan mo ak* a manbilay.’” Et inkuan to: “Mabilay ni? Sikatoy agik.”
33 Kanian impasen da itan a sakey a tanda tan anisiaan dan tampol so imbaga to, tan inkuan da: “Agim si Ben-hadad.” Diad satan et inkuan to: “Sige, awit yo dia.” Kanian linmad sikato si Ben-hadad, tan pinalugan tod karwahe.
34 Et inkuan nen Ben-hadad ed sikato: “Ipawil ko ray syudad a sinamsam nen amak ed si amam, tan sarag moy manggawa na saray sarilim a tindaan* ed Damasco, a singa ginawa nen amak diad Samaria.”
Inmebat si Ahab: “Lapud sayan paknaan* et ibulos ta ka.”
Diad ontan et akipaknaan si Ahab ed sikato tan imbulos to.
35 Diad ganggan nen Jehova et inkuan na sakey ed saray ananak na propeta*+ ed kaiba to: “Kabil mo ak pa.” Balet ag-itan ginawa na kaiba to.
36 Kanian inkuan tod sikato: “Lapud agmo dinengel so imbaga nen Jehova, kaalis mo dia et pateyen ka na sakey a leon.” Kaalis to, sikatoy inataki tan pinatey na sakey a leon.
37 Et akaromog lamet na sananey a too tan inkuan to: “Kabil mo ak pa.” Kanian sikatoy kinabil to tan sinugatan to.
38 Insan inmalis imay propeta tan inalagar toy ari diad gilig na karsada, tan akabenda iray mata to pian agnabidbir.
39 Sanen ondadalan lay ari, oniay inkuan tod sikato: “Legan na guerra et wadman so lingkor mo, tan walay sakey a lakin inmalis tan linmad siak a walay kaiba ton laki, insan inkuan to, ‘Bantayan mo yan too. No sikatoy nabalang, say bilay mo so isalat ed bilay to,*+ odino manbayar kay sakey a talento* a pilak.’
40 Legan ya okupadoy lingkor mo, biglan naandi may too.” Et inkuan na ari na Israel ed sikato: “Ontan so pangukom ed sika; sikan mismo so nandesisyon.”
41 Diad saman et inekal ton tampol so benda ed saray mata to, tan abidbir na ari na Israel a sikatoy sakey ed saray propeta.+
42 Et inkuan tod ari: “Oniay imbaga nen Jehova, ‘Lapud pinaulyan mon makablos ed limam so sakey a too ya imbagak a nepeg a deralen,+ say bilay mo so isalat ed bilay to,*+ tan saray totoom so isalat ed saray totoo to.’”+
43 Diad saman et maer-ermen tan dismayadon sinmempet so ari na Israel ed abung to diad Samaria.+
Paimanod leksab
^ Odino “saray alolong.”
^ Odino “saray nasasakopan a distrito.”
^ Odino “saray alolong.”
^ Odino “amayamay so pinatey ton.”
^ Salanti, diad ontumbok a taon ed bulan na Abib (Nisan) na saray Judio. Nengnengen so Apendise B15.
^ Literal, “manbilang.”
^ Salanti, diad bulan na Abib (Nisan) na saray Judio. Nengnengen so Apendise B15.
^ Odino “et ararin walaay matoor a panangaro.”
^ Odino “kamarerwam.”
^ Odino “so kamarerwak.”
^ Odino “mamili na saray karsada.”
^ Odino “sipanan.”
^ Saray “ananak na propeta” et nayarin manutukoy ed eskuelaan a mangibabangat ed saray propeta odino ed ulopan na saray propeta.
^ Odino “say kamarerwam so isalat ed kamarerwa to.”
^ Say sakey a talento et 34.2 kilo. Nengnengen so Apendise B14.
^ Odino “say kamarerwam so isalat ed kamarerwa to.”
